ನಾಟಕ ರಿಹರ್ಸಲ್‌ನಲ್ಲಿ ಭೇಟಿ, ಆಮೇಲೆ ಪ್ರೀತಿ ಬಳಿ ಎಂಗೇಜ್‌ ಎಂದ ರಿಷಿ

ಪದ್ಮಾ ಶಿವಮೊಗ್ಗ

ಆಪರೇಷನ್‌ ಅಲಮೇಲಮ್ಮ, ಕವಲುದಾರಿ ಚಿತ್ರಗಳಲ್ಲಿ ತಮ್ಮ ನಟನೆ ಮೂಲಕ ಸ್ಯಾಂಡಲ್‌ವುಡ್‌ನಲ್ಲಿ ಭರವಸೆಯ ನಟನೆನಿಸಿಕೊಂಡ ರಿಷಿ ಗೆಳತಿ ಸ್ವಾತಿ ಜತೆ ಎಂಗೇಜ್‌ಮೆಂಟ್‌ ಮಾಡಿಕೊಂಡಿದ್ದಾರೆ. ಎಂಜಿನಿಯರಿಂಗ್‌ ಸ್ನಾತಕೋತ್ತರ ಪದವೀಧರೆ ಆಗಿರುವ ಸ್ವಾತಿಯವರನ್ನು ರಿಷಿ ಮೊದಲು ಭೇಟಿಯಾಗಿದ್ದು ರಂಗಭೂಮಿಯಲ್ಲಿ. ಇಲ್ಲಿ ಬೆಳೆದ ಸ್ನೇಹ ಇವರನ್ನು ಬಾಳಸಂಗಾತಿ ಮಾಡಿದೆ.

'ಬೆಂಗಳೂರಿನಲ್ಲಿ ಒಂದು ನಾಟಕದ ರಿಹರ್ಸಲ್‌ನಲ್ಲಿ ಸ್ವಾತಿ ನಾನು ಭೇಟಿಯಾದೆವು. ಬೆಂಗಳೂರಿನಲ್ಲೇ ಇದ್ದಾರೆ. ಪರಿಚಯವಾಗಿ 2 ವರ್ಷವಾಗಿದೆ ಅಷ್ಟೆ. ಕಳೆದ ಒಂದು ವರ್ಷದಿಂದ ನಾವಿಬ್ಬರೂ ಒಬ್ಬರನ್ನೊಬ್ಬರು ಪ್ರೀತಿಸಲಾರಂಭಿಸಿದೆವು. ಅವರು ನನ್ನಂತೆ ಎಂಜಿನಿಯರಿಂಗ್‌ ಓದಿದ್ದಾರೆ. ಆದರೆ, ಬರಹವನ್ನು ವೃತ್ತಿಯಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ. ಕಂಟೆಂಟ್‌ ರೈಟರ್‌. ಇದರ ಜತೆ ಸಣ್ಣ ಕತೆಗಳನ್ನೂ ಬರೆಯುವ ಹವ್ಯಾಸ ಇದೆ. ತುಂಬಾ ಓದುತ್ತಾರೆ. ಹಾಗಾಗಿ ನಾವು ಪರಸ್ಪರ ತುಂಬಾ ಚರ್ಚಿಸುತ್ತಿದ್ದೆವು. ನಾನು ಬರೆದ ಸ್ಕ್ರಿಪ್ಟ್‌ ಬಗ್ಗೆ ಚರ್ಚಿಸುತ್ತಿದ್ದೆ. ಕೊನೆಗೆ ಮದುವೆ ನಿರ್ಧಾರಕ್ಕೆ ಬಂದೆವು' ಎಂದಿದ್ದಾರೆ ರಿಷಿ.

ಸ್ವಾತಿ ಜಪಾನ್‌ನಲ್ಲಿ ಬೆಳೆದವರು. ತಮಿಳುನಾಡು ಮೂಲದವರಾದರೂ, ಈಗ ಅವರ ಪೋಷಕರು ಹೈದರಾಬಾದ್‌ನಲ್ಲಿ ನೆಲೆಸಿದ್ದಾರೆ. 'ಸ್ವಾತಿಯ ಪೊಲೈಟ್‌ನೆಸ್‌ ನನಗೆ ತುಂಬಾ ಇಷ್ಟವಾಯಿತು. ಸೆನ್ಸಿಟಿವ್‌ ಆಗಿದ್ದಾರೆ. ನಾನು ಏನೇ ಮಾಡಿದರೂ ಅದಕ್ಕೆ ಬೆಂಬಲವಾಗಿ ನಿಲ್ತಾರೆ. ನನ್ನ ವೈಯಕ್ತಿಕ ಬದುಕಿನಲ್ಲಿ ಮೈಲಿಗಲ್ಲು. ನಾನು ಮದುವೆಯಾಗಲು ಬಯಸಿದ ಹಾಗೆ ಸ್ವಾತಿ ಇದ್ದಾರೆ. ಇದು ತುಂಬಾ ಖುಷಿ ಕೊಟ್ಟ ವಿಷಯ' ಎನ್ನುತ್ತಾರೆ ಅವರು.

ಅವರಿಗೆ ಕನ್ನಡ ಬರುತ್ತಿರಲಿಲ್ಲ. ನಾನೀಗ ಕಲಿಸಿದ್ದೇನೆ. ಕನ್ನಡ ಬರಹಗಾರರ ಅನುವಾದಗಳನ್ನು ಓದುತ್ತಿದ್ದಾರೆ. ಅವರಿಗೆ ಸಿನಿಮಾ ನೋಡುವ ಹವ್ಯಾಸ ಇರಲಿಲ್ಲ. ಈಗ ನನ್ನಿಂದಾಗಿ ನೋಡುತ್ತಿದ್ದಾರೆ. ಕವಲು ದಾರಿ ಸಿನಿಮಾ ಸ್ವಾತಿಗೆ ತುಂಬಾ ಆಯ್ತು' ಎಂದಿದ್ದಾರೆ ರಿಷಿ. ಇವರಿಬ್ಬರೂ ವರ್ಷದ ಕೊನೆಯಲ್ಲಿ ಮದುವೆಯಾಗುವ ಸಾಧ್ಯತೆಗಳಿವೆ.

----

ಮನೆಯವರು ಒಪ್ಪಿ ಮದುವೆ ನಿಶ್ಚಯಿಸಿದ್ದಾರೆ. ಕವಲುದಾರಿ ರಿಲೀಸ್‌ ಆದ ನಂತರ ಪ್ರಕಟಿಸೋಣ ಎಂದುಕೊಂಡಿದ್ದೆವು. ಅದರಂತೆ ಹೈದರಾಬಾದ್‌ನಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದೇವೆ. ಈ ವರ್ಷಾಂತ್ಯಕ್ಕೆ ಮದುವೆಯಾಗಲಿದ್ದೇವೆ.

-ರಿಷಿ, ನಟ