ಕುತೂಹಲ ಕೆರಳಿಸಿದ ಹಾರರ್‌ ಚಿತ್ರದ ಟ್ರೇಲರ್‌

ಹೊಸಬರ ಮತ್ತೊಂದು ಚಿತ್ರ "ಒಂದ್‌ ಕತೆ ಹೇಳ್ಲಾ' ಟ್ರೇಲರ್‌ ರಿಲೀಸ್‌ ಆಗಿದೆ. ಕಿರುತೆರೆ ನಟ ತಾಂಡವ್‌ ರಾಮ್‌ ನಾಯಕನಾಗಿ ನಟಿಸಿರುವ ಚಿತ್ರದ ಟ್ರೇಲರ್‌ ಈಗ ಹೆಚ್ಚು ಹಿಟ್‌ ಗಳಿಸುತ್ತಿದೆ.

ನವ ನಿರ್ದೇಶಕ ಗಿರೀಶ್‌ ಕ್ರೌಂಡ್‌ ಫಂಡಿಂಗ್‌ ಮೂಲಕ ನಿರ್ಮಿಸಿದ ಚಿತ್ರ "ಒಂದ್‌ ಕತೆ ಹೇಳ್ಲಾ' ಹಾರರ್‌ ಮತ್ತು ಸಸ್ಪೆನ್ಸ್‌ ಚಿತ್ರ ಇದಾಗಿದ್ದು, ಚಿತ್ರದಲ್ಲಿ 5 ವಿಭಿನ್ನ ಹಾರರ್‌ ಕತೆಗಳನ್ನು ಹೇಳಿದ್ದಾರೆ ನಿರ್ದೇಶಕರು. ಚಿತ್ರದ ಟ್ರೇಲರ್‌ ರಿಲೀಸ್‌ ಆಗಿದ್ದು, ಕುತೂಹಲ ಕೆರಳಿಸಿದೆ.

"ಟ್ರೇಲರ್‌ಗೆ ಅದ್ಭುತವಾದ ರೆಸ್ಪಾನ್ಸ್‌ ಸಿಕ್ಕಿದೆ. ಬೆಚ್ಚಿಬೀಳಿಸುವಂತಿದೆ ಎಂದಿದ್ದಾರೆ. ಇದು ತುಂಬಾ ಖುಷಿ ಕೊಟ್ಟಿದೆ. ಸಿನಿಮಾ ಕೂಡಾ ಹೊಸ ಅನುಭವ ನೀಡುತ್ತೆ ಅನ್ನೋದ್ರಲ್ಲಿ ಅನುಮಾನವೇ ಇಲ್ಲ' ಎಂದಿದ್ದಾರೆ ನಿರ್ದೇಶಕ ಗಿರೀಶ್‌.

ಟ್ರೇಲರ್‌ ಎಲ್ಲಾ ವರ್ಗದವರನ್ನೂ ಸೆಳೆಯುತ್ತಿದೆ. ವೈವಿಧ್ಯಮಯವಾಗಿ ಮೂಡಿ ಬಂದಿದೆ. ಚಿತ್ರದಲ್ಲಿ ಒಂದು ಮುಖ್ಯ ಕತೆ ಇದ್ದು, ಇದಕ್ಕೆ 5 ಉಪಕತೆಗಳಿವೆ. ಇವೆಲ್ಲವೂ ಹಾರರ್‌ ಕತೆಗಳೇ ಅನ್ನೋದು ವಿಶೇಷ. ಚಿತ್ರದಲ್ಲಿ ಕಿರುತೆರೆಯಲ್ಲಿ ಹೆಸರು ಮಾಡಿರುವ ನಟ ತಾಂಡವ್‌ ರಾಮ್‌ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ.

"ಹಾರರ್‌ ಸಿನಿಮಾಗಳು ಹಲವು ಬಂದಿವೆ. ಹಾಗಂತ ನಮ್ಮ ಸಿನಿಮಾವೂ ಅದರಲ್ಲಿ ಒಂದು ಎಂದುಕೊಳ್ಳಬೇಕಿಲ್ಲ. 5 ಕತೆಗಳು ವಿಭಿನ್ನ ದಿಕ್ಕಿಗೆ ಚಲಿಸುತ್ತವೆ. ಸತ್ಯ ಘಟನೆಗಳನ್ನು ಆಧರಿಸಿಯೂ ಕತೆ ಹೇಳಿದ್ದೇವೆ ಎಂದಿದ್ದಾರೆ ಅವರು. ಚಿತ್ರದ ಕ್ಲೈಮಾಕ್ಸ್‌ನಲ್ಲಿ ಎಲ್ಲಾ ಕತೆಗಳೂ ಲಿಂಕ್‌ ಆಗುತ್ತವೆ ಎನ್ನುವುದು ಅವರ ಮಾತು.