ಪುನೀತ್‌ ಕಂಠದಲ್ಲಿ ರೊಟ್ಟಿ ಹಾಡು

ಇತ್ತೀಚೆಗೆ ರ‍್ಯಾಂಬೋ 2 ಚಿತ್ರದಲ್ಲಿ ಉತ್ತರ ಕರ್ನಾಟಕದ ಶೈಲಿಯ ಹಾಡು ಹಿಟ್‌ ಆಗಿತ್ತು. ಈಗ ಇನ್ನೊಂದು ಇದೇ ಭಾಷಾ ಸೊಗಡಿನ ಹಾಡನ್ನು ಪುನೀತ್‌ ಮಟಾಶ್‌ ಚಿತ್ರಕ್ಕಾಗಿ ಹಾಡಿದ್ದಾರೆ.

==

ಪುನೀತ್‌ ಕಂಠದಲ್ಲಿ ಉತ್ತರ ಕರ್ನಾಟಕದ ಹಾಡು ಕೇಳಲು ಸಿದ್ಧರಾಗಿ. ಯಾಕೆಂದರೆ, ಮಟಾಶ್‌ ಚಿತ್ರಕ್ಕಾಗಿ ಪುನೀತ್‌ ಮೊದಲ ಬಾರಿಗೆ ಉತ್ತರ ಕರ್ನಾಟಕದ ಶೈಲಿಯ ಕನ್ನಡ ಹಾಡನ್ನು ಹಾಡಿದ್ದಾರೆ.

ಅರವಿಂದ್‌ ನಿರ್ದೇಶನದ ಚಿತ್ರ ಮಟಾಶ್‌. ಲಾಸ್ಟ್‌ ಬಸ್‌ ಚಿತ್ರದ ನಂತರ ಮಟಾಶ್‌ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಕಾಮಿಡಿ ಥ್ರಿಲ್ಲರ್‌ ಚಿತ್ರದಲ್ಲಿ ಬಿಜಾಪುರದ ಒಂದು ಹಾಡಿದೆ. ಇದನ್ನು ಅಲ್ಲಿಯವರೇ ಆದ ಸುನಿಲ್‌ ಕುಮಾರ್‌ ಸುಧಾಕರ್‌.

ಹಾಡಿಗೆ ಸಂಗೀತ ಸಂಯೋಜನೆ ಮಾಡಿದ್ದಾರೆ ನಿರ್ದೇಶಕ ಅರವಿಂದ್‌. 'ಬಿಜಾಪುರ ಕಡೆಯ ಕನ್ನಡ ಭಾಷೆ ಒಂದು ರೀತಿಯಲ್ಲಿ ಟಂಗ್‌ ಟ್ವಿಸ್ಟ್‌ರ್‌ ತರ ಇರುತ್ತೆ. ಜನಪದ ಮತ್ತು ಮಾಡರ್ನ್‌ ಸ್ಟೈಲ್‌ ಎರಡೂ ಬ್ಲೆಂಡ್‌ ಆದ ಹಾಡು. ಪುನೀತ್‌ ಈ ಹಾಡನ್ನು ತುಂಬಾ ಚೆನ್ನಾಗಿ ಹಾಡಿದ್ದಾರೆ. ಬಹಳ ಎಂಜಾಯ್‌ ಮಾಡಿದರು' ಎಂದಿದ್ದಾರೆ ಅರವಿಂದ್‌. ಪುನೀತ್‌ ಹಾಡುಗಳು ಜನಪ್ರಿಯವಾಗಿವೆ. ಈಗ ಉತ್ತರ ಕರ್ನಾಟಕದ ಕನ್ನಡದಲ್ಲಿ ಹಾಡಿರುವುದು ಇನ್ನಷ್ಟು ಕುತೂಹಲ ಕೆರಳಿಸಿದೆ.

ಸ್ವತಃ ಸಂಗೀತ ಸಂಯೋಜಕರೂ ಆಗಿರುವ ಅರವಿಂದ್‌ ಲಾಸ್ಟ್‌ ಬಸ್‌ ಚಿತ್ರಕ್ಕೂ ಸಂಗೀತ ಸಂಯೋಜನೆ ಮಾಡಿದ್ದರು, ಅಲ್ಲದೆ, ಕೆ.ವೈ. ನಾರಾಯಣ ಸ್ವಾಮಿ ಬರೆದ ಹಾಡುಗಳ ಕೈಲ್ಯಾಂಪ್‌ ಎಂಬ ಆಲ್ಬಂ ಹೊರತಂದಿದ್ದರು. ಚಿತ್ರದಲ್ಲಿ ಐಶ್ವರ್ಯಾ ಸಿಂಧೋಗಿ ನಾಯಕಿ. ಮಮ್ಮಿ ಚಿತ್ರದಲ್ಲಿ ಪ್ರಿಯಾಂಕಾ ಉಪೇಂದ್ರ ಜತೆ ನಟಿಸಿದ್ದ ಐಶ್ವರ್ಯಾ ತಮ್ಮ ನಟನೆಯಿಂದ ಗಮನ ಸೆಳೆದಿದ್ದರು. ನಾಯಕ ನಟ ಸಮರ್ಥ್‌ ಲಾಸ್ಟ್‌ ಬಸ್‌ನಲ್ಲಿ ಉತ್ತಮವಾಗಿ ನಟಿಸಿದ್ದರು.

ಚಿತ್ರದಲ್ಲಿ ಡಿಮಾನಟೈಸೇಷನ್‌ ಸಂದರ್ಭದಲ್ಲಿ ಅದಕ್ಕೆ ಸಂಬಂಧಪಟ್ಟಂತೆ ನಡೆದ ವಿದ್ಯಾಮಾನಗಳನ್ನು ಇಟ್ಟುಕೊಂಡು ಸಿನಿಮಾ ಮಾಡಲಾಗಿದೆ. 'ನೋಟು ಬ್ಯಾನ್‌ ಆದಾಗ ನವೆಂಬರ್‌ ಮತ್ತು ಡಿಸೆಂಬರ್‌ನಲ್ಲಿ ನಡೆಯುವ ಕತೆಯನ್ನು ತಮಾಷೆಯಾಗಿ ತೋರಿಸಿದ್ದೇವೆ. ಡಿಮಾನಿಟೈಸೇಷನ್‌ ಹಿನ್ನೆಲೆಯಲ್ಲಿ ನಡೆಯುವ ಕತೆ ಇದೆ' ಎನ್ನುತ್ತಾರೆ ಅರವಿಂದ್‌. ರವಿಕಿರಣ್‌, ವಿ. ಮನೋಹರ್‌, ನಂದಗೋಪಾಲ್‌, ನಾಗೇಂದ್ರ ಶಾ ಮತ್ತಿತರರು ನಟಿಸಿದ್ದಾರೆ.