ಪ್ರಿಯಾಮಣಿ ರಿಜಿಸ್ಟರ್‌ ಮ್ಯಾರೇಜ್‌!

ಬಹುಭಾಷಾ ನಟಿ ಪ್ರಿಯಾಮಣಿ-ಮುಸ್ತಫಾ ರಾಜ್‌ ಅವರ ನಿಶ್ಚಿತಾರ್ಥವಾಗಿ ಒಂದು ವರ್ಷಕ್ಕೂ ಹೆಚ್ಚು ಸಮಯವಾಗಿದೆ. ಇನ್ನು ಪ್ರಿಯಾಮಣಿ ಮದುವೆಗಾಗಿ ಎದುರು ನೋಡುತ್ತಿದ್ದ ಅಭಿಮಾನಿಗಳಿಗೆ ಶುಭ ಸುದ್ದಿಯೊಂದು ಬಂದಿದೆ.

ಹೌದು, ಪ್ರಿಯಾಮಣಿ-ಮುಸ್ತಫಾ ಮದುವೆ ದಿನಾಂಕ ನಿಕ್ಕಿಯಾಗಿದೆ. ಆಗಸ್ಟ್‌ 23 ಕ್ಕೆ ದಾಂಪತ್ಯ ಜೀವನಕ್ಕೆ ಕಾಲಿಡಲಿದ್ದಾರೆ 'ರಾಮ್‌' ಚಿತ್ರದ ಬೆಡಗಿ. ವಿಶೇಷ ಏನಪ್ಪಾ ಅಂದ್ರೆ ಬೇರೆ ತಾರೆಯರಂತೆ ಅದ್ಧೂರಿತನ ಬಿಟ್ಟು ಸಿಂಪಲ್ ಆಗಿ ರಿಜಿಸ್ಟರ್ ಮ್ಯಾರೇಜ್‌ ಆಗಲು ತೀರ್ಮಾನಿಸಿದ್ದಾರೆ.

ಮರುದಿನ ಆಗಸ್ಟ್‌ 24ರಂದು ಬೆಂಗಳೂರಿನ ಪಂಚತಾರಾ ಹೋಟೆಲ್‌ವೊಂದರಲ್ಲಿ ಆರತಕ್ಷತೆ ಜರುಗಲಿದೆ. ಸಿನಿ ಲೋಕದ ಆಪ್ತರು, ಸ್ನೇಹಿತರು ಮತ್ತು ಕುಟುಂಬವರ್ಗ ಈ ಆರತಕ್ಷತೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂಬ ಮಾಹಿತಿ ದೊರೆತಿದೆ.

ಕಳೆದ ವರ್ಷ ಮೇ ತಿಂಗಳಲ್ಲಿ ಪ್ರಿಯಾಮಣಿ ತಮ್ಮ ಬಹುಕಾಲದ ಸ್ನೇಹಿತ ಮುಸ್ತಫಾ ರಾಜ್‌ ಜತೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು.