14 ವರ್ಷಗಳ ನಂತರ ಬೆಳ್ಳಿತೆರೆಗೆ ರಾಘಣ್ಣ

ನಿಖಿಲ್‌ ಮಂಜು ನಿರ್ದೇಶನದ ಅಮ್ಮನ ಮನೆ ಸದ್ಯದಲ್ಲೆ ತೆರೆ ಮೇಲೆ ಬರಲಿದ್ದು, ಪಕ್ಕದ ಮನೆ ಹುಡುಗಿ ಸಿನಿಮಾ ನಂತರ ರಾಘವೇಂದ್ರ ರಾಜ್‌ಕುಮಾರ್‌ ನಟನೆಯ ಸಿನಿಮಾ ಇದಾಗಿದ್ದು, ಒಟ್ಟು 14 ವರ್ಷಗಳ ನಂತರ ರಾಘಣ್ಣ ತೆರೆ ಮೇಲೆ ಬರಲಿದ್ದಾರೆ.

ಶ್ರೀಲಲಿತಾ ಅವರು ಬರೆದಿರುವ ಕಾದಂಬರಿ ಸಿನಿಮಾ ರೂಪ ಕಂಡಿದೆ. ಅಮ್ಮನ ಮನೆ ಚಿತ್ರ ಗಂಡಸಿನ ಬದುಕಿನಲ್ಲಿ ಬರುವ ಮೂವರು ತಾಯಂದಿರ ಕುರಿತ ಕಥೆಯನ್ನು ಹೇಳುತ್ತದೆ. ಈ ಸಿನಿಮಾದಲ್ಲಿ ರಾಘವೇಂದ್ರ ರಾಜ್‌ಕುಮಾರ್‌ ಇನ್ನು ಜೋಕರ್‌ ಆಗಿ, ಸೀರಿಯಸ್‌ ಆಗಿಯೂ ನಟಿಸಿದ್ದಾರೆ. ಜತೆಗೆ ಎರಡು ಹಾಡಿಗೂ ದನಿಯಾಗಿದ್ದಾರೆ.

ರಾಘಣ್ಣನಿಗೆ ಮಾನಸಿ ಸುಧೀರ್‌ ಜೋಡಿಯಾಗಿದ್ದಾರೆ. ಪ್ರಮುಖ ಪಾತ್ರದಲ್ಲಿ ಸುಚೇಂದ್ರ ಪ್ರಸಾದ್‌, ತಬಲನಾಣಿ, ನಿರ್ದೇಶಕ ನಾಗಾಭರಣ, ನಿಖಿಲ್‌ ಮಂಜು, ರಂಗಭೂಮಿ ಕಲಾವಿದೆ ರೋಹಿಣಿ ರಾಘವೇಂದ್ರ ರಾಜ್‌ಕುಮಾರ್‌ ತಾಯಿಯ ಪಾತ್ರದಲ್ಲಿ ನಟಿಸಿದ್ದಾರೆ.

ಈ ಹಿಂದೆ ಮನೋರಂಜನ್‌ ರವಿಚಂದ್ರನ್‌ ನಟನೆಯ 'ಚಿಲಂ' ಚಿತ್ರದಲ್ಲಿ ಖಳನಾಯಕರಾಗಿ ನಟಿಸುವ ಮೂಲಕ ನಟನೆಗೆ ಮರಳುತ್ತಾರೆ ಎಂಬ ಸುದ್ದಿ ಇತ್ತು. ಆದರೆ ಇಷ್ಟು ದಿನ ಫ್ಯಾಮಿಲಿ ಪ್ರೇಕ್ಷಕರ ಅಚ್ಚುಮೆಚ್ಚಿನ ನಟರಾಗಿದ್ದ ರಾಘಣ್ಣ, ಒಮ್ಮೆಲೆ ಖಳನಟರಾಗುವುದು ಬೇಡ ಎಂದು ಅಭಿಮಾನಿಗಳು ಒತ್ತಾಯ ಮಾಡಿದ್ದರಿಂದ ಅವರು ವಿಲನ್‌ ಪಾತ್ರದಿಂದ ಹಿಂದೆ ಸರಿದಿದ್ದರು.

'ಇಷ್ಟು ದಿನ ರಾಘವೇಂದ್ರ ರಾಜ್‌ಕುಮಾರ್‌ ಅವರನ್ನು ಯಾವ ರೀತಿಯ ಪಾತ್ರಗಳಲ್ಲಿ ನೋಡಿಕೊಂಡು ಬಂದಿದ್ದರೋ ಅಂತದ್ದೇ ಪಾತ್ರ. ಈ ಸಿನಿಮಾಗೆ 'ಅಮ್ಮನ ಮನೆ' ಎಂಬ ಟೈಟಲ್‌ ಇಟ್ಟಿದ್ದೇವೆ. ನಾನು ಕಥೆ ಹೇಳಿದ ತಕ್ಷಣ ರಾಘಣ್ಣ ಬಹಳ ಇಂಪ್ರೆಸ್‌ ಆದರೂ. ಫ್ಯಾಮಿಲಿ ಸಬ್ಜೆಕ್ಟ್ ಆಗಿದೆ. ಕ್ಲಾಸ್‌ ಕಮರ್ಷಿಯಲ್‌ ಸಿನಿಮಾ ಇದಾಗಿದೆ. ನನ್ನ ಪಾತ್ರಕ್ಕೆ ಅವರು ಬಹಳ ಚೆನ್ನಾಗಿ ಸೂಟ್‌ ಆಗುತ್ತಾರೆ. ಇಂತಹ ಒಂದು ಸಬ್ಜೆಕ್ಟ್ ಮೂಲಕ ಮತ್ತೆ ನಟನೆಗೆ ಬರುತ್ತಿರುವುದಕ್ಕೆ ಅವರಿಗೆ ಹೆಚ್ಚಿನ ಸಂತೊಷ ಇದೆ' ಅಂತಾರೆ ನಿಖಿಲ್‌ ಮಂಜು.