- ಶರಣು ಹುಲ್ಲೂರು
ವಿದೇಶದಲ್ಲಿ ಹನಿಮೂನ್‌ ಮುಗಿಸಿಕೊಂಡು ಬೆಂಗಳೂರಿಗೆ ವಾಪಸ್ಸಾಗಿದ್ದಾರೆ ಯಶ್‌ ಮತ್ತು ರಾಧಿಕಾ ಪಂಡಿತ್‌. ಹಲವು ವಿಶೇಷ ಸ್ಥಳಗಳಿಗೆ ಭೇಟಿ ನೀಡಿರುವ ತಮ್ಮ ಪಯಣದ ಅನುಭವವನ್ನು ರಾಧಿಕಾ ಇಲ್ಲಿ ಹಂಚಿಕೊಂಡಿದ್ದಾರೆ.
ರಾಯಲ್‌ ಮದುವೆಯ ನಂತರ ವಿದೇಶ ಪ್ರವಾಸದಲ್ಲಿದ್ದರು ಯಶ್‌ ಮತ್ತು ರಾಧಿಕಾ ಪಂಡಿತ್‌. ಹನಿಮೂನ್‌ ಮುಗಿಸಿಕೊಂಡು ಜ.7ಕ್ಕೆ ಬೆಂಗಳೂರಿಗೆ ವಾಪಸ್ಸಾಗಿದ್ದಾರೆ. ಅಲ್ಲದೇ ಜ.8ರಂದು ಯಶ್‌ ಹುಟ್ಟುಹಬ್ಬ ಆಚರಿಸಿಕೊಂಡರು. ಈ ವೇಳೆ ರಾಧಿಕಾ ಪಂಡಿತ್‌ ಒಂದಿಷ್ಟು ವಿಶೇಷ ಅನುಭವಗಳಿಗೆ ಇಲ್ಲಿ ಮಾತಾಗಿದ್ದಾರೆ.
* ಮದುವೆಯ ನಂತರ ನಿಮ್ಮಲ್ಲಾದ ಬದಲಾವಣೆ ಏನು?
- ನಾನು ಮತ್ತು ಯಶ್‌ ಇಬ್ಬರೂ ಫ್ರೆಂಡ್ಸ್‌. ನಮ್ಮನ್ನು ನಾವು ಅರ್ಥ ಮಾಡಿಕೊಂಡೇ ಸಪ್ತಪದಿ ತುಳಿದೆವು. ಹಾಗಾಗಿ ಮದುವೆಯ ನಂತರ ನಮ್ಮಲ್ಲಿ ಅಂಥದ್ದೇನೂ ಬದಲಾವಣೆ ಆಗಿಲ್ಲ. ಬದಲಾವಣೆ ಅಂದರೆ, ನನ್ನ ಕೊರಳಲ್ಲೀಗ ಮಾಂಗಲ್ಯವಿದೆ ಅಷ್ಟೆ.
* ನಿಮ್ಮ ಮದುವೆ ಅನ್ನುವುದೇ ಒಂದು ಅದ್ಧೂರಿ ಸಿನಿಮಾದಂತಿತ್ತು. ಈ ಕುರಿತು ಏನು ಹೇಳುತ್ತೀರಿ?
- ಯಶ್‌ ನನಗೆ ಕೊಟ್ಟ ಅಮೂಲ್ಯ ಗಿಫ್ಟ್‌ ಅದು. ಅದರ ಹೊರತಾಗಿ ಅವರಿಂದ ನಾನು ಮತ್ತೇನನ್ನೂ ನಿರೀಕ್ಷೆ ಮಾಡಲಾರೆ. ಆ ಖುಷಿ ನನ್ನಲ್ಲಿ ಸದಾ ಇರಲಿದೆ. ನಾನು ಏನು ಡ್ರೀಮ್‌ ಕಂಡಿದ್ದೆನೋ ಅದೇ ರೀತಿಯಲ್ಲೇ ನಮ್ಮ ಮದುವೆ ಆಯಿತು.
* ಹನಿಮೂನ್‌ ಪ್ರವಾಸ ಎಲ್ಲಿಂದ ಆರಂಭ ಆಯಿತು. ಯಾವ ಯಾವ ಸ್ಥಳಗಳಿಗೆ ಭೇಟಿ ನೀಡಿದಿರಿ?
- ಭಾರತದಿಂದ ನಾವು ನೇರವಾಗಿ ಹೋಗಿದ್ದು ಹವಾಯಿಗೆ. ಅಲ್ಲಿಂದ ಮಾಯಾಮಿ ಮತ್ತು ಚಿಕಾಗೋದಲ್ಲಿ ಇದ್ದೆವು. ಮೂರು ಸ್ಥಳಗಳಲ್ಲೂ ನಾನು ವಿಶೇಷತೆ ಕಂಡೆ. ಹವಾಯಿಯ ಪರಿಸರ ನಿಜಕ್ಕೂ ವಿಭಿನ್ನ. ಮ್ಯಾಪ್‌ನಲ್ಲಿ ನೋಡಿದರೆ ಹವಾಯಿಯು ಚುಕ್ಕೆ ತರಹ ಇದೆ. ಸಮುದ್ರದ ಮಧ್ಯ ಇರೋ ದ್ವೀಪವದು. ನೀರಿನ ಕಲರ್‌, ವಾತಾವರಣ ತುಂಬಾ ಚೆನ್ನಾಗಿದೆ. ಮಾಯಾಮಿ ಕೂಡ ಇನ್ನೊಂದು ರೀತಿಯಲ್ಲಿ ಚೆನ್ನಾಗಿದೆ. ಅಲ್ಲಿಯದು ಸಿಟಿ ಲೈಫ್‌. ಚಿಕಾಗೋ ಫ್ರೀಜಿಂಗ್‌ ಟೆಂಪರೇಚರ್‌ ಇರೋ ಸ್ಥಳ. ಅಲ್ಲಿ ಉಷ್ಣತೆ ಮೈನಸ್‌ 18 ಇತ್ತು.
* ಯಶ್‌ ಅವರ ಈ ಬಾರಿಯ ಹುಟ್ಟು ಹಬ್ಬಕ್ಕೆ ಯಾವ ಉಡುಗೊರೆ ನೀಡಿದ್ದೀರಿ?
- ಪ್ರತಿ ವರ್ಷವೂ ನಾನು ಮಿಸ್‌ ಮಾಡದೇ ಯಶ್‌ಗಾಗಿ ಗಿಫ್ಟ್‌ ಕೊಟ್ಟಿದ್ದೇನೆ. ಈ ಬಾರಿ ಏನೂ ಯೋಚನೆ ಮಾಡೋಕೆ ಆಗಲಿಲ್ಲ. ಜ.7ರ ಬೆಳಗ್ಗೆ ಬೆಂಗಳೂರಿಗೆ ಬಂದಿದ್ದು. ಜ.8ಕ್ಕೆ ಯಶ್‌ ಬರ್ತ್‌ಡೇ. ಹಾಗಾಗಿ ಏನನ್ನೂ ತೆಗೆದುಕೊಳ್ಳುವುದಕ್ಕೆ ಆಗಿಲ್ಲ.
* ಯಶ್‌ ಜತೆಗಿನ ವಿದೇಶಿ ಸುತ್ತಾಟ ಹೇಗಿತ್ತು?
- ಮದುವೆಗೆ ಮುಂಚೆ ನಾನು ಅನೇಕ ದೇಶಗಳನ್ನು ಸುತ್ತಿದ್ದೇನೆ. ಪ್ರತಿ ಪ್ರವಾಸದಲ್ಲೂ ಅಪ್ಪನೋ, ಅಮ್ಮನೋ ಅಥವಾ ಫ್ರೆಂಡ್ಸ್‌ ಇರ್ತಾ ಇದ್ದರು. ಶೂಟಿಂಗ್‌ಗೆ ಹೋದರೆ ಅಸಿಸ್ಟೆಂಟ್‌ ಜತೆಗೆ ಇರೋರು. ಯಶ್‌ ಜತೆ ಕೂಡ ಯಾರಾದರೂ ಇರೋರು. ಇದೇ ಮೊದಲ ಬಾರಿಗೆ ನಾವಿಬ್ಬರೇ ಪ್ರವಾಸ ಮಾಡಿದೆವು. ನಾವೇ ತಯಾರಿ ಮಾಡಿಕೊಂಡು ವಿದೇಶ ಸುತ್ತಿದ್ದೆವು. ನಮ್ಮ ಬಳಿ ಒಂದು ಕ್ಯಾಮೆರಾ ಕೂಡ ಇರಲಿಲ್ಲ. ನಮ್ಮ ಫೋನ್‌ನಲ್ಲೇ ಸೆಲ್ಫಿ ತೆಗೆದುಕೊಂಡೆವು. ನಿಜಕ್ಕೂ ಆನುಭವ ವಿಭಿನ್ನವಾಗಿತ್ತು.
* ಪ್ರವಾಸದಲ್ಲಿ ಏನೆಲ್ಲ ಖರೀದಿ ಮಾಡಿದಿರಿ?
- ನಾವು ಹೋಗಿದ್ದ ಜಾಗಗಳಲ್ಲಿ ಶಾಪಿಂಗ್‌ ಮಾಡುವಂಥದ್ದು ಏನೂ ಇರಲಿಲ್ಲ. ಹವಾಯಿಯಲ್ಲಿ ಹ್ಯಾಟ್‌ ತೆಗೆದುಕೊಂಡೆ. ಚಿಕ್ಕ ವಯಸ್ಸಿನಿಂದ ನನಗೊಂದು ಅಭ್ಯಾಸವಿದೆ. ಯಾವ ಜಾಗಕ್ಕೆ ಹೋಗಿರುತ್ತೇವೆಯೋ ಅಲ್ಲಿಯ ಹೆಸರಿರುವ ಫ್ರಿಡ್ಜ್‌ ಮ್ಯಾಗ್ನೆಟ್‌ ತೆಗೆದುಕೊಳ್ಳುವ ಅಭ್ಯಾಸ. ಅದನ್ನು ತೆಗೆದುಕೊಂಡು ಬಂದಿದ್ದೇನೆ.
* ಮುಂದಿನ ನಿಮ್ಮ ಸಿನಿಮಾ ಯಾವುದು?
- ಸದ್ಯಕ್ಕೆ ಯಾವ ಯೋಚನೆಯನ್ನೂ ಮಾಡಿಲ್ಲ. ಹಲವು ಕತೆಗಳನ್ನು ಕೇಳಿದ್ದೇನೆ. ಖಂಡಿತ ಸಿನಿಮಾದಲ್ಲಿ ನಟಿಸುವೆ. ಅದರ ಬಗ್ಗೆ ಯಾವ ಅನುಮಾನವೂ ಬೇಡ.