ಟ್ರೇಲರ್‌ನಲ್ಲಿ 'ರಾಜಕುಮಾರ'ನ ದರ್ಬಾರ್‌

ಪವರ್‌ ಸ್ಟಾರ್‌ ಪುನೀತ್‌ ರಾಜ್‌ಕುಮಾರ್ ಅಭಿನಯದ ಈ ವರ್ಷದ ಬಹುನಿರೀಕ್ಷಿತ ಚಿತ್ರ 'ರಾಜಕುಮಾರ'. ಸದ್ಯ ರಾಜಕುಮಾರ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದ್ದು ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೆಂಡಿಂಗ್‌ ಆಗಿದೆ.

ಈಗಾಗಲೇ 2 ವಿಭಿನ್ನ ಟೀಸರ್‌ ಮೂಲಕ ಗಮನ ಸೆಳೆದಿದ್ದ 'ರಾಜಕುಮಾರ', ಇದೀಗ ಟ್ರೇಲರ್‌ ಮೂಲಕ ಚಿತ್ರದ ಬಗ್ಗೆ ಮತ್ತಷ್ಟು ನಿರೀಕ್ಷೆ ಮೂಡುವಂತೆ ಮಾಡಿದೆ. ಈ ಚಿತ್ರದಲ್ಲಿ ಪುನೀತ್‌ ರಾಜ್‌ಕುಮಾರ್‌ ಎಂದಿನಂತೆ ಸಖತ್ತಾಗಿ ಮಿಂಚಿದ್ದಾರೆ. ಕ್ಲಾಸ್‌ ಮತ್ತು ಮಾಸ್‌ ಲುಕ್‌ನಲ್ಲಿ ಕಂಗೊಳಿಸಿರುವ ಪುನೀತ್‌, ಡೈಲಾಗ್‌, ಡ್ಯಾನ್ಸ್‌ ಹಾಗೂ ಫೈಟ್‌ಗಳನ್ನ ಸಲೀಸಾಗಿ ನಿಭಾಯಿಸಿದ್ದಾರೆ.

ರಾಕಿಂಗ್‌ ಸ್ಟಾರ್‌ ಯಶ್‌ ಅಭಿನಯದ 'ಮಿಸ್ಟರ್‌ ಅಂಡ್‌ ಮಿಸಸ್‌ ರಾಮಾಚಾರಿ' ಚಿತ್ರವನ್ನು ನಿರ್ದೇಶಿಸಿದ್ದ ಸಂತೋಷ್‌ ಆನಂದ್‌ರಾಮ್‌, 'ರಾಜಕುಮಾರ' ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಇನ್ನು ದಕ್ಷಿಣ ಭಾರತ ಚಿತ್ರರಂಗದ ಸುಂದರಿ ಪ್ರಿಯಾ ಆನಂದ್‌ ಇದೇ ಮೊದಲ ಬಾರಿಗೆ ಸ್ಯಾಂಡಲ್‌ವುಡ್‌ ಪ್ರವೇಶಿಸಿದ್ದು, ಪುನೀತ್‌ಗೆ ನಾಯಕಿಯಾಗಿದ್ದಾರೆ. ಚಿತ್ರಕ್ಕೆ ಹರಿಕೃಷ್ಣ ಸಂಗೀತ ನೀಡಿದ್ದಾರೆ. ಚಿತ್ರದ ತಾರಾಗಣದಲ್ಲಿ ಸಾಧು ಕೋಕಿಲ, ರಂಗಾಯಣ ರಘು, ಚಿಕ್ಕಣ್ಣ, ಪ್ರಕಾಶ್‌ ರೈ, ದತ್ತಣ್ಣ ಹಾಗೂ ಇನ್ನಿತರರು ಅಭಿನಯಿಸಿದ್ದಾರೆ.



ಗಾಂಧಿನಗರದಲ್ಲಿ ಸಖತ್‌ ಟಾಕ್‌ ಕ್ರಿಯೇಟ್‌ ಮಾಡಿರೋ 'ರಾಜಕುಮಾರ' ಚಿತ್ರದ ಟ್ರೇಲರ್‌ನ್ನ ನೀವೂ ನೋಡಿ ಎಂಜಾಯ್‌ ಮಾಡಿ.