- ಶರಣು ಹುಲ್ಲೂರು
ಪುನೀತ್‌ ರಾಜ್‌ಕುಮಾರ್‌ ಇದೇ ಮೊದಲ ಬಾರಿಗೆ ನಿರ್ಮಾಣದ ಜತೆಗೆ ನಾಯಕರಾಗಿಯೂ ನಟಿಸುತ್ತಿದ್ದಾರೆ. ಇವರ ಬ್ಯಾನರ್‌ನಲ್ಲಿ ನಿರ್ಮಾಣವಾಗಲಿರುವ ಚಿತ್ರಕ್ಕೆ ಶಶಾಂಕ್‌ ನಿರ್ದೇಶಕ ಅನ್ನುವುದು ವಿಶೇಷ. 'ಮುಂಗಾರು ಮಳೆ -2' ಚಿತ್ರದ ನಂತರ ಶಶಾಂಕ್‌ ಯಾವ ರೀತಿಯ ಕತೆಯನ್ನು ಕೈಗೆತ್ತಿಕೊಳ್ಳಲಿದ್ದಾರೆಂಬ ಕುತೂಹಲ ಪ್ರೇಕ್ಷಕರದ್ದಾಗಿತ್ತು. ಅದಕ್ಕೀಗ ಉತ್ತರ ಸಿಕ್ಕಿದೆ. ನಿರ್ದೇಶಕರು ಈ ಬಾರಿ ಕೌಟುಂಬಿಕ ಹಿನ್ನೆಲೆಯ ಕತೆಯನ್ನು ಪುನೀತ್‌ಗಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ.
'ಪುನೀತ್‌ ಅವರಿಗಾಗಿ ಸಿನಿಮಾ ಮಾಡಬೇಕು ಅಂತ ತುಂಬಾ ದಿನಗಳಿಂದ ಮಾತುಕತೆ ನಡೆದಿತ್ತು. ಅಂದುಕೊಂಡಂತೆ ಆಗಿದ್ದರೆ ಕೃಷ್ಣಲೀಲಾ ಸಿನಿಮಾದ ನಂತರ ಅವರಿಗಾಗಿ ಸಿನಿಮಾ ಮಾಡಬೇಕಿತ್ತು. ಮುಂಗಾರು ಮಳೆ 2 ಕಾರಣದಿಂದಾಗಿ ಆಗಲಿಲ್ಲ. ಈಗ ಅದಕ್ಕೆ ಕಾಲ ಕೂಡಿ ಬಂದಿದೆ. ನಾನು ಹೇಳಿದ ಕತೆಯು ಪುನೀತ್‌ ಅವರಿಗೆ ಇಷ್ಟವಾದ ಕಾರಣಕ್ಕಾಗಿ, ಅವರೇ ನಿರ್ಮಾಣ ಮಾಡುವುದಾಗಿ ಹೇಳಿದ್ದಾರೆ. ಮುಂದಿನ ದಿನಗಳಲ್ಲಿ ಸಿನಿಮಾದ ಬಗ್ಗೆ ಹೆಚ್ಚಿನ ಮಾಹಿತಿ ನೀಡುವೆ' ಅಂತಾರೆ ನಿರ್ದೇಶಕರು.
ಹಾಗಂತ ಸದ್ಯಕ್ಕೆ ಈ ಸಿನಿಮಾ ಸೆಟ್ಟೇರುತ್ತಿಲ್ಲ. ಕತೆ ಮಾತ್ರ ಆಯ್ಕೆಯಾಗಿದ್ದು, ಜನವರಿಯಲ್ಲಿ ಶೂಟಿಂಗ್‌ ಶುರು ಮಾಡುವ ಪ್ಲಾನ್‌ ಶಶಾಂಕ್‌ ಅವರದ್ದು. ಇದೊಂದು ಭಾರೀ ಬಜೆಟ್‌ನ ಸಿನಿಮಾವಾಗಿದ್ದರಿಂದ ಹೆಸರಾಂತ ಕಲಾವಿದರು ಮತ್ತು ತಂತ್ರಜ್ಞರು ಈ ಚಿತ್ರಕ್ಕಾಗಿ ಕೆಲಸ ಮಾಡಲಿದ್ದಾರೆ.
'ಪುನೀತ್‌ ಬ್ಯಾನರ್‌ನ ಸಿನಿಮಾವೆಂದರೆ ಅಲ್ಲೊಂದು ಕುತೂಹಲ ಇದ್ದೇ ಇರುತ್ತದೆ. ಅದು ವಿಭಿನ್ನವೂ ಆಗಿರಬೇಕಾಗುತ್ತದೆ. ಹಾಗಾಗಿ ಶೂಟಿಂಗ್‌ಗೂ ಮುನ್ನ ಹೆಚ್ಚಿನ ಕೆಲಸ ಮಾಡಬೇಕಾಗುತ್ತದೆ. ಸದ್ಯಕ್ಕೆ ಕತೆ, ನಿರ್ದೇಶಕರು ಮತ್ತು ಹೀರೋ ಮಾತ್ರ ಆಯ್ಕೆಯಾಗಿದ್ದಾರೆ. ಮುಂದಿನ ದಿನಗಳಲ್ಲಿ ಉಳಿದ ಮಾಹಿತಿ ನೀಡುತ್ತೇವೆ' ಅನ್ನುವುದು ಶಶಾಂಕ್‌ ಮಾತು.
ಈಗಾಗಲೇ ಪುನೀತ್‌ ಬ್ಯಾನರ್‌ನಲ್ಲಿ ಒಂದು ಸಿನಿಮಾ ಅನೌನ್ಸ್‌ ಆಗಿದೆ. ಈ ಚಿತ್ರವನ್ನು ಗೋಧಿ ಬಣ್ಣ ಸಾಧಾರಣ ಮೈಕಟ್ಟು ಸಿನಿಮಾದ ನಿರ್ದೇಶಕ ಹೇಮಂತ್‌ ನಿರ್ದೇಶನ ಮಾಡಲಿದ್ದಾರೆ. ಇಲ್ಲಿ ಪುನೀತ್‌ ಕೇವಲ ನಿರ್ಮಾಪಕ. ಆದರೆ, ಶಶಾಂಕ್‌ ಸಿನಿಮಾದಲ್ಲಿ ನಿರ್ಮಾಣದ ಜತೆಗೆ ನಾಯಕನಾಗಿಯೂ ನಟಿಸುತ್ತಿರುವುದು ವಿಶೇಷ.
-----------
--
ಪುನೀತ್‌ ನಿರ್ಮಾಣದ ಸಿನಿಮಾವೆಂದರೆ ಅಲ್ಲೊಂದು ವಿಶೇಷತೆ ಇರಲೇಬೇಕು. ಅಲ್ಲದೇ ಅವರ ಬ್ಯಾನರ್‌ನಲ್ಲಿ ಯಾವ ರೀತಿಯ ಸಿನಿಮಾ ಮಾಡಬೇಕು ಅನ್ನುವ ಸ್ಪಷ್ಟತೆ ನನಗಿದೆ. ಹಾಗಾಗಿ ಕೌಟುಂಬಿಕ ಹಿನ್ನೆಲೆಯ ಕತೆಯನ್ನು ಆಯ್ಕೆ ಮಾಡಿಕೊಂಡಿದ್ದೇನೆ.
- ಶಶಾಂಕ್‌, ನಿರ್ದೇಶಕ
------------
ಶಶಾಂಕ್‌ ಜತೆ ಸಿನಿಮಾ ಮಾಡಬೇಕು ಅನ್ನುವ ಯೋಚನೆ ತುಂಬಾ ದಿನಗಳಿಂದಲೂ ಇತ್ತು. ಈಗದು ಈಡೇರುತ್ತಿದೆ. ನಿರ್ದೇಶಕರು ಮಾಡಿಕೊಂಡಿರುವ ಕತೆ ಚೆನ್ನಾಗಿದೆ.
- ಪುನೀತ್‌ ರಾಜ್‌ಕುಮಾರ್‌, ನಟ