ವೆಬ್‌ ಸೀರಿಸ್‌ ಮಾಡ್ತಾರೆ ಪುನೀತ್‌

ವೆಬ್‌ ಸೀರಿಸ್‌ ಮೇನಿಯಾ ಕನ್ನಡದಲ್ಲಿಯೂ ಹೆಚ್ಚುತ್ತಿದ್ದು, ಈಗ ಪುನೀತ್‌ ರಾಜ್‌ಕುಮಾರ್‌ ಕೂಡ ವೆಬ್‌ ಸೀರಿಸ್‌ ನಿರ್ಮಾಣಕ್ಕೆ ಮುಂದಾಗಿದ್ದಾರೆ.

ಕಳೆದ ವರ್ಷ ಶಿವರಾಜ್‌ ಕುಮಾರ್‌ ಅವರು ವೆಬ್‌ ಸೀರಿಸ್‌ ನಿರ್ಮಾಣಕ್ಕೆ ಇಳಿದಿದ್ದರು. ಈಗ ಅವರ ಸಹೋದರ ಪುನೀತ್‌ ಸರದಿ. ಪುನೀತ್‌ ಈಗಾಗಲೇ ತಮ್ಮ ನಿರ್ಮಾಣ ಸಂಸ್ಥೆಯಿಂದ ಹೊಸ ರೀತಿಯ ಕಥೆಗಳಿಗೆ ಅವಕಾಶ ನೀಡಿದ್ದು, ನಾಲ್ಕು ಸಿನಿಮಾಗಳು ಒಟ್ಟಾಗಿ ನಿರ್ಮಾಣವಾಗುತ್ತಿವೆ.

'ಸಿನಿಮಾ ಮತ್ತು ಕ್ರಿಯೇಟಿವ್‌ ಕೆಲಸಗಳು ನನಗೆ ಫ್ಯಾಷನ್‌. ನನ್ನ ಅಣ್ಣನ ಮಗಳು ನಿವೇದಿತಾ ವೆಬ್‌ ಸೀರಿಸ್‌ ಮಾಡ್ತಾ ಇದ್ದಾಳೆ. ನನಗೆ ಬಹಳ ಖುಷಿ ಇದೆ. ವೆಬ್‌ ಸೀರಿಸ್‌ ಹೊಸ ಟ್ರೆಂಡ್‌ ಹುಟ್ಟುಹಾಕುತ್ತಿದೆ. ನಾನು ಸಾಕಷ್ಟು ವೆಬ್‌ ಸೀರಿಸ್‌ಗಳನ್ನು ನೋಡುತ್ತಿರುತ್ತೇನೆ. ಈಗಾಗಲೇ ನಾಲ್ಕು ಸಿನಿಮಾಗಳನ್ನು ನಿರ್ಮಾಣ ಮಾಡುತ್ತಿದ್ದೇನೆ. ಅದರಲ್ಲಿ ಒಂದು ಬಿಡುಗಡೆಗೆ ಸಿದ್ಧವಾಗಿದೆ. ಮುಂದಿನ ದಿನಗಳಲ್ಲಿ ವೆಬ್‌ ಸೀರಿಸ್‌ ಸಹ ಮಾಡುವ ಯೋಚನೆ ಮಾಡಿದ್ದೇನೆ. ಈಗಾಗಲೇ ಚರ್ಚೆಗಳು ನಡೆದಿವೆ'ಎಂದು ಪುನೀತ್‌ ತಿಳಿಸಿದ್ದಾರೆ.

ಇತ್ತೀಚಿಗಷ್ಟೆ ಉಪೇಂದ್ರ ಕೂಡ ವೆಬ್‌ ಸೀರಿಸ್‌ ಲೋಕಕ್ಕೆ ಎಂಟ್ರಿ ಕೊಟ್ಟಿದ್ದಾರೆ. ವಿನಾಯಕ್‌ ಜೋಷಿ ನಿರ್ದೇಶನದ ಜೋಷಿಲೆ ಎಂಬ ಸೀರಿಸ್‌ನಲ್ಲಿ ಅವರು ನಟಿಸುತ್ತಿದ್ದಾರೆ. ಅಂಬಿ ನಿಂಗೆ ವಯಸ್ಸಾಯ್ತೋ ಸಿನಿಮಾದ ನಿರ್ದೇಶಕ ಗುರುದತ್‌ ಗಾಣಿಗ ಸಹ ವೆಬ್‌ ಸೀರಿಸ್‌ ನಿರ್ದೇಶನಕ್ಕೆ ತಯಾರಿ ಮಾಡಿಕೊಳ್ಳುತ್ತಿದ್ದಾರೆ. ಒಟ್ಟಾರೆ ಕನ್ನಡದಲ್ಲಿ ವೆಬ್‌ ಸೀರಿಸ್‌ಗಳಣ್ನು ನೋಡುವ ಸಮಯ ಬರುತ್ತಿದೆ.