ಜೀ ಕನ್ನಡದಲ್ಲಿ ಪೈಲ್ವಾನ್‌ ಗ್ರ್ಯಾಂಡ್‌ ಆಡಿಯೋ ಲಾಂಚ್‌

* ಹರೀಶ್‌ಬಸವರಾಜ್‌

ಕಿಚ್ಚ ಸುದೀಪ್‌ ನಟನೆಯ ಪೈಲ್ವಾನ್‌ ಸಿನಿಮಾದ ಆಡಿಯೋ ಲಾಂಚ್‌ ಇತ್ತೀಚೆಗೆ ಬೆಂಗಳೂರಿನ ಕೋರಮಂಗಲ ಇಂಡೋರ್‌ ಸ್ಟೇಡಿಯಂನಲ್ಲಿ ಸಾವಿರಾರು ಅಭಿಮಾನಿಗಳ ನಡುವೆ ನಡೆಯಿತು. ಈ ಕಾರ್ಯಕ್ರಮ ಜೀ ಕನ್ನಡ ವಾಹಿನಿ ಮತ್ತು ಜೀ ಕನ್ನಡ ಎಚ್‌ಡಿಯಲ್ಲಿ ಪ್ರಸಾರವಾಗಲಿದೆ ಎಂದು ಬಿಸ್ನೆಸ್‌ ಹೆಡ್‌ ರಾಘವೇಂದ್ರ ಹುಣಸೂರು ಹೇಳಿದ್ದಾರೆ.

'ಪೈಲ್ವಾನ್‌ ಸಿನಿಮಾ ಐದು ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿದ್ದು, ಇದೇ ಮೊದಲ ಬಾರಿಗೆ ಸುದೀಪ್‌ ಸಿನಿಮಾದ ಆಡಿಯೋವನ್ನು ಪುನೀತ್‌ ಬಿಡುಗಡೆ ಮಾಡಿದ್ದಾರೆ. ಈ ಕಾರ್ಯಕ್ರಮದಲ್ಲಿ ಸುದೀಪ್‌ ಪತ್ನಿ ಪ್ರಿಯಾ ಸುದೀಪ್‌ ಸಹ ಹಾಜರಿದ್ದರು. ಇನ್ನು ಪುನೀತ್‌ ಮತ್ತು ಸುದೀಪ್‌ ಬಾಲ್ಯದ ಗೆಳೆಯರು. ಆ ಬಾಲ್ಯದ ನೆನಪುಗಳನ್ನ ಇಬ್ಬರು ನಟರು ಈ ಕಾರ್ಯಕ್ರಮದಲ್ಲಿ ಹಂಚಿಕೊಂಡರು. ಈ ಆಡಿಯೋ ಲಾಂಚ್‌ ಕಾರ್ಯಕ್ರಮದ ವೇದಿಕೆಗೆ ಸುದೀಪ್‌ ರಿಯಲ್‌ ಕುಸ್ತಿ ಪೈಲ್ವಾನರ ಜತೆಗೆ ಎಂಟ್ರಿ ಕೊಟ್ಟರು. ಇನ್ನು ಸುದೀಪ್‌ ಅವರ ಕಟೌಟ್‌ಗಳನ್ನು ನಿಲ್ಲಿಸಲಾಗಿತ್ತು. ಆಕಾಂಕ್ಷಾಸಿಂಗ್‌ ಸಹ ಈ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು' ಎನ್ನುತ್ತಾರವರು.

'ಪೈಲ್ವಾನ್‌ ಸಿನಿಮಾದ ಒಂದು ಹಾಡಿ ನೃತ್ಯ ನಿರ್ದೇಶನ ಮಾಡಿರುವ ಬಾಲಿವುಡ್‌ನ ಖ್ಯಾತ ನೃತ್ಯ ನಿರ್ದೇಶಕ ಗಣೇಶ್‌ ಆಚಾರ್ಯ, ಸುದೀಪ್‌ ಮತ್ತು ಪುನೀತ್‌ಗೆ ವೇದಿಕೆಯ ಮೆಲೆ ಹೊಸ ಸ್ಪೆಪ್‌ಗಳನ್ನು ಹೇಳಿಕೊಟ್ಟರು. ಜತೆಗೆ ಸುದೀಪ್‌- ವಿಜಯ್‌ ಪ್ರಕಾಶ್‌ ಇಬ್ಬರ ಜುಗಲ್ಬಂದಿ, ಸಂಚಿತ್‌ ಹೆಗ್ಡೆಯ ಐದು ಭಾಷೆಗಳ ಗಾಯನ, ಸಂಗೀತ ನಿರ್ದೇಶಕ ಅರ್ಜುನ್‌ ಜನ್ಯ ಪರ್ಫಾಮೆನ್ಸ್‌ ಇಡೀ ಕಾರ್ಯಕ್ರಮದಲ್ಲಿ ಹೈಲೈಟ್‌ ಆಗಿತ್ತು. ಇನ್ನು ಸಂತೋಷ್‌ ಆನಂದ್‌ರಾಮ್‌, ರಿಷಭ್‌ ಶೆಟ್ಟಿ, ಕಾರ್ತಿಕ್‌ ಗೌಡ ಆಗಮಿಸಿ ಸುದೀಪ್‌ ಅವರಿಗೆ ಶುಭಾಶಯ ತಿಳಿಸಿದರು' ಎಂದು ಹೇಳುತ್ತಾರೆ ರಾಘವೇಂದ್ರ ಹುಣಸೂರು.

ಈ ಅದ್ಧೂರಿ ಕಾರ್ಯಕ್ರಮ ಜೀ ಕನ್ನಡ ಮತ್ತು ಜೀ ಕನ್ನಡ ಎಚ್‌ಡಿಯಲ್ಲಿ ಇದೇ ಭಾನುವಾರ (ಆಗಸ್ಟ್‌ 25ರಂದು) ಸಂಜೆ 8ಕ್ಕೆ ಪ್ರಸಾರವಾಗಲಿದೆ.