ಹೊಸಬರ ಹಫ್ತಾದಲ್ಲಿ ಭಾವನೆಗಳಿಗಿಲ್ಲ ಅವಕಾಶ

ವರ್ಧನ್‌ ಮತ್ತು ರಾಘವ್‌ ನಾಗ್‌ ನಟನೆಯ ಚಿತ್ರ ಹಫ್ತಾ. ಚಿತ್ರದ ಹೆಸರೇ ಹೇಳುವಂತೆ ನೆಗೆಟಿವ್‌ ಶೇಡ್‌ನ ಪಾತ್ರದಲ್ಲಿ ವರ್ಧನ್‌ ನಟಿಸುತ್ತಿದ್ದಾರೆ. ಕರಾವಳಿ ತೀರದಲ್ಲಿ ನಡೆಯುವ ದಂಧೆಯ ಸುತ್ತ ಹೆಣೆದ ಕತೆ ಚಿತ್ರದಲ್ಲಿದೆ. ಸ್ವತಃ ತಾವೇ ಕತೆಯನ್ನು ಬರೆದು ನಿರ್ದೇಶನ ಮಾಡಿದ್ದಾರೆ ಪ್ರಕಾಶ್‌ ಹೆಬ್ಬಾಳ.

ಈ ಚಿತ್ರದ ಟ್ರೇಲರ್‌ ಈಗ ಸುದ್ದಿಯಲ್ಲಿದೆ. ವರ್ಧನ್‌ ಕಾಣಿಸಿಕೊಂಡಿರುವ ರೀತಿ, ಚಿತ್ರದ ಸಿನಿಮಾಟೋಗ್ರಫಿ ಝಲಕ್‌ ಎಲ್ಲರ ಗಮನ ಸೆಳೆದಿದೆ. ಶ್ರೀಮುರಳಿ ಈ ಟ್ರೇಲರ್‌ ರಿಲೀಸ್‌ ಮಾಡಿದ್ದರು. ಅದೃಷ್ಟದಿಂದ ಎಲ್ಲರೂ ಗೆಲ್ಲಲು ಸಾಧ್ಯವಿಲ್ಲ. ಶ್ರಮ, ಪ್ರತಿಭೆ ಇದ್ದರೆ ಮಾತ್ರ ಚಿತ್ರ ಗೆಲ್ಲುವುದು ಎಂದಿದ್ದರು. ಅದರಂತೆ ಚಿತ್ರದ ಟ್ರೇಲರ್‌ ನೋಡಿ ಮೆಚ್ಚುಗೆಯನ್ನೂ ವ್ಯಕ್ತಪಡಿಸಿದ್ದರು.

ಹಫ್ತಾ ಟೈಟಲ್‌ಗೆ 'ಸೆಂಟಿಮೆಂಟ್ಸ್‌ ನಾಟ್‌ ಅಲೋಡ್‌' ಎಂಬ ಟ್ಯಾಗ್‌ಲೈನ್‌ ಇದೆ. ಇದು ಚಿತ್ರ ಯಾವ ಜಾನರ್‌ದು ಎಂಬುದನ್ನು ಹೇಳುತ್ತಿದೆ. ಸೆಂಟಿಮೆಂಟ್‌ಗೆ ಅವಕಾಶ ಇಲ್ಲದ ಆ್ಯಕ್ಷನ್‌ ಸಿನಿಮಾ ಇದಾಗಿರಬಹುದೇ ಎಂಬ ಕುತೂಹಲ ಹುಟ್ಟುಹಾಕಿದೆ. ಹೊಸ ರೀತಿಯ ಕತೆಯೊಂದನ್ನು ತೆರೆಯ ಮೇಲೆ ತರುತ್ತಿದ್ದೇನೆ ಎಂದಿದ್ದಾರೆ ನಿರ್ದೇಶಕ ಪ್ರಕಾಶ್‌ ಹೆಬ್ಬಾಳ್‌. 'ಚಿತ್ರಕ್ಕೆ ಹಫ್ತಾ ಎಂದು ಹೆಸರಿಟ್ಟಿದ್ದರೂ ಸುಲಿಗೆ, ವಸೂಲಿ ಕತೆ ಇಲ್ಲಿಲ್ಲ. ಕಡಲ ತೀರದ ಭೂಗತ ಲೋಕದ ಅನಾವರಣ ಮಾಡಿದ್ದೇವೆ. ಸಸ್ಪೆನ್ಸ್‌ ಥ್ರಿಲ್ಲರ್‌ ಸಿನಿಮಾ ಇದಾಗಿದೆ' ಎನ್ನುತ್ತಾರೆ ಅವರು.