ಚಾನ್ಸ್‌ ಕೊಟ್ಟ ನಿರ್ಮಾಪಕನಿಗೆ ಶಾಕ್‌ ಕೊಟ್ಟ ಸಾಯಿ ಪಲ್ಲವಿ

ಮಲಯಾಳಂನ 'ಪ್ರೇಮಂ' ಚಿತ್ರದ ಮೂಲಕ ಸಿನಿ ರಸಿಕರ ಮನಗೆದ್ದ ನಟಿ ಸಾಯಿ ಪಲ್ಲವಿ. 'ಪ್ರೇಮಂ'ನಲ್ಲಿ ಮಲರ್‌ ಟೀಚರ್‌ ಪಾತ್ರವನ್ನು ನಿಭಾಯಿಸಿದ ಈ ಬೆಡಗಿಯನ್ನು ತೆಲುಗು ಚಿತ್ರರಂಗಕ್ಕೆ ಕರೆತಂದವರು ನಿರ್ಮಾಪಕ ದಿಲ್‌ ರಾಜು. 'ಫಿದಾ' ಚಿತ್ರದ ಮೂಲಕ ಟಾಲಿವುಡ್‌ ಅಂಗಳಕ್ಕೆ ಕಾಲಿಟ್ಟ ಸಾಯಿ ಪಲ್ಲವಿಗೆ ಮತ್ತಷ್ಟು ಜನಪ್ರಿಯತೆ ತಂದುಕೊಟ್ಟಿದ್ದೂ ರಾಜು ಅವರೇ.

ಇದೀಗ ಅದೇ 'ಫಿದಾ' ನಿರ್ಮಾಪಕ ಮತ್ತೊಂದು ಚಿತ್ರದ ಆಫರ್‌ನ್ನು ಕೈಯಲ್ಲಿ ಹಿಡಿದು ಸಾಯಿ ಪಲ್ಲವಿಯನ್ನು ಸಂಪರ್ಕಿಸಿದಾಗ ಅವರಿಗೆ ಶಾಕ್‌ ಕಾದಿತ್ತು. ಚಿತ್ರದಲ್ಲಿನ ನಾಯಕಿ ಪಾತ್ರ ತಮಗೆ ಇಷ್ಟವಾಗದ ಕಾರಣ ಚಿತ್ರವನ್ನು 'ಪ್ರೇಮಂ' ನಟಿ ತಿರಸ್ಕರಿಸಿದ್ದಾರೆ ಎಂದು ಮೂಲಗಳು ವರದಿ ಮಾಡಿವೆ.

ಸಾಯಿ ಪಲ್ಲವಿ ಅಭಿನಯಿಸಬೇಕಾಗಿದ್ದ ಚಿತ್ರವೀಗ ನಮ್ಮ ಕರಾವಳಿ ಬೆಡಗಿ ಪೂಜಾ ಹೆಗಡೆ ಪಾಲಾಗಿದೆಯಂತೆ. ನಮ್ಮ ಕರ್ನಾಟಕ ಮೂಲದ ಪೂಜಾ ಈ ಹಿಂದೆ ದಿಲ್‌ ರಾಜು ನಿರ್ಮಾಣದ 'ಡಿಜೆ' ಚಿತ್ರದಲ್ಲಿ ಅಭಿನಯಿಸಿದ್ದರು. ಹೊಸ ಚಿತ್ರದಲ್ಲಿ ಪೂಜಾ ಜತೆ ನಾಯಕನಾಗಿ ನಿತೀನ್‌ ಕಾಣಿಸಿಕೊಳ್ಳಲಿದ್ದು, ಸತೀಶ್‌ ವಿಗ್ನೇಶ್‌ ಆ್ಯಕ್ಷನ್‌ ಕಟ್‌ ಹೇಳಲಿದ್ದಾರೆ.

'ಫಿದಾ' ಚಿತ್ರೀಕರಣದ ವೇಳೆ ದಿಲ್‌ ರಾಜು ನಿರ್ಮಾಣದ ಇನ್ನೆರೆಡು ಚಿತ್ರದಲ್ಲಿ ಅಭಿನಯಿಸುವುದಾಗಿ ಸಾಯಿ ಪಲ್ಲವಿ ಒಪ್ಪಿಕೊಂಡಿದ್ದರಂತೆ. ಇದೇ ಒಪ್ಪಂದವನ್ನು ನೆಚ್ಚಿಕೊಂಡು ಸಾಯಿ ಪಲ್ಲವಿ ಬಳಿ ತೆರಳಿದ ದಿಲ್‌ ರಾಜುಗೆ ಭಾರಿ ಶಾಕ್‌ ತಟ್ಟಿದೆ ಎಂದು ಟಾಲಿವುಡ್‌ ಮಂದಿ ಮಾತನಾಡಿಕೊಳ್ಳುತ್ತಿದ್ದಾರೆ.