ಚಕಿತಗೊಳಿಸುವ ರಮೇಶ್‌ ಅರವಿಂದ್ ಮೇಕ್‍ಓವರ್

ಇದೇ ಮೊದಲ ಬಾರಿಗೆ ರಮೇಶ್‌ ಅರವಿಂದ್‌ ಅಚ್ಚರಿ ಪಡುವಂತೆ ಮೇಕ್‌ಓವರ್‌ ಮಾಡಿಕೊಂಡಿದ್ದಾರೆ. ಶಿವಾಜಿ ಸೂರತ್ಕಲ್‌ ಹೆಸರಿನ ಸಿನಿಮಾದಲ್ಲಿ ಅವರು ಕ್ರೈಂ ಬ್ರ್ಯಾಂಚ್‌ನ ಅಧಿಕಾರಿ ಪಾತ್ರ ಮಾಡಿದ್ದು, ಈ ಪಾತ್ರಕ್ಕಾಗಿ ಫಸ್ಟ್‌ ಟೈಮ್‌ ಬದಲಾಗಿದ್ದಾರೆ.

'ಪೊಲೀಸ್‌ ಇಲಾಖೆಯಲ್ಲಿ ಬಹುಬೇಡಿಕೆಯ ಅಧಿಕಾರಿ ಶಿವಾಜಿ. ಚಾಣಾಕ್ಷತನಕ್ಕೆ ಹೆಸರುವಾಸಿ. ಆ ಪಾತ್ರವೇ ಒಂದು ರೀತಿಯಲ್ಲಿ ಹೊಸದಾಗಿದೆ. ಹಾಗಾಗಿ ಗಡ್ಡ ಬಿಟ್ಟೆ. ಪತ್ತೆದಾರಿಯಂತೆ ಗೆಟಪ್‌ ಧರಿಸಿದೆ. ಒಂದೊಂದು ವಿಶೇಷ ಲುಕ್‌ ಇರುವಂಥ ಪಾತ್ರ ಅದಾಗಿದೆ' ಎನ್ನುತ್ತಾರೆ ರಮೇಶ್‌.

'ಶಿವಾಜಿ ಪಾತ್ರದ ಗೆಟಪ್‌ಗಾಗಿ ತುಂಬಾನೇ ಯೋಚಿಸಿದೆವು. ಈವರೆಗೂ ಕಾಣದೇ ಇರುವಂಥ ರಮೇಶ್‌ ಅವರನ್ನು ನಾವು ನೋಡಬೇಕಿತ್ತು. ಹಾಗಾಗಿಯೇ ನಾಲ್ಕು ತಿಂಗಳ ಕಾಲ ಅವರನ್ನು ಶೇವ್‌ ಮಾಡಲು ಬಿಡಲಿಲ್ಲ. ಈ ಚಿತ್ರದಲ್ಲಿ ಎರಡು ವಿಭಿನ್ನ ಕಾಲ ಘಟ್ಟಗಳಿವೆ. ಒಂದು ಪ್ರಸ್ತುತ ನಡೆಯುವ ಕಥೆ. ಮತ್ತೊಂದು ಘಟಿಸಿ ಹೋದ ಗತ ಕಾಲದ ಕಥೆ. ಎರಡೂ ಕಾಲಘಟ್ಟದಲ್ಲಿ ಅವರು ವಿಭಿನ್ನವಾಗಿ ಕಾಣಬೇಕಿತ್ತು. ಹಾಗಾಗಿ ಏನೆಲ್ಲ ಸರ್ಕಸ್‌ ಮಾಡಬೇಕಾಯಿತು' ಎನ್ನುತ್ತಾರೆ ನಿರ್ದೇಶಕ ಆಕಾಶ್‌.

ಈ ಪಾತ್ರಕ್ಕಾಗಿ ನಿರ್ದೇಶಕರು ಅನೇಕ ಪೊಲೀಸ್‌ ಅಧಿಕಾರಿಗಳನ್ನು ಭೇಟಿ ಮಾಡಿ, ಮಾಹಿತಿ ಕಲೆ ಹಾಕಿದ್ದಾರಂತೆ. ವಾಸ್ತವಕ್ಕೆ ಹತ್ತಿರ ಇರುವಂಥ ಅಂಶಗಳನ್ನು ಹುಡುಕಿದ್ದಾರಂತೆ. ಹಾಗಾಗಿ ಇದೊಂದು ವಿಭಿನ್ನವಾಗಿ ನಿಲ್ಲುವಂಥ ಚಿತ್ರ' ಎನ್ನುತ್ತಾರೆ ನಿರ್ದೇಶಕರು.