ಹೈದರಾಬಾದ್‌ನಲ್ಲಿ ಬಾಲಿವುಡ್‌ ಸ್ಟಾರ್‌ಗಳನ್ನು ಭೇಟಿಯಾದ ರಾಘವೇಂದ್ರ ರಾಜ್‌ಕುಮಾರ್‌

ನಟ ರಾಘವೇಂದ್ರ ರಾಜ್‌ಕುಮಾರ್‌ ಬಾಲಿವುಡ್‌ ನಟರಾದ ಜಾನ್‌ ಅಬ್ರಹಾಂ ಮತ್ತು ಅನಿಲ್‌ ಕಪೂರ್‌ ಅವರನ್ನು ಹೈದರಾಬಾದ್‌ನ ರಾಮೋಜಿ ಫಿಲ್ಮಸಿಟಿಯಲ್ಲಿ ಭೇಟಿಯಾಗಿದ್ದಾರೆ. ಜಿಮ್‌ನಲ್ಲಿ ಕಸರತ್ತು ನಡೆಸುತ್ತಿದ್ದ ಈ ಇಬ್ಬರು ಸ್ಟಾರ್‌ಗಳ ಜತೆ ಅವರು ಸ್ವಲ್ಪ ಸಮಯ ಕಳೆದಿದ್ದಾರೆ.

'ಪೊಗರು' ಚಿತ್ರದಲ್ಲಿ ರಾಘವೇಂದ್ರ ರಾಜ್‌ಕುಮಾರ್‌ ನಟಿಸುತ್ತಿದ್ದಾರೆ. ಧ್ರುವ ಸರ್ಜಾ ನಟನೆಯ ಈ ಚಿತ್ರದ ಶೂಟಿಂಗ್‌ ಈಗ ರಾಮೋಜಿ ಫಿಲ್ಮ್‌ ಸಿಟಿಯಲ್ಲೇ ನಡೆಯುತ್ತಿದೆ. ಈ ಸಂದರ್ಭದಲ್ಲಿ ಬಾಲಿವುಡ್‌ ನಟರಿಬ್ಬರೂ ರಾಘವೇಂದ್ರ ರಾಜ್‌ಕುಮಾರ್‌ರನ್ನು ಆತ್ಮೀಯವಾಗಿ ಮಾತನಾಡಿಸಿದ್ದಾರೆ. [25ನೇ ಚಿತ್ರಕ್ಕೆ ಸಹಿ ಮಾಡಿದ ರಾಘವೇಂದ್ರ ರಾಜ್‌ಕುಮಾರ್‌]

'ನಾನು ಇಲ್ಲಿ ಶೂಟಿಂಗ್‌ಗೆ ಹೋದಾಗ ಜಿಮ್‌ಗೆ ಹೋಗ್ತೀನಿ. ಈ ಬಾರಿ ಜಾನ್‌ ಅಬ್ರಹಾಂ, ಅನಿಲ್‌ ಕಪೂರ್‌ ಕೂಡ ಶೂಟಿಂಗ್‌ಗೆ ಬಂದಿದ್ದಾರೆ ಅಂತ ಗೊತ್ತಾಗಿ ಭೇಟಿ ಮಾಡಲು ಬಯಸಿದೆ. ಅವರು ರಾಜ್‌ಕುಮಾರ್‌ ಹೆಸರು ಕೇಳುತ್ತಿದ್ದಂತೆ ಎದ್ದು ನಿಂತು ನನ್ನನ್ನು ಬಹಳ ಆತ್ಮೀಯತೆಯಿಂದ ಮಾತನಾಡಿಸಿದರು. ಅವರಿಗೆ ಶಿವಣ್ಣ ಮತ್ತು ಪುನೀತ್‌ ಬಗ್ಗೆ ಗೊತ್ತಿತ್ತು. ನನ್ನ ಬಗ್ಗೆ ಹೆಚ್ಚು ಗೊತ್ತಿರಲಿಲ್ಲ. ಪರಿಚಯ ಮಾಡಿಕೊಂಡೆ. ಸ್ಟ್ರೋಕ್‌ಗೆ ಒಳಗಾದ ವ್ಯಕ್ತಿಯ ಹಾಗೆæ ನೀವು ಕಾಣಿಸೋದಿಲ್ಲ' ಎಂದು ಆಶ್ಚರ್ಯ ವ್ಯಕ್ತಪಡಿಸಿದರು. ತುಂಬಾ ಹೊತ್ತು ಮಾತನಾಡಿದೆವು. ಇನ್ನೂ ಮೂರು ದಿನ ಇಲ್ಲೇ ಇರ್ತೀವಿ. ಸಿಗೋಣ ಅಂದ್ರು. ಇದು ನನಗೆ ಬಹಳ ಖುಷಿ ಕೊಡ್ತು' ಎಂದಿದ್ದಾರೆ ರಾಘವೇಂದ್ರ ರಾಜ್‌ಕುಮಾರ್‌.