ಮೊದಲ ಸಲ ಡಬ್ಬಿಂಗ್ ಹೇಳಿದ ರಚಿತಾ ರಾಮ್

ಸ್ಯಾಂಡಲ್‍ವುಡ್ ಡಿಂಪಲ್ ಬೆಡಗಿ ರಚಿತಾ ರಾಮ್ ತಮ್ಮ ಮುಂದಿನ ಚಿತ್ರ 'ಜಾನಿ ಜಾನಿ ಎಸ್ ಪಪ್ಪಾ' ಬಗ್ಗೆ ಸಾಕಷ್ಟು ಉತ್ಸುಕರಾಗಿದ್ದಾರೆ. ಇದಕ್ಕೆ ಕಾರಣವಾಗಿರುವುದು ಇದೇ ಮೊದಲ ಬಾರಿಗೆ ಅವರು ಡಬ್ಬಿಂಬ್ ಹೇಳಿರುವುದು. ಹಾಗಾಗಿ ರಚಿತಾ ಅಭಿಮಾನಿಗಳು ಅವರ ಧ್ವನಿ ಕೇಳಲು ಕಾತುರರಾಗಿದ್ದಾರೆ.

ಇಷ್ಟು ದಿನಗಳ ಕಾಲ ರಚಿತಾ ಪಾತ್ರಗಳಿಗೆ ಬೇರೆಯವರು ಡಬ್ಬಿಂಗ್ ಹೇಳುತ್ತಿದ್ದರು, ಈಗ ಅವರದೇ ಪಾತ್ರಕ್ಕೇ ಅವರದೇ ಧ್ವನಿ ಇರುವ ಕಾರಣ ಇದನ್ನು ಪ್ರೇಕ್ಷಕರು ಹೇಗೆ ಸ್ವೀಕರಿಸುತ್ತಾರೆ ಎಂಬ ಕಾತುರ ಅವರಿಗೂ ಇದೆಯಂತೆ. 'ಡಬ್ಬಿಂಗ್ ಹೇಳುವ ಚಾನ್ಸ್ ಇದುವರೆಗೆ ಸಿಕ್ಕಿರಲಿಲ್ಲ. ಈ ಚಿತ್ರದ ಮೂಲಕ ಆ ಅವಕಾಶ ಸಿಕ್ಕಿದೆ. ಚಿತ್ರದಲ್ಲಿ ತಮ್ಮದು ತುಂಬಾ ಗ್ಲಾಮರಸ್ ಪಾತ್ರ. ಡಬ್ಬಿಂಗ್ ಹೇಳಿರುವುದಕ್ಕೆ ಹೆಮ್ಮೆ ಅನ್ನಿಸುತ್ತಿದೆ' ಎಂದಿದ್ದಾರೆ ರಚಿತಾ ರಾಮ್.

ನಟಿ ರಮ್ಯಾ ಸಹ 'ಜಾನಿ ಮೇರಾ ನಾಮ್' ಚಿತ್ರದ ಮೂಲಕ ಡಬ್ಬಿಂಗ್ ಹೇಳಿದ್ದರು. ಇದೀಗ ರಚಿತಾ ರಾಮ್ ಸಹ ಅದೇ ಸರಣಿಯ ಚಿತ್ರದ ಮೂಲಕ ಡಬ್ಬಿಂಗ್ ಹೇಳಿರುವುದು ವಿಶೇಷ. ರಚಿತಾ ರಾಮ್ ಇನ್ನೊಂದು ಚಿತ್ರದಲ್ಲೂ ಬಿಝಿಯಾಗಿದ್ದಾರೆ. ನಿಖಿಲ್ ಕುಮಾರ್ ನಾಯಕ ನಟನಾಗಿರುವ 'ಸೀತಾರಾಮ ಕಲ್ಯಾಣ' ಚಿತ್ರದಲ್ಲಿ ನಾಯಕಿಯಾಗಿ ಅಭಿನಯಿಸುತ್ತಿದ್ದಾರೆ.

'ಚೆನ್ನೈ ಎಕ್ಸ್‌ಪ್ರೆಸ್‌' ಚಿತ್ರದಲ್ಲಿ ದೀಪಿಕಾ ಪಡುಕೋಣೆ ಪಾತ್ರವನ್ನು ಸೀತಾರಾಮ ಕಲ್ಯಾಣದ ಪಾತ್ರ ಹೋಲುತ್ತದೆ ಎನ್ನುತ್ತಾರೆ ರಚಿತಾ. ಆದರೆ ಇಲ್ಲಿ ಅವರದು ತುಂಬಾ ಸಾಫ್ಟ್ ಪಾತ್ರವಂತೆ. ಇದೇ ಮೊದಲ ಸಲ ಈ ರೀತಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದೇನೆ ಎಂದಿದ್ದಾರೆ ರಚಿತಾ.