ಪ್ರಿಯಾ ಪ್ರಕಾಶ್‌ ಕಣ್ಸನ್ನೆಗೆ ಇನ್ನೊಂದು ವಿಘ್ನ

ಭಾರತದ ನ್ಯೂ ಕ್ರಷ್ ಎನ್ನಿಸಿಕೊಂಡ ಮಲಯಾಳಂ ನಟಿ ಪ್ರಿಯಾ ಪ್ರಕಾಶ್ ವಾರಿಯರ್ ಅಭಿನಯದ 'ಒರು ಅಡಾರ್ ಲವ್' ಸಿನಿಮಾಗೆ ಮತ್ತೊಂದು ಸಂಕಷ್ಟ ಎದುರಾಗಿದೆ. ಇತ್ತೀಚೆಗೆ ಈ ಸಿನಿಮಾ ವಿರುದ್ಧ ಹೈದರಾಬಾದಿನ ಇಬ್ಬರು ನಿವಾಸಿಗಳು ಸುಪ್ರೀಂಕೋರ್ಟ್ ಮೆಟ್ಟಿಲೇರಿದ್ದಾರೆ.

ಈ ಚಿತ್ರದಲ್ಲಿನ 'ಮಾಣಿಕ್ಯ ಮಲರಾಯಿ ಪೂವಿ' ಹಾಡನ್ನು ತೆಗೆಯಬೇಕೆಂದು ಕೋರ್ಟ್‍ನಲ್ಲಿ ಅರ್ಜಿ ಸಲ್ಲಿಸಿದ್ದಾರೆ. ಪವಿತ್ರವಾದ ಹಾಡಿನಲ್ಲಿ ಕಣ್ಣು ಮಿಟಿಕಿಸಿ ಚಿತ್ರೀಕರಿಸಿರುವುದು 'ದೈವನಿಂದನೆ'ಯಂತಹದ್ದು ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.

ಮಾಣಿಕ್ಯ ಮಲರಾಯಿ ಪೂವಿ ಹಾಡಿನ ವೀಡಿಯೋ ಕೆಲವು ದಿನಗಳ ಹಿಂದೆ ಅಂತರ್ಜಾಲದಲ್ಲಿ ಬಿಡುಗಡೆಯಾಗಿತ್ತು. ಆ ಹಾಡಿನಲ್ಲಿ ಪ್ರಿಯಾ ಪ್ರಕಾಶ್ ವಾರಿಯರ್ ತನ್ನ ಬಾಯ್‌ಫ್ರೆಂಡ್ ಕಡೆಗೆ ನೋಡುತ್ತಾ ಕಣ್ಸನ್ನೆ ಮಾಡುವ ದೃಶ್ಯಗಳು ವೈರಲ್ ಆಗಿದ್ದವು.

ಈ ವೀಡಿಯೋ ಬಗ್ಗೆ ಹಲವು ಮುಸ್ಲಿಂ ಸಂಘಟನೆಗಳು ಆಕ್ಷೇಪ ವ್ಯಕ್ತಪಡಿಸಿದ್ದವು. ಇವು ಮುಸ್ಲಿಮ್ ಭಾವನೆಗಳಿಗೆ ನೋವುಂಟು ಮಾಡುವಂತಿವೆ ಎಂದಿದ್ದರು. ಮಹಮ್ಮದ್ ಪ್ರವಕ್ತರಾದ ಪತ್ನಿ ಖದೀಜಾ ಬೀವಿ ಅವರನ್ನು ಪ್ರಶಂಸಿಸುತ್ತಾ ಬರೆದ ಹಾಡನ್ನೂ ಸಿನಿಮಾದಲ್ಲಿ ಬಳಸಿಕೊಂಡು, ಆಕ್ಷೇಪಾರ್ಹ ದೃಶ್ಯಗಳನ್ನು ಚಿತ್ರೀಕರಿಸಿದ್ದಾರೆಂದು ಪ್ರಕರಣ ದಾಖಲಿಸಿದ್ದರು.

ಮೂವತ್ತು ಸೆಕೆಂಡ್ ಕಾಲಾವಧಿಯ ವೀಡಿಯೋದಲ್ಲಿ ಪಾಠಶಾಲಾ ವಿದ್ಯಾರ್ಥಿನಿ, ವಿದ್ಯಾರ್ಥಿಯೊಬ್ಬನ ಕಡೆಗೆ ನಗುತ್ತಾ ಕಣ್ಣು ಮೀಟುತ್ತಾ, ಕಣ್ಸನ್ನೆ ಮಾಡುವುದನ್ನು ತೋರಿಸಿದ್ದಾರೆ. ಈ ರೀತಿ ಕಣ್ಣು ಹೊಡೆಯುವುದು ಇಸ್ಲಾಂನಲ್ಲಿ ನಿಷೇಧ. ಮಹಮ್ಮದ್ ಪ್ರವಕ್ತರು ಪತ್ನಿಯನ್ನು ಪ್ರಶಂಸಿಸುತ್ತಾ ಬರೆದ ಪವಿತ್ರವಾದ ಹಾಡಿನಲ್ಲಿ ಈ ರೀತಿ ಕಣ್ಣು ಹೊಡೆಯುವ ಸನ್ನಿವೇಶ ಇರುವುದು ದೈವನಿಂದನೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ. ದೂರುದಾರರಲ್ಲಿ ಒಬ್ಬರು ಈಗಾಗಲೆ ಸಿನಿಮಾ ನಿರ್ದೇಶಕ ಒಮರ್ ಲುಲು ವಿರುದ್ಧ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಿಸಿದ್ದಾರೆ.