ಪವನ್‌ ಕಲ್ಯಾಣ್‌ ಮೂರನೇ ಪತ್ನಿಗೆ ಎರಡನೇ ಮಗು

ಟಾಲಿವುಡ್‌ ಪವರ್‌ ಸ್ಟಾರ್‌ ಪವನ್‌ ಕಲ್ಯಾಣ್‌ ಮಂಗಳವಾರ ಮುಂಜಾನೆ ಮತ್ತೊಮ್ಮೆ ತಂದೆಯಾದ ಸಂಭ್ರಮದಲ್ಲಿದ್ದಾರೆ. ಪವನ್‌ ಮೂರನೇ ಪತ್ನಿ ಅನ್ನಾ ಲೆಜ್ನೆವಾ ಮುದ್ದಾದ ಗಂಡು ಮಗುವಿಗೆ ಜನ್ಮ ನೀಡಿದ್ದು, ತಾಯಿ ಮತ್ತು ಮಗು ಆರೋಗ್ಯವಾಗಿದ್ದಾರೆ.

ಎರಡನೇ ಪತ್ನಿ ರೇಣು ದೇಸಾಯಿ ಅವರೊಂದಿಗಿನ ವಿಚ್ಛೇದನದ ನಂತರ ರಷ್ಯಾದ ಬೆಡಗಿ ಅನ್ನಾ ಲೆಜ್ನೆವಾ ಜತೆ ಮದುವೆಯಾಗಿದ್ದರು. 2011ರಲ್ಲಿ 'ತೀನ್‌ ಮಾರ್‌' ಚಿತ್ರದ ಶೂಟಿಂಗ್‌ ವೇಳೆ ಪವನ್‌-ಅನ್ನಾ ನಡುವೆ ಪ್ರೇಮಾಂಕುರವಾಗಿತ್ತು. ನಂತರ ಅವರಿಬ್ಬರ ಪ್ರೇಮ ದಾಂಪತ್ಯವಾಗಿ ಬದಲಾಯಿತು. ಈಗಾಗಲೇ ಪವನ್‌-ಅನ್ನಾ ದಂಪತಿಗೆ ಪೋಲೆನಾ ಎಂಬ ಮಗಳಿದ್ದು, ಈಗ ಜನಿಸಿರುವುದು ಎರಡನೇ ಮಗು.

ಪವನ್‌ ಮಾಜಿ ಪತ್ನಿ ರೇಣು ದೇಸಾಯಿಗೂ ಇಬ್ಬರು ಮಕ್ಕಳಿದ್ದಾರೆ. ಮಗನ ಹೆಸರು ಅಕಿರಾ ಆದರೆ ಮಗಳ ಹೆಸರು ಆಧ್ಯಾ. ಅಂದಹಾಗೆ ಪವನ್‌ ಕಲ್ಯಾಣ್‌ ಮೊದಲ ಪತ್ನಿ ಹೆಸರು ನಂದಿನಿ. ಆದರೆ ನಂದಿನಿಗೆ ಮಕ್ಕಳಿಲ್ಲ.

ಸದ್ಯಕ್ಕೆ ಪವನ್‌ 'ಅಗ್ನಾತವಾಸಿ' ಚಿತ್ರದ ಶೂಟಿಂಗ್‌ನಲ್ಲಿ ಬಿಝಿಯಾಗಿದ್ದಾರೆ. ಈ ಚಿತ್ರವನ್ನು ತ್ರಿವಿಕ್ರಮ್‌ ಶ್ರೀನಿವಾಸ್‌ ನೀರ್ದೇಶಿಸುತ್ತಿದ್ದು, ಸಂಕ್ರಾಂತಿಗೆ ಬಿಡುಗಡೆಯಾಗುವ ಸಾಧ್ಯತೆಯಿದೆ. ತಮ್ಮ ಬಿಝಿ ಶೆಡ್ಯುಲ್‌ನಲ್ಲಿ ಹೈದರಾಬಾದ್‌ನ ಖಾಸಗಿ ಆಸ್ಪತ್ರೆಗೆ ಭೇಟಿ ನೀಡಿದ ಪವನ್‌, ಮಗುವಿನೊಂದಿಗೆ ಕೆಲ ಸಮಯ ಕಳೆದಿದ್ದಾರೆ.