ಅಪೂರ್ವ ಕಾಸರವಳ್ಳಿ ಚೊಚ್ಚಲ ನಿರ್ದೇಶನದ ಚಿತ್ರ 'ನಿರುತ್ತರ' ಚಿತ್ರದಲ್ಲಿ ನಟಿ ಭಾವನಾ, ಐಂದ್ರಿತಾ ರೇ, ಕಿರಣ್‌ ಹಾಗೂ ಬಾಲಿವುಡ್‌ ನಟ ರಾಹುಲ್‌ ಬೋಸ್‌ ನಟಿಸಿದ್ದು, ಚಿತ್ರದಲ್ಲಿ ಸಂಗೀತ ಹೈಲೈಟ್‌ ಆಗಿದೆ. ಜನಪ್ರಿಯ ಸಂಗೀತ ನಿರ್ದೇಶಕ ರಸೂಲ್‌ ಪೂಕುಟ್ಟಿ ಮತ್ತು ನೀಲಾದ್ರಿ ಕುಮಾರ್‌ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ.
ರಸೂಲ್‌ ಪೂಕುಟ್ಟಿ ಮತ್ತು ನೀಲಾದ್ರಿ ಕುಮಾರ್‌ ಇಬ್ಬರೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸಿಕೊಂಡವರು. ಇವರನ್ನು ತಮ್ಮ ಚಿತ್ರಕ್ಕೆ ಕರೆತಂದಿದ್ದಾರೆ ಅಪೂರ್ವ. ವಿಕ್ರಮ್‌ ಹತ್ವಾರ್‌ ಕತೆ ಸಿನಿಮಾ ಆಗಿದೆ. ಚಿತ್ರದಲ್ಲಿರುವ 6 ಹಾಡುಗಳಿಗೆ ಕವಿರಾಜ್‌ ಸಾಹಿತ್ಯ ರಚಿಸಿದ್ದಾರೆ. 'ಚಿತ್ರದಲ್ಲಿ ನಟಿ ಭಾವನಾ ಶಾಸ್ತ್ರೀಯ ಸಂಗೀತಗಾರ್ತಿಯಾದ್ದರಿಂದ ಹಿಂದೂಸ್ತಾನಿ ಸಂಗೀತಗಾರರನ್ನು ಹುಡುಕುತ್ತಿದ್ದೆ. ಹಾಡುಗಳಿಗೆ ಹಿಂದೂಸ್ತಾನಿ ಸಂಗೀತದ ಟಚ್‌ ಬೇಕಿತ್ತು. ನೀಲಾದ್ರಿ ಅದ್ಭುತವಾದ ಸಂಗೀತ ನೀಡಿದ್ದಾರೆ ಎನ್ನುತ್ತಾರೆ ಅಪೂರ್ವ ಕಾಸರವಳ್ಳಿ.
ಚಿತ್ರದ ಆಡಿಯೋ ಸಿಡಿ ಈಗಾಗಲೇ ಬಿಡುಗಡೆಯಾಗಿದ್ದು, ಉತ್ತಮ ಪ್ರತಿಕ್ರಿಯೆ ಸಿಕ್ಕಿದೆ ಎನ್ನುತ್ತಾರೆ ಅವರು. 'ಹೊಸ ರೀತಿಯ ಸಂಗೀತದ ಅನುಭವ ಇದು ಕೊಡುತ್ತದೆ. ಎಲ್ಲ ರೀತಿಯ ಸಂಗೀತ ಪ್ರಿಯರಿಗೂ ಇದು ಆಪ್ಯಾಯಮಾನವಾಗಿದೆ' ಎಂದಿದ್ದಾರೆ.