ಅಭಿಷೇಕ್ ಅಂಬರೀಶ್ ಫೋಟೋಗೆ ಕಾಮೆಂಟ್ ಮಾಡಿದ ನಿಖಿಲ್ ಕುಮಾರಸ್ವಾಮಿ: ಅಭಿ ಹೇಳಿದ್ದೇನು?

ಅಭಿಷೇಕ್ ಅಂಬರೀಶ್ ಅವರಿಗೆ ಸಾಲು ಸಾಲು ಸಿನೆಮಾಗಳ ಆಫರ್ ಬರುತ್ತಿದೆ ಎಂಬ ಸುದ್ದಿ ಗಾಂಧಿನಗರದಲ್ಲಿ ಗುಲ್ಲಾಗಿತ್ತು. ಆದರೆ ಅವರ ಮುದಿನ ಪ್ರಾಜೆಕ್ಟ್ ಬಗ್ಗೆ ಯಾವುದೇ ಮಾಹಿತಿ ಹೊರಬಿದ್ದಿರಲಿಲ್ಲ. ಈಗ ಅವರು ತಮ್ಮ ಇನ್ಸ್ಟಾ ಖಾತೆಯಲ್ಲಿ ಖಡಕ್ ಲುಕ್ ನೀಡಿರುವ ಫೋಟೋವೊಂದನ್ನು ಹಾಕಿಕೊಂಡಿದ್ದಾರೆ. ಇದೇ ಇವರ ಮುಂದಿನ ಸಿನೆಮಾದ ಪಾತ್ರದ ಲುಕ್ ಇರಬಹುದಾ? ಎಂಬ ಸಂಶಯ ಕಾಡುತ್ತಿದೆ.

ಅಂಬಿ ಪುತ್ರನ ಈ ಪೋಸ್ಟ್ ನೋಡಿ ನಿಖಿಲ್ ಕುಮಾರಸ್ವಾಮಿ 'ಲುಕಿಂಗ್ ಶಾರ್ಪ್, ಮುಂದಿನ ಪ್ರಾಜೆಕ್ಟ್‌ಗೆ ಶುಭಾಶಯ' ಕಾಮೆಂಟ್ ಮಾಡಿದ್ದಾರೆ. ಈ ಕಾಮೆಂಟ್ ನೋಡಿದರೆ ಅಭಿ ಮುಂದಿನ ಸಿನೆಮಾ ಯಾವುದೆಂದು ಪಕ್ಕಾ ಆಗಿರಬಹುದಾ ಎಂಬ ಪ್ರಶ್ನೆ ಉದ್ಭವವಾಗುವುದು. ಈ ಬಗ್ಗೆ ವಿಜಯಕರ್ನಾಟಕ ವೆಬ್‌ಸೈಟ್ ಜೊತೆ ಮಾತನಾಡಿರುವ ಅಭಿಷೇಕ್ ಅಂಬರೀಶ್ " ನೋಡಿ, ಕಾಯಿರಿ, ನೋಡ್ತಾ ಇರಿ. ಎಲ್ಲರಿಗೂ ಕುತೂಹಲ ಬರಲಿ ಅಂಥ ಹೀಗೆಲ್ಲ ಮಾಡೋದು. ನಿಖಿಲ್ ನನ್ನ ಒಳ್ಳೆಯ ಸ್ನೇಹಿತರು. ನನ್ನ ಹಿತೈಷಿ ಅವರು. ನಮಗೆ ಒಳ್ಳೆಯದಾಗಲಿ ಅಂಥ ನಿಖಿಲ್ ಬಯಸುತ್ತಾರೆ. ಅವರು ಹಾಗೆ ಇರಲಿ" ಅಂಥ ತಿಳಿಸಿದ್ದಾರೆ. ಆದರೆ ಅಭಿಷೇಕ್ ಮುಂದಿನ ಸಿನೆಮಾದ ಬಗ್ಗೆ ಯಾವ ಸುಳಿವನ್ನೂ ನೀಡಲಿಲ್ಲ.


ಮಂಡ್ಯ ಚುನಾವಣೆ ಸಮಯದಲ್ಲಿ ಅಂಬರೀಶ್ ಮತ್ತು ಕುಮಾರಸ್ವಾಮಿ ಕುಟುಂಬದ ನಡುವೆ ವೈಮನಸ್ಯ ಉಂಟಾಗಿತ್ತು. ಹೀಗಿದ್ದಾಗ್ಯೂ ನಿಖಿಲ್ 'ನಾವಿಬ್ಬರು ಒಳ್ಳೆಯ ಸ್ನೇಹಿತರು, ನಮ್ಮ ನಡುವೆ ವೈಮನಸ್ಸಿನಲ್ಲ' ಎಂದು ಪದೇ ಪದೇ ಹೇಳಿದ್ದರು. ಈ ಕಾಮೆಂಟ್ ನೋಡಿದರೆ ಈ ಇಬ್ಬರ ಸ್ನೇಹ ಇನ್ನು ಹಸಿರಾಗಿದೆ ಎಂದು ತಿಳಿಯುತ್ತದೆ.

ಟಿವಿಯಲ್ಲಿ ಮೊಟ್ಟ ಮೊದಲ ಬಾರಿಗೆ 'ಅಮರ್' ಚಲನಚಿತ್ರ

ಸುಮಲತಾ ಅವರು ಈ ಹಿಂದೆ ಹೇಳಿದಂತೆ ಅಭಿಷೇಕ್ ಕೈಯಲ್ಲಿ ಎರಡು ಸಿನೆಮಾಗಳಿದ್ದು, ಇನ್ನೂ ಫೈನಲ್ ಆಗಿಲ್ಲ ಎಂದಿದ್ದರು. ಆದರೆ 'ಅಮರ್' ಬಾಕ್ಸ್ಆಫೀಸ್‌ನಲ್ಲಿ ಅಷ್ಟೊಂದು ಸದ್ದು ಮಾಡದ ಕಾರಣ ಈ ಬಾರಿ ಯಂಗ್ ರೆಬೆಲ್ ಕೊಂಚ ಆಲೋಚಿಸಿ ಹೆಜ್ಜೆ ಇಡಲಿದ್ದಾರೆ ಎನ್ನಲಾಗುತ್ತಿದೆ. 'ಅಮರ್' ಚಿತ್ರಕ್ಕೆ ನಾಗಶೇಖರ್ ನಿರ್ದೇಶನ ಮಾಡಿದ್ದರು. ತಾನ್ಯಾ ಹೋಪ್ ನಾಯಕಿಯಾಗಿ ನಟಿಸಿದ್ದರು. ಸಂದೇಶ್ ನಾಗರಾಜ್ ಬಂಡವಾಳ ಹೂಡಿದ್ದರು.