ರ‍್ಯಾಂಬೋ-2 ಸರ್‌ಪ್ರೈಸ್‌ಗಳ ಪ್ಯಾಕೇಜ್‌

*ಹರೀಶ್‌ ಬಸವರಾಜ್‌

Vijaya Karnataka Web

ಭರ್ಜರಿ ಮನರಂಜನೆಯ ಜತೆಗೆ 'ರ‍್ಯಾಂಬೋ-2' ಚಿತ್ರದಲ್ಲಿ ಸಾಕಷ್ಟು ಸರ್‌ಪ್ರೈಸ್‌ಗಳಿವೆಯಂತೆ. ಹಾಗಾಗಿ ಎಲ್ಲ ವರ್ಗದ ಜನರಿಗೂ ಈ ಸಿನಿಮಾ ಇಷ್ಟವಾಗಲಿದೆ ಅಂತಾರೆ ನಿರ್ದೇಶಕ ಅನಿಲ್‌ಕುಮಾರ್‌. ಜತೆಗೆ ಯಾವೆಲ್ಲ ಸರ್‌ಪ್ರೈಸ್‌ಗಳಿವೆಯೋ ಎಲ್ಲವೂ ಹಂತಹಂತದಲ್ಲಿ ರಿವೀಲ್‌ ಆಗುವುದರಿಂದ ಸಿನಿಮಾದ ಜತೆಯೇ ನೋಡುಗರು ಕೂಡ ಜರ್ನಿ ಮಾಡುತ್ತಾರಂತೆ. ಇಂತಹ ವಿಶೇಷ ಅನುಭವ ನೀಡುವಂತಹ ಚಿತ್ರ ಇದಾಗಿದೆ ಎನ್ನುವುದು ನಿರ್ದೇಶಕರ ಮಾತು.

'ರ‍್ಯಾಂಬೋ-2’ ಚಿತ್ರವು ಫನ್‌ ಎಂಟರ್‌ಟೈನಿಂಗ್‌ ಜತೆಗೆ ಉತ್ತಮ ಸಂದೇಶ ನೀಡುವಂಥ ಸಿನಿಮಾ. ಶರಣ್‌ ಮತ್ತು ಚಿಕ್ಕಣ್ಣ ಅವರ ಕಾಂಬಿನೇಶನ್‌ ಅಂದರೆ ಜನ ಕಾಮಿಡಿಯನ್ನೇ ನಿರೀಕ್ಷೆ ಮಾಡುತ್ತಾರೆ. ಅಲ್ಲದೇ ಹಿಟ್‌ ಜೋಡಿ ಕೂಡ ಇದು. ಈವರೆಗೂ ಕಾಣದೇ ಇರುವಂಥ ರೀತಿಯಲ್ಲಿ ಶರಣ್‌ ಮತ್ತು ಚಿಕ್ಕಣ್ಣ ಅವರನ್ನು ತೋರಿಸಲಾಗಿದೆ. ಅವರ ಸಂಭಾಷಣೆ, ಅಭಿನಯ, ಗೆಟಪ್‌ ಎಲ್ಲವೂ ವಿಭಿನ್ನ ಆಗಿವೆ. ಇದೆಲ್ಲದರ ಜತೆಗೆ ಸಿನಿಮಾದಲ್ಲಿ ಒಂದೊಳ್ಳೆ ಎಮೋಷನ್‌ ಪಾಯಿಂಟ್‌ ಕೂಡ ಇದೆ' ಇವೆಲ್ಲವೂ ನೋಡುಗರಿಗೆ ಇಷ್ಟವಾಗಲಿವೆ' ಅಂತಾರೆ ನಿರ್ದೇಶಕ ಅನಿಲ್‌.

ಸರ್‌ಪ್ರೈಸ್‌ಗಳ ಮೂಟೆಯೇ ರ‍್ಯಾಂಬೋ-2. ಈಗಾಗಲೇ ಅರುಣ್‌ಸಾಗರ್‌ ಪುತ್ರಿ ಗಾಯನ ಗಮನ ಸೆಳೆದಿದೆ. ಮೆಹಬೂಬ್‌ ಗಾಯನ, ಐಂದ್ರಿತಾ ರೇ ಡಾನ್ಸ್‌, ಐದು ಜನ ನಾಯಕಿಯರ ಡಾನ್ಸ್‌ ಸೇರಿದಂತೆ ಮನರಂಜನೆಗೆ ಬೇಕಾಗುವ ಎಲ್ಲ ಅಂಶಗಳನ್ನು ಒಳಗೊಂಡಿರುವ ಚಿತ್ರವಿದು. ಚುಟು ಚುಟು ಹಾಡಿಗೆ ಕನ್ನಡದಲ್ಲಿ ಮಾತ್ರವಲ್ಲ, ಬೇರೆ ಭಾಷೆಯ ನೋಡುಗರು ಕೂಡ ಫಿದಾ ಆಗಿದ್ದಾರೆ. ಟೆಕ್ನಿಕಲಿ ಸಿಕ್ಕಾಪಟ್ಟೆ ಸ್ಟ್ರಾಂಗ್‌ ಆಗಿರುವಂಥ ಚಿತ್ರ ಇದಾಗಿದೆಯಂತೆ. ಹಾಗಾಗಿ ಯಾವುದೇ ಭಾಷೆಗೆ ಸಡ್ಡು ಹೊಡೆಯುವಂಥ ಚಿತ್ರ ಇದಾಗಿದೆ ಎನ್ನುವುದು ನಿರ್ದೇಶಕರ ಮಾತು.

ಈ ಚಿತ್ರವನ್ನು ಲಡ್ಡು ಸಿನಿಮಾ ಹೌಸ್‌ ಬ್ಯಾನರ್‌ನಡಿ ಅಟ್ಲಾಂಟ ನಾಗೇಂದ್ರ ನಿರ್ಮಾಣ ಮಾಡಿದ್ದಾರೆ. ಸದ್ಯ ಕರ್ನಾಟಕದಲ್ಲಿ ಮಾತ್ರ ಚಿತ್ರ ಬಿಡುಗಡೆಯಾಗಲಿದ್ದು, ಎರಡು ವಾರದ ನಂತರ ಆಸ್ಪ್ರೇಲಿಯಾ, ಕೆನಡಾ, ಯುಎಸ್‌ಎ ಸೇರಿದಂತೆ ಎಲ್ಲ ರಾಷ್ಟ್ರಗಳಲ್ಲಿಯೂ ರಿಲೀಸ್‌ ಮಾಡುವ ಪ್ಲಾನ್‌ ನಿರ್ಮಾಪಕರದ್ದು.