ಟೆರರಿಸ್ಟ್‌ಗೆ ಬೆಂಬಲ ನೀಡಿದ ರಕ್ಷಿತ್‌

ರಾಗಿಣಿ ಅಭಿನಯದ ದಿ ಟೆರರಿಸ್ಟ್‌ ಚಿತ್ರದ ಟ್ರೇಲರ್‌ ಈಗಾಗಲೆ ಒಂದು ಲಕ್ಷಕ್ಕೂ ಹೆಚ್ಚು ಹಿಟ್‌ ಗಳಿಸಿದೆ. ಚಿತ್ರದ ಬಗ್ಗೆ ರಕ್ಷಿತ್‌ ಮಾತನಾಡಿದ್ದು, 'ಪಿ.ಸಿ. ಶೇಖರ್‌ ಪ್ರತಿ ಬಾರಿಯೂ ಹೊಸ ಹೊಸ ಕಥಾವಸ್ತು ಇಟ್ಟುಕೊಂಡು ಸಿನಿಮಾ ಮಾಡುತ್ತಾರೆ. ಈ ಬಾರಿಯೂ ಬಹಳ ಟಫ್‌ ಸಬ್ಜೆಕ್ಟ್ ಇಟ್ಟುಕೊಂಡು ಸಿನಿಮಾ ಮಾಡಿದ್ದಾರೆ' ಎಂದು ಹೇಳಿದ್ದಾರೆ. ಈ ಹಿಂದೆ ಶೇಖರ್‌ ನಿರ್ದೇಶನದ ರಾಗ ಚಿತ್ರ ನೋಡಿ ಮೆಚ್ಚಿಕೊಂಡಿದ್ದಾಗಿ ರಕ್ಷಿತ್‌ ಹೇಳಿದ್ದಾರೆ.

'ರಾಗ ಚಿತ್ರ ನಾನು ನೋಡಿದ್ದೆ. ನನಗೆ ಬಹಳ ಇಷ್ಟವಾಗಿತ್ತು. ಅದೇ ಕಾರಣಕ್ಕೆ ಈ ಚಿತ್ರದ ಬಗ್ಗೆಯೂ ಭರವಸೆ ಇಟ್ಟುಕೊಂಡಿದ್ದೇನೆ. ಅವರು ಚೆನ್ನಾಗಿ ಸಿನಿಮಾ ಮಾಡುತ್ತಾರೆ. ನಾನು ಟ್ರೇಲರ್‌ ರಿಲೀಸ್‌ ಮಾಡಿದೆ ಎಂದ ಮಾತ್ರಕ್ಕೆ ಚಿತ್ರ ಗೆಲ್ಲುತ್ತದೆ ಎನ್ನಲಾಗದು. ಚಿತ್ರ ಚೆನ್ನಾಗಿದ್ದರೆ ಖಂಡಿತ ಗೆಲ್ಲುತ್ತದೆ. ನಾನು ಟ್ರೇಲರ್‌ ರಿಲೀಸ್‌ ಮಾಡಲು ಒಪ್ಪಿಕೊಳ್ಳಲು ಕಾರಣ, ಇಲ್ಲಿಗೆ ಬಂದವರು ನನ್ನ ಚಿತ್ರವನ್ನೂ ನೋಡುತ್ತಾರೆ ಎನ್ನುವುದು. ನಾವೆಲ್ಲಾ ಒಗ್ಗಟ್ಟಾಗಿ ಕನ್ನಡ ಚಿತ್ರರಂಗ ಬೆಳೆಸಬೇಕಿದೆ' ಎಂದಿದ್ದಾರೆ.

ರಕ್ಷಿತ್‌ ಕ್ರಿಯೇಟಿವ್‌ ಚಿತ್ರಗಳಿಗೆ ಪ್ರೋತ್ಸಾಹ ನೀಡುತ್ತಾ ಬಂದಿದ್ದಾರೆ. 'ಅವರು ಇಂಥ ಚಿತ್ರಗಳಿಗೆ ಎಂಕರೇಜ್‌ ಮಾಡುತ್ತಾರೆ. ಈ ಚಿತ್ರಕ್ಕೆ ಬೆಂಬಲ ನೀಡಿದ್ದು ನಮಗೆಲ್ಲಾ ಖುಷಿ ನೀಡಿದೆ' ಎಂದಿದ್ದಾರೆ ನಿರ್ದೇಶಕ ಶೇಖರ್‌.