ಡಬ್‌ ಆಗಲಿದೆ ಪ್ರಿಯಾ ವಾರಿಯರ್‌ ಸಿನಿಮಾ, ಕಿರಿಕ್‌ ಲವ್‌ ಸ್ಟೋರಿ ಕನ್ನಡ ಚಿತ್ರದ ಟೈಟಲ್‌

ತನ್ನ ಕಣ್ಸನ್ನೆಯಿಂದ ಭಾರತದಾದ್ಯಂತ ಎಲ್ಲರ ಎದೆಯಲ್ಲಿ ಸಂಚಲನ ಮೂಡಿಸಿದ ನಟಿ ಪ್ರಿಯಾ ವಾರಿಯರ್‌. ಒರು ಅಡಾರ್‌ ಲವ್‌ ಎಂಬ ಮಲಯಾಳಂ ಚಿತ್ರ ತನ್ನ ಮೊದಲ ಟೀಸರ್‌ ನಿಂದ ದೊಡ್ಡ ಸುದ್ದಿಯಾಗಿತ್ತು. ಇದೀಗ ಕನ್ನಡಕ್ಕೆ ಡಬ್‌ ಆಗೋ ಮೂಲಕ ಮತ್ತೊಮ್ಮೆ ಸ್ಯಾಂಡಲ್‌ವುಡ್‌ನಲ್ಲಿ ಸದ್ದು ಮಾಡುತ್ತಿದೆ. ಚಿತ್ರಕ್ಕೆ ಕಿರಿಕ್‌ ಲವ್‌ ಸ್ಟೋರಿ ಎಂದು ಹೆಸರಿಡಲಾಗಿದೆ.

ಫೆ.14ರಂದು ಪ್ರೇಮಿಗಳ ದಿನದಂದು ಈ ಚಿತ್ರವನ್ನು ರಿಲೀಸ್‌ ಮಾಡಲು ಚಿತ್ರತಂಡ ಯೋಚಿಸುತ್ತಿದೆ. ಕನ್ನಡದ ಜತೆ ಹಿಂದಿ, ತಮಿಳು ತೆಲುಗು ಮತ್ತು ತೆಲುಗು ಭಾಷೆಗಳಿಗೂ ಡಬ್‌ ಆಗಲಿದೆ. ಎಲ್ಲಾ ಕಡೆ ಏಕಕಾಲದಲ್ಲಿ ಚಿತ್ರ ಬಿಡುಗಡೆಯಾಗಲಿದೆ ಎಂದು ಗೊತ್ತಾಗಿದೆ. ಹೊಸ ಚಿತ್ರವೊಂದು ಮೊದಲ ಬಾರಿಗೆ ಕನ್ನಡದಲ್ಲಿ ಡಬ್ಬಿಂಗ್‌ ಆಗಿ ತೆರೆ ಕಾಣಲಿದೆ. ಈಗಾಗಲೇ ತಮಿಳು, ಹಿಂದಿ ಭಾಷೆಗಳಲ್ಲಿ ಟೀಸರ್‌ ರಿಲೀಸ್‌ ಆಗಿವೆ.

ಚಿತ್ರೀಕರಣ ಹಂತದಲ್ಲಿರುವಾಗಲೇ ರಿಲೀಸ್‌ ಮಾಡಿದ್ದ ಪ್ರಿಯಾ ವಾರಿಯರ್‌ ಕಣ್ಣು ಹೊಡೆಯುವ ಒಂದು ದೃಶ್ಯ ಈ ಚಿತ್ರಕ್ಕೆ ಭರ್ಜರಿ ಪ್ರಚಾರ ನೀಡಿತ್ತು. ಪ್ರಿಯಾ ವಾರಿಯರ್‌ ದೇಶದ ಜನಪ್ರಿಯ ಕ್ರಷ್‌ ಹುಡುಗಿಯಾಗಿ ಹೊರಹೊಮ್ಮಿದ್ದರು. ಸ್ಕೂಲ್‌ ಹುಡುಗರ ಪ್ರೇಮ ಕತೆ ಇರುವ ಚಿತ್ರ ದೊಡ್ಡ ನಿರೀಕ್ಷೆಯನ್ನು ಹುಟ್ಟು ಹಾಕಿತು. ಪ್ರಿಯಾ ವಾರಿಯರ್‌ ದೊಡ್ಡ ಸ್ಟಾರ್‌ ನಟಿಯಂತೆ ಪ್ರಚಾರ ಪಡೆದರು. ಬಾಲಿವುಡ್‌ ಸೇರಿದಂತೆ ಎಲ್ಲಾ ಚಿತ್ರರಂಗದ ಸ್ಟಾರ್ಸ್‌ಗಳೂ ಅವರ ನಟನೆಗೆ ಫಿದಾ ಆದರು. ಇದಾದ ನಂತರ ಇನ್ನೊಂದು ಟೀಸರ್‌ ರಿಲೀಸ್‌ ಮಾಡಲಾಯಿತು. ಇದೂ ಕೂಡಾ ಹಿಟ್‌ ಆಯಿತು. ಈ ನಡುವೆ ವಿವಾದಕ್ಕೂ ಕಾರಣವಾಗಿತ್ತು.