ಕನ್ನಡದ ಹೆಸರಾಂತ ಗಾಯಕ ರಾಜೇಶ್‌ ಕೃಷ್ಣ 'ಚಿಟ್ಟೆ' ಸಿನಿಮಾಗಾಗಿ ಎರಡು ಹಾಡುಗಳನ್ನು ಹಾಡಿದ್ದಾರೆ. ಎಂ.ಎಲ್‌.ಪ್ರಸನ್ನ ನಿರ್ದೇಶನದಲ್ಲಿ ಮೂಡಿ ಬರುತ್ತಿರುವ ಈ ಸಿನಿಮಾದಲ್ಲಿ ಐದು ಹಾಡುಗಳಿದ್ದು, ಅದರಲ್ಲಿ ಎರಡು ಹಾಡುಗಳಿಗೆ ರಾಜೇಶ್‌ ದನಿಯಾಗಿದ್ದಾರೆ. ನಿರ್ದೇಶಕರೇ ಹಾಡಿನ ಸಾಹಿತ್ಯ ಬರೆದಿದ್ದಾರೆ.
ಯಶಸ್‌ ಮತ್ತು ಹರ್ಷಿಕಾ ಪೂಣಚ್ಚ ಮುಖ್ಯ ಭೂಮಿಕೆಯ ಸಿನಿಮಾವಿದು. ಲವ್‌ಸ್ಟೋರಿಯ ಜತೆಗೆ ಹಾರರ್‌ ಮತ್ತು ಸಸ್ಪೆನ್ಸ್‌ ಕತೆ ಕೂಡ ಇದೆ. ಹರ್ಷಿಕಾ ಈ ಸಿನಿಮಾದಲ್ಲಿ ವಿಭಿನ್ನ ಪಾತ್ರ ಪೋಷಿಸಿದ್ದಾರೆ.
ಇದು ನಿರ್ದೇಶಕರ ಎರಡನೇ ಸಿನಿಮಾ. ಈ ಹಿಂದೆ ರಮೇಶ್‌ ಅರವಿಂದ್‌ ನಟನೆಯ ರಂಗಪ್ಪ ಹೋಗ್ಬಿಟ್ನಾ ಸಿನಿಮಾಗೆ ಆ್ಯಕ್ಷನ್‌ ಕಟ್‌ ಹೇಳಿದ್ದರು. ಮೂಲತಃ ಸಂಭಾಷಣೆಗಾರರೂ ಆಗಿರುವ ನಿರ್ದೇಶಕರು ಈ ಹಿಂದೆ ಸುದೀಪ್‌, ಅಜಯ್‌ರಾವ್‌, ಪ್ರಜ್ವಲ್‌ ದೇವರಾಜ್‌ ಸೇರಿದಂತೆ ಹಲವು ನಾಯಕ ನಟರ ಚಿತ್ರಗಳಿಗೆ ಸಂಭಾಷಣೆ ಬರೆದಿದ್ದಾರೆ. ಹಲವು ವರ್ಷಗಳ ಕಾಲ ಹಂಸಲೇಖ, ನಿರ್ದೇಶಕ ಬಿ.ಸುರೇಶ ಜತೆ ಕೆಲಸ ಮಾಡಿದ ಹೆಗ್ಗಳಿಕೆ ಕೂಡ ಇವರದ್ದು.
ಸದ್ಯ ಸಿನಿಮಾದ ಮೊದಲ ಹಂತದ ಚಿತ್ರೀಕರಣ ಮುಗಿದಿದೆ. ಮುಂದಿನ ಹಂತದ ಚಿತ್ರೀಕರಣಕ್ಕಾಗಿ ಸಿದ್ಧತೆ ಮಾಡಿಕೊಳ್ಳುತ್ತಿದೆ ಚಿತ್ರತಂಡ.