'ಆರೇಂಜ್' ಚಿತ್ರದಲ್ಲಿ ಪ್ರಿಯಾ ಆನಂದ್‌ ವಿಭಿನ್ನ ಪಾತ್ರ

ಗಣೇಶ್‌ ಮುಖ್ಯ ಭೂಮಿಕೆಯಲ್ಲಿ ನಟಿಸಿರುವ ಆರೇಂಜ್‌ ಸಿನಿಮಾದಲ್ಲಿ ಪ್ರಿಯಾ ಆನಂದ್‌ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ಇವರು ಸಖತ್‌ ಆಸೆಗಳನ್ನು ಹೊಂದಿರುವ ಮತ್ತು ತಮ್ಮ ಜೀವನದಲ್ಲಿ ಯಾವುದೇ ಜಡ್ಜ್‌ಮೆಂಟ್‌ ತಗೆದುಕೊಳ್ಳದೇ, ಕನ್‌ಫ್ಯೂಸ್‌ ಆಗುವಂಥ ಹುಡುಗಿಯಾಗಿ ನಟಿಸಿದ್ದಾರೆ.

'ತುಂಬಾ ಸೂಕ್ಷ್ಮ ಎನಿಸುವಂಥ ಪಾತ್ರದಲ್ಲಿ ಪ್ರಿಯಾ ಕಾಣಿಸಿಕೊಂಡಿದ್ದಾರೆ. ಒಂದು ರೀತಿಯಲ್ಲಿ ಅದು ಹೀರೋ ಅಪೋಸಿಟ್‌ ಪಾತ್ರ. ಹುಡುಗನ ವಿಚಾರದಲ್ಲಿ ಸಖತ್‌ ಗೊಂದಲ ಇರುವಂಥ ಹುಡುಗಿಯಾಕೆ. ಅವಳು ಯಾವುದೇ ನಿರ್ಧಾರ ತಗೆದುಕೊಳ್ಳುವಾಗಲೂ ಗಲಿಬಿಲಿಗೊಳ್ಳುತ್ತಾಳೆ. ಒಂದು ಹೊತ್ತಿನಲ್ಲಿ ತಗೆದುಕೊಂಡ ನಿರ್ಧಾರ ಮತ್ತೊಂದು ಹೊತ್ತಿಗೆ ಇರುವುದಿಲ್ಲ. ಇಂಥ ಹುಡುಗಿಯ ಜೀವನ ಹೇಗಿರುತ್ತದೆ ಎಂದು ತೋರಿಸುವಂಥ ಪಾತ್ರವದು. ನೈಜ ಎನಿಸುವಂಥ ಒಂದಷ್ಟು ಹುಡುಗಿಯರ ಜೀವನದಲ್ಲಿ ನಡೆದ ಘಟನೆಗಳನ್ನು ಈ ಪಾತ್ರಕ್ಕಾಗಿ ಬಳಸಿಕೊಂಡಿದ್ದಾರೆ. ಹಾಗಾಗಿಯೇ ರಿಯಲಿಸ್ಟಿಕ್‌ ಆಗಿ ಪಾತ್ರವನ್ನು ಕಟ್ಟಿಕೊಟ್ಟಿದ್ದೇನೆ' ಅಂತಾರೆ ನಿರ್ದೇಶಕ ಪ್ರಶಾಂತ್‌ ರಾಜ್‌.

ಈ ಹಿಂದೆ ಪುನೀತ್‌ ರಾಜ್‌ಕುಮಾರ್‌ ಜತೆ ನಟಿಸಿದ್ದ ಪ್ರಿಯಾ ಈಗ ಮತ್ತೆ ಕನ್ನಡ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ. ಆರೇಂಜ್‌ ಸಿನಿಮಾ ಒಪ್ಪಿಕೊಳ್ಳಲು ಕಾರಣ ಚಿತ್ರದ ಕಥೆಯಂತೆ. ಫ್ರೆಶ್‌ ಅನಿಸುವಂಥ ಕಥೆಯನ್ನು ಪ್ರಶಾಂತ್‌ ರಾಜ್‌ ಬರೆದಿದ್ದಾರೆ. ಹಾಗಾಗಿಯೇ ಈ ಪಾತ್ರವನ್ನು ಅವರು ಒಪ್ಪಿಕೊಂಡಿದ್ದಾರಂತೆ.