ಪ್ರೀಮಿಯರ್‌ ಪದ್ಮಿನಿ ಮೆಚ್ಚಿದ ಪವರ್ ಸ್ಟಾರ್ ಪುನೀತ್

* ಶರಣು ಹುಲ್ಲೂರು

Vijaya Karnataka Web

ಹಿರಿಯ ನಟ ಜಗ್ಗೇಶ್‌, ರೋಜಾ ಚಿತ್ರದ ಖ್ಯಾತಿಯ ಮಧು, ಸುಧಾರಾಣಿ ಹೀಗೆ ಅನುಭವಿ ಕಲಾವಿದರೇ ನಟಿಸಿರುವ ಪ್ರೀಮಿಯರ್‌ ಪದ್ಮಿನಿ ಚಿತ್ರದ ಟ್ರೇಲರ್‌ ನೋಡಿರುವ ನಟ ಪುನೀತ್‌ ರಾಜ್‌ಕುಮಾರ್‌, ಪ್ರೇಕ್ಷಕರನ್ನು ಸೆಳೆಯುವಂಥ ಎಲ್ಲ ಅಂಶಗಳು ಸಿನಿಮಾದಲ್ಲಿವೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಟ್ರೇಲರ್‌ ಸೋಶಿಯಲ್‌ ಮೀಡಿಯಾದಲ್ಲಿ ಟ್ರೇಂಡ್‌ ಕ್ರಿಯೇಟ್‌ ಮಾಡಿದ್ದು, ಸ್ಯಾಂಡಲ್‌ವುಡ್‌ನ ಬಹುತೇಕ ನಿರ್ದೇಶಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. 'ಕನ್ನಡದಲ್ಲಿ ಹೊಸ ಬಗೆಯ ಸಿನಿಮಾಗಳು ರಿಲೀಸ್‌ ಆಗುತ್ತಿವೆ. ತಮ್ಮದೇ ಆದ ಕಾರಣದಿಂದಾಗಿ ಅವುಗಳು ಪ್ರೇಕ್ಷಕರನ್ನು ಸೆಳೆಯುತ್ತಿವೆ. ಪ್ರೀಮಿಯರ್‌ ಪದ್ಮಿನಿ ಸಿನಿಮಾ ಕೂಡ ಆ ಸಾಲಿನಲ್ಲಿ ಸೇರಲಿದೆ ಎಂಬ ನಂಬಿಕೆ ನನ್ನದು' ಎಂದಿದ್ದಾರೆ ಪುನೀತ್‌.

'ಸಣ್ಣ ಪುಟ್ಟ ವಿಷಯಗಳಿಗೆಲ್ಲ ಡಿವೋರ್ಸ್‌ ತಗೆದುಕೊಳ್ಳುವಷ್ಟು ಮಾನವ ಸಂಬಂಧಗಳು ಶೀಥಲಗೊಂಡಿವೆ. ಮನುಷ್ಯ ವಿಶಾಲವಾಗಿ ಯೋಚಿಸುವುದನ್ನು ಮರೆತಿದ್ದಾನೆ. ಸಂಕೀರ್ಣಗೊಂಡ ಕುಟುಂಬ ವ್ಯವಸ್ಥೆಯನ್ನು ಬೇರೆ ದೃಷ್ಟಿಕೋನದಿಂದ ನೋಡುವ ಸಿನಿಮಾ ಇದಾಗಿದೆ. ಈ ವಿಷಯವನ್ನು ನಗಿಸುತ್ತಲೇ, ಭಾವುಕ ಪ್ರಪಂಚಕ್ಕೆ ಕರೆದುಕೊಂಡು ಹೋಗುತ್ತೇವೆ. ಈ ಎಲ್ಲ ಅಂಶಗಳನ್ನು ಪುನೀತ್‌ ಮೆಚ್ಚಿದ್ದಾರೆ' ಎನ್ನುತ್ತಾರೆ ನಿರ್ದೇಶಕ ರಮೇಶ್‌.

ಹಿರಿಯ ಮತ್ತು ಕಿರಿಯ ಕಲಾವಿದರ ಸಂಗಮವೇ ಸಿನಿಮಾದಲ್ಲಿದ್ದು, ಎರಡು ತಲೆಮಾರಿನ ಕಥೆ ಕೂಡ ಈ ಚಿತ್ರದಲ್ಲಿದೆ. ಈಗಾಗಲೇ ಹಾಡುಗಳು ಮತ್ತು ಟ್ರೇಲರ್‌ಗೆ ಅತ್ಯುತ್ತಮ ಪ್ರತಿಕ್ರಿಯೆ ಬಂದಿದೆ. ಜಗ್ಗೇಶ್‌ ಈ ಸಿನಿಮಾದಲ್ಲಿ ಕಾರು ಮಾಲೀಕರಾಗಿ ನಟಿಸಿದ್ದು, ಪ್ರಮೋದ್‌ ಡ್ರೈವರ್‌ ಪಾತ್ರ ಮಾಡಿದ್ದಾರೆ. ಕಿರುತೆರೆ ನಟಿ, ನಿರ್ಮಾಪಕಿ ಶ್ರುತಿ ನಾಯ್ಡು ಮೊದಲ ಬಾರಿಗೆ ಕನ್ನಡ ಸಿನಿಮಾ ನಿರ್ಮಿಸಿದ್ದಾರೆ.

ಅನುಭವಿ ಕಲಾವಿದರ ಜತೆಗೆ ಹೊಸ ಕಲಾವಿದರು ಪ್ರೀಮಿಯರ್‌ ಪದ್ಮಿನಿ ಸಿನಿಮಾದಲ್ಲಿ ನಟಿಸಿದ್ದಾರೆ. ಟ್ರೇಲರ್‌ ಕೂಡ ಪ್ರಾಮೀಸಿಂಗ್‌ ಆಗಿದೆ. ನಿಜಕ್ಕೂ ನನಗೆ ಇಷ್ಟವಾಯಿತು.

- ಪುನೀತ್‌ ರಾಜ್‌ಕುಮಾರ್‌, ನಟ