*ಹರೀಶ್‌ ಬಸವರಾಜ್‌
ಅಳೆದು ಸುರಿದೂ ಸಿನಿಮಾ ಮಾಡುತ್ತಿರುವ ಧ್ರುವ ಸರ್ಜಾ ಹೊಸ ಚಿತ್ರ ಪೊಗರು ಇಂದು ಮುಹೂರ್ತ ಮಾಡಿಕೊಳ್ಳಲಿದ್ದು, ನಟ ಪುನಿತ್‌ ರಾಜ್‌ಕುಮಾರ್‌ ಚಿತ್ರಕ್ಕೆ ಚಾಲನೆ ನೀಡಲಿದ್ದಾರೆ. ಈ ಚಿತ್ರದಲ್ಲಿ ಇಬ್ಬರು ನಾಯಕಿಯರಾಗಿ ರಶ್ಮಿಕಾ ಮಂದಣ್ಣ ಹಾಗೂ ಶಾನ್ವಿ ನಟಿಸಲಿದ್ದಾರೆಂದು ನಿರ್ದೇಶಕ ನಂದಕಿಶೋರ್‌ ತಿಳಿಸಿದ್ದಾರೆ.
ಇದಕ್ಕೂ ಮೊದಲು ಹಿರಿಯ ನಟ ಕಮಲ್‌ಹಾಸನ್‌ ಪುತ್ರಿ ಶ್ರುತಿ ಹಾಸನ್‌ ನಟಿಸಿದ್ದಾರೆಂಬ ಸುದ್ದಿಗಳ ಬೆನ್ನಲ್ಲೇ ರಶ್ಮಿಕಾ ಹಾಗೂಶಾನ್ವಿ ನಟಿಸುತ್ತಾರೆಂಬ ಸುದ್ದಿ ಪಕ್ಕಾ ಆಗಿದೆ.
ರನ್ನ, ಟೈಗರ್‌, ಮುಕುಂದ ಮುರಾರಿ ಸೇರಿ ಸಾಕಷ್ಟು ಸಿನಿಮಾಗಳನ್ನು ನಿರ್ದೇಶನ ಮಾಡಿರುವ ನಂದಕಿಶೋರ್‌ ಈ ಚಿತ್ರವನ್ನು ನಿರ್ದೇಶನ ಮಾಡುತ್ತಿರುವುದು ಗೊತ್ತಿರುವ ವಿಚಾರ. ಈ ಚಿತ್ರದ ಮೂಲಕ ಬೇರೆ ಧ್ರುವನನ್ನು ತೋರಿಸಲು ನಂದಕಿಶೋರ್‌ ತಯಾರಿ ಮಾಡಿಕೊಂಡಿದ್ದಾರೆ. ಧ್ರುವ ಸಹ ಪೊಗರುಗಾಗಿ 30 ಕೆಜಿ ತೂಕ ಇಳಿಸಿಕೊಂಡಿದ್ದಾರೆ.
'ನಾನು ಮತ್ತು ಧ್ರುವ ಈ ಹಿಂದೆ ಹಯಗ್ರೀವ ಚಿತ್ರಕ್ಕಾಗಿ ಜತೆಯಾಗಿದ್ದೆವು, ಆದರೆ ಪೊಗರು ಬೇರೆ, ಹಯಗ್ರೀವ ಬೇರೆ. ಇದು ಪಕ್ಕಾ ಕಮರ್ಷಿಯಲ್‌ ಸಿನಿಮಾ. ಇಲ್ಲಿ ಧ್ರುವ 12 ವರ್ಷದ ಹುಡುಗನ ಪಾತ್ರ ಮಾಡುತ್ತಿದ್ದಾರೆ. ಕಥೆ ಧ್ರುವ 12 ವರ್ಷದವನಾದಗಿನಿಂದ, 25,30 ವರ್ಷದವರೆಗೂ ನಡೆಯುತ್ತದೆ. ಪಕ್ಕಾ ಸ್ವಮೇಕ್‌ ಚಿತ್ರ ಇದಾಗಿದ್ದು, ದೊಡ್ಡ ನಟರೇ ದಂಡೇ ಇದೆ' ಎನ್ನುತ್ತಾರೆ ನಂದ ಕಿಶೋರ್‌. ಈ ಚಿತ್ರದಲ್ಲಿ ಪ್ರಕಾಶ್‌ ರೈ, ಜಗಪತಿ ಬಾಬುರಂತಹ ದಿಗ್ಗಜ ನಟರು ಸಹ ನಟಿಸಿಲಿದ್ದಾರೆ ಎಂಬ ಮಾಹಿತಿಯನ್ನು ನಿರ್ದೇಶಕರು ನೀಡಿದ್ದಾರೆ.
'ಧ್ರುವ ಸರ್ಜಾ ಅವರ ಮೂರು ಚಿತ್ರಗಳು ದೊಡ್ಡ ಹಿಟ್‌ ಆಗಿದ್ದು, ಈ ಸಿನಿಮಾ ಬಗ್ಗೆಯೂ ಅಭಿಮಾನಿಗಳಲ್ಲಿ ಅದೇ ನಿರೀಕ್ಷೆ ಇದೆ. ಹಾಗಾಗಿ ಧ್ರುವ ಲುಕ್‌ನಲ್ಲಿ ಬದಲಾವಣೆ ಮಾಡಲಾಗಿದೆ. ನಾಯಕಿಯರ ಜತೆ ಈಗಾಗಲೇ ಡಿಸ್ಕಷನ್‌ ಮಾಡಲಾಗಿದ್ದು, ಇಬ್ಬರು ನಾಯಕಿಯರ ಸಿನಿಮಾದಲ್ಲಿ ನಟಿಸುವುದು ಬಹುತೇಕ ಖಚಿತವಾಗಿದೆ.'
-ನಂದಕಿಶೋರ್‌, ನಿರ್ದೇಶಕ