ಬಿಟ್ಹಾಕ್ರಿ ಡಿಪ್ರೆಷನ್‌ ಅಂತ ಧೂಳೆಬ್ಬಿಸಿದ ರಚಿತಾ

ಪದ್ಮಾ ಶಿವಮೊಗ್ಗ

ಬಹುತೇಕ ಕನ್ನಡ ಚಿತ್ರರಂಗದಲ್ಲಿ ನಾಯಕಿಯಾಗಿಯೇ ಸೆಟಲ್‌ ಆಗಿದ್ದ ರಚಿತಾ ರಾಮ್‌ ಇದೀಗ ಭರಾಟೆ ಚಿತ್ರದಲ್ಲಿ ವಿಶೇಷ ಹಾಡೊಂದಕ್ಕೆ ಹೆಜ್ಜೆ ಹಾಕಿದ್ದು, ಆ ಹಾಡಿನ ಮೇಕಿಂಗ್‌ ವಿಡಿಯೋ ಭಾರೀ ವೈರಲ್‌ ಆಗಿದೆ. ಈವರೆಗೆ ಸುಮಾರು ಏಳು ಲಕ್ಷಕ್ಕೂ ಹೆಚ್ಚು ಜನ ಅದನ್ನು ವೀಕ್ಷಿಸಿದ್ದಾರೆ. ಚೇತನ್‌ ಕುಮಾರ್‌ ನಿರ್ದೇಶನದ ಈ ಚಿತ್ರದಲ್ಲಿ ಶ್ರೀಮುರಳಿ ಮತ್ತು ಶ್ರೀಲೀಲಾ ಜೋಡಿ ನಟಿಸುತ್ತಿದ್ದು, ಈ ಚಿತ್ರದಲ್ಲಿ ಟೈಟಲ್‌ ಟ್ರಾ ್ಯಕ್‌ಗೆ ರಚಿತಾ ಡಾನ್ಸ್‌ ಮಾಡಿದ್ದಾರೆ.

ಈ ಹಾಡನ್ನು ಬಹಳ ಡಿಫರೆಂಟಾಗಿ ಡಿಸೈನ್‌ ಮಾಡಲಾಗಿದೆ. ಹೀಗಾಗಿ ಹಾಡಿಗೆ ಹೆಜ್ಜೆ ಹಾಕಲು ಯಾವ ನಟಿಯಾದರೆ ಸೂಕ್ತ ಎಂದು ಚಿತ್ರತಂಡ ತಲೆಕೆಡಿಸಿಕೊಂಡಿತ್ತು. ಕೊನೆಗೆ ರಚಿತಾ ಅವರ ಹೆಸರು ಫೈನಲ್‌ ಆಯಿತು. ಚಿತ್ರತಂಡಕ್ಕೇ ಈ ಹಾಡು ತುಂಬಾ ವಿಶೇಷ ಎನಿಸಿದ್ದರಿಂದ ಮೇಕಿಂಗ್‌ ವಿಡಿಯೋ ಮಾಡಿದ್ದೇವೆ. ಇದೀಗ ಅದು ಭಾರೀ ವೈರಲ್‌ ಆಗಿದೆ ಎಂದು ನಿರ್ದೇಶಕ ಚೇತನ್‌ ತಿಳಿಸಿದ್ದಾರೆ. ಹಾಗೆ ನೋಡಿದರೆ ಇದು ತುಂಬಾ ಪುಟ್ಟ ವಿಡಿಯೋ. ಅದರಲ್ಲಿ ರಚಿತಾ ಅವರ ಲುಕ್‌ ಮತ್ತು ಎಕ್ಸ್‌ಪ್ರೆಶನ್‌ಗೆ ನೆಟ್ಟಿಗರು ಫಿದಾ ಆಗಿದ್ದಾರೆ. ನಮ್ಮ ಚಿತ್ರಕ್ಕೆ ಈ ಹಾಡು ದೊಡ್ಡ ಪ್ಲಸ್‌ ಪಾಯಂಟ್‌ ಆಗಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಕಳೆದ ಐದು ದಿನಗಳಿಂದ ಈ ಹಾಡಿನ ಚಿತ್ರೀಕರಣ ಮಾಡಲಾಗುತ್ತಿದ್ದು, ರಚಿತಾ, ಶ್ರೀಮುರಳಿ ಮತ್ತು ಶ್ರೀಲೀಲಾ ಸೇರಿ 200 ಮಂದಿ ಜೂನಿಯರ್‌ ಡಾನ್ಸರ್‌ಗಳ ಜತೆ ಹೆಜ್ಜೆ ಹಾಕುತ್ತಿದ್ದಾರೆ. 'ಬಹಳ ರಿಚ್‌ ಆಗಿ ಮಾಡಿರುವ ಹಾಡು ಇದು. ಸೆಟ್‌, ಮ್ಯೂಸಿಕ್‌, ಡಾನ್ಸ್‌ ಅದ್ಭುತವಾಗಿ ಮೂಡಿಬಂದಿದೆ. ಮೇಕಿಂಗ್‌ ವಿಡಿಯೋನಲ್ಲಿ ಇದರ ಝಲಕ್‌ ಇದೆ. ಹಾಡೂ ಹಿಟ್‌ ಆಗುತ್ತೆ ಎಂಬ ನಂಬಿಕೆ ಇದೆ' ಎಂದಿದ್ದಾರೆ ಚೇತನ್‌.

ನಿರ್ದೇಶಕ ಚೇತನ್‌ ಬರೆದ 'ಬಿಟ್ಹಾಕ್ರಿ ಡಿಪ್ರೆಷನ್‌.. ಹುಡುಕ್ಕೊಳ್ರೀ ಸಲ್ಯೂಷನ್ಸ್‌.. ಎಂಬ ಹಾಡಿಗೆ ಅರ್ಜುನ್‌ ಜನ್ಯ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಮೋಹನ್‌ ನೃತ್ಯ ಸಂಯೋಜನೆ ಇದೆ. ಗಿರೀಶ್‌ ಗೌಡ ಛಾಯಾಗ್ರಹಣ ಮಾಡುತ್ತಿದ್ದಾರೆ. ರಚಿತಾ ರಾಮ್‌ ತಮ್ಮ ಬಿಝಿ ಶೆಡ್ಯೂಲ್‌ನಲ್ಲೂ ಹಾಡಿಗೆ ಹೆಜ್ಜೆ ಹಾಕಲು ಸಿದ್ಧ. ಈಗ ಅವರು ಉಪೇಂದ್ರ ನಟನೆಯ ಐ ಲವ್‌ ಯೂ, ಅಮರ್‌, ಏಪ್ರಿಲ್‌, ಶಿವರಾಜ್‌ಕುಮಾರ್‌ ನಟನೆಯ ಆನಂದ್‌, ರುಸ್ತುಂ ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ.

===

ಈ ಮೇಕಿಂಗ್‌ ವಿಡಿಯೋ ಟ್ರೆಂಡಿಂಗ್‌ ಆಗಿರೋದು ಖುಷಿಯ ವಿಚಾರ. ಬಹಳ ಎನರ್ಜೆಟಿಕ್‌ ಆಗಿರುವ ಡಾನ್ಸರ್‌ ಬೇಕಿತ್ತು. ಈ ಚಿತ್ರದಲ್ಲಿ ಒಂದು ಸ್ಪೆಷಲ್‌ ಅಪಿಯರೆನ್ಸ್‌ ಇದ್ದರೆ ಚೆನ್ನಾಗಿರುತ್ತದೆ ಎಂದು ನಮಗೆ ಅನಿಸಿತ್ತು. ರಚಿತಾ ಒಳ್ಳೆಯ ಡಾನ್ಸರ್‌. ಬಹಳ ಎನರ್ಜೆಟಿಕ್‌. ಹಾಗಾಗಿ ಅವರನ್ನು ಅಪ್ರೋಚ್‌ ಮಾಡಿದೆವು. ಕೇಳಿದ ತಕ್ಷಣ ಒಪ್ಪಿಕೊಂಡರು.

-ಚೇತನ್‌ ಕುಮಾರ್‌, ನಿರ್ದೇಶಕ