43ರ ಹರೆಯದಲ್ಲೂ ಮಹೇಶ್ ಬಾಬು ಇಷ್ಟು ಫಿಟ್ ಆಗಿ ಇರಲು ಕಾರಣ?

ಟಾಲಿವುಡ್‌ನ ಟಾಪ್ ಹೀರೋಗಳಲ್ಲಿ ಒಬ್ಬರಾಗಿರುವ ಮಹೇಶ್ ಬಾಬು ಇಂದು ಈ ಸ್ಥಾನದಲ್ಲಿದ್ದಾರೆ ಎಂದರೆ ಇದಕ್ಕೆ ತನ್ನ ಧರ್ಮಪತ್ನಿ ನಮ್ರತಾ ಕಾರಣ ಎಂದಿದ್ದಾರೆ ನಟ ಮಹೇಶ್ ಬಾಬು. ಅವರ ಅಭಿನಯದ 'ಮಹರ್ಷಿ' ಸಿನಿಮಾ ಇದೇ ಮೇ. 9ರಂದು ರಿಲೀಸ್ ಆಗುತ್ತಿದೆ. ಈ ಹಿನ್ನೆಲೆಯಲ್ಲಿ ತಮ್ಮ ಜೀವನದ ಕೆಲವು ಆಸಕ್ತಿಕರ ಸಂಗತಿಗಳನ್ನು ಮಹೇಶ್ ಹಂಚಿಕೊಂಡಿದ್ದಾರೆ.

ನಿಮ್ಮ ಗೆಲುವಿನಲ್ಲಿ ನಮ್ರತಾ ಪಾಲೆಷ್ಟು? ಎಂಬ ಪ್ರಶ್ನೆಗೆ ಉತ್ತರಿಸಿರುವ ಮಹೇಶ್ ಬಾಬು, "ನಮ್ರತಾ ನನ್ನ ಬಲ, ನನ್ನ ಬೆನ್ನೆಲುಬು, ನನ್ನ ಜೀವನ, ನನ್ನ ಸಕ್ಸಸ್, ನನ್ನ ಸಂತೋಷ. ಒಂದು ರೀತಿಯಲ್ಲಿ ನಾನು ಸಾಧಿಸಿದ್ದೆಲ್ಲಾ ನಮ್ರತಾ, ಮಕ್ಕಳಿಗಾಗಿಯೇ. ಇಂದು ನಾನು ಈ ಸ್ಥಾನದಲ್ಲಿದ್ದೇನೆ ಎಂದರೆ ಅದಕ್ಕೆ ಕಾರಣ ನಮ್ರತಾ. ನನ್ನ ಮಕ್ಕಳಿಗೆ ಇಷ್ಟವಾದ ವೃತ್ತಿಯನ್ನು ಆಯ್ಕೆ ಮಾಡಿಕೊಳ್ಳುವ ಸ್ವಾತ್ರಂತ್ರ್ಯ ಇದೆ. ತಂದೆತಾಯಿ ನಟರೆಂಬ ಕಾರಣಕ್ಕೆ ಅವರೂ ನಟನೆಯನ್ನು ಆಯ್ಕೆ ಮಾಡಿಕೊಳ್ಳುವಂತೆ ಬಲವಂತ ಹೇರುವುದು ಸರಿಯಲ್ಲ ಎಂದಿದ್ದಾರೆ.

ಬಳಿಕ 43ರ ಪ್ರಾಯದಲ್ಲೂ ನೀವು ಇಷ್ಟು ಸುಂದರವಾಗಿ ಇದ್ದೀರಲ್ಲಾ ಎಂದು ಕೇಳಿದ್ದಕ್ಕೆ, "ಥ್ಯಾಂಕ್ಸ್, ನನಗೆ ಫಿಟ್‌ ಆಗಿ ಇರುವುದು ಇಷ್ಟ. ಮುಖ್ಯವಾಗಿ ಆಹಾರದ ವಿಚಾರದಲ್ಲಿ ಎಚ್ಚರಿಕೆ ವಹಿಸುತ್ತೇನೆ. ನನಗೆ ಚೀಟ್ ಡೇಸ್ (ವಿಶೇಷ ಸಂದರ್ಭಗಳಲ್ಲಿ ಇಷ್ಟಬಂದ ಆಹಾರ ತಿನ್ನುವುದು) ಇರಲ್ಲ. ನನ್ನ ಸಂತೋಷವನ್ನು ಕುಟುಂಬದಲ್ಲಿ ಹುಡುಕಿಕೊಳ್ಳುತ್ತೇನೆ" ಎಂದು ಮಹೇಶ್ ಬಾಬು ಹೇಳಿದ್ದಾರೆ.

ಮಹರ್ಷಿ ಸಿನಿಮಾಗೆ ವಂಶಿ ಪೈಡಿಪಲ್ಲಿ ನಿರ್ದೇಶನ ಮಾಡಿದ್ದಾರೆ. ಕನ್ನಡದ ಪೂಜಾ ಹೆಗ್ಡೆ ನಾಯಕಿ. ಅಲ್ಲರಿ ನರೇಶ್ ಚಿತ್ರದಲ್ಲಿ ಮುಖ್ಯಪಾತ್ರ ಪೋಷಿಸಿದ್ದಾರೆ. ದಿಲ್ ರಾಜು, ಅಶ್ವಿನಿ ದತ್, ಪ್ರಸಾದ್ ವಿ ಪೋಟ್ಲೂರಿ ನಿರ್ಮಾಣದ ಸಿನಿಮಾ. ದೇವಿಶ್ರೀ ಪ್ರಸಾದ್ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ.