ನಿಖಿಲ್ ಕುಮಾರ್ ಅವರ ಎರಡನೇ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆ ಆಗಿರುವ ರಿಯಾ ನಲವಾಡಿ ಬಗ್ಗೆ ಸ್ಯಾಂಡಲ್ವುಡ್ನಲ್ಲಿ ಚರ್ಚೆ ಆಗುತ್ತಿದೆ. ಈ ಹುಡುಗಿ ಯಾರು, ಹಿನ್ನೆಲೆ ಏನು... ಹೀಗೆ ರಿಯಾ ಬಗ್ಗೆ ತಿಳಿದುಕೊಳ್ಳಲು ಸಾಮಾಜಿಕ ಜಾಲತಾಣಗಳನ್ನೇ ತಡಕಾಡಿದ್ದಾರೆ ನಿಖಿಲ್ ಅಭಿಮಾನಿಗಳು.
- ಶರಣು ಹುಲ್ಲೂರು
ಕನ್ನಡ ಸಿನಿಮಾ ರಂಗದಲ್ಲಿ ಎರಡು ದಿನಗಳಿಂದ ರಿಯಾ ನಲವಾಡಿ ಎಂಬ ಸುಂದರಿ ಸದ್ದು ಮಾಡುತ್ತಿದ್ದಾರೆ. ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಪುತ್ರ ನಿಖಿಲ್ ನಟನೆಯ ಎರಡನೇ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿರುವ ರಿಯಾ ಅವರ ಬಗ್ಗೆ ತಿಳಿದುಕೊಳ್ಳಲು ನಿಖಿಲ್ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳನ್ನು ತಡಕಾಡಿದ್ದಾರೆ. ರಿಯಾ ಯಾರು? ಹಿನ್ನೆಲೆ ಏನು? ಈ ಸಿನಿಮಾದಲ್ಲಿ ಅವರದ್ದು ಯಾವ ರೀತಿಯ ಪಾತ್ರ.. ಈ ಎಲ್ಲದರ ಕುರಿತು ಸ್ವತ: ರಿಯಾ ಇಲ್ಲಿ ಮಾತನಾಡಿದ್ದಾರೆ.
* ಇದ್ದಕ್ಕಿದ್ದಂತೆಯೇ ನಿಮ್ಮ ಹೆಸರು ಫೇಮಸ್ ಆಗಿದ್ದು ಹೇಗೆ?
- ನನ್ನ ಹೆಸರು ಫೇಮಸ್ ಆಗಿದೆ ಅಂತ ನನಗೆ ಅನಿಸ್ತಾ ಇಲ್ಲ. ಆದರೆ, ನಿಖಿಲ್ ಅವರ ಚಿತ್ರಕ್ಕೆ ನಾಯಕಿ ಯಾರಾಗಬಹುದು ಎಂಬ ಕ್ಯೂರಿಯಾಸಿಟಿ ಮೊದಲಿನಿಂದಲೂ ಇತ್ತು ಅನಿಸತ್ತೆ. ಹಿರೋಯಿನ್ ಆಗಿ ನಾನು ಆಯ್ಕೆ ಆಗಿರುವುದರಿಂದ ಪ್ರಚಾರಕ್ಕೆ ಬಂದಿದ್ದೇನೆ.
* ನಿಖಿಲ್ ಅವರ ಹೊಸ ಚಿತ್ರಕ್ಕೆ ಆಯ್ಕೆಯಾಗಿದ್ದು ಹೇಗೆ?
- ನನಗೆ ಗೊತ್ತಿರುವಂತೆ ನೂರಾರು ಹುಡುಗಿಯರು ಆಡಿಷನ್ನಲ್ಲಿ ಭಾಗವಹಿಸಿದ್ದಾರೆ. ನಾನೂ ಅವರಂತೆಯೇ ಪಾರ್ಟಿಸಿಪೇಟ್ ಮಾಡಿದ್ದೆ. ನನ್ನ ಅದೃಷ್ಟ ಅನಿಸತ್ತೆ, ನಾನು ಆಯ್ಕೆಯಾಗಿದ್ದೇನೆ. ಆಡಿಷನ್ ಸಂದರ್ಭದಲ್ಲಿ ನಿಖಿಲ್ ಜತೆಗೆ ನಟಿಸಲು ಸಣ್ಣದೊಂದು ದೃಶ್ಯ ಕೊಟ್ಟಿದ್ದರು. ಅದು ನಾಯಕ ಮತ್ತು ನಾಯಕಿ ಮೀಟ್ ಮಾಡುವ ಸೀನ್. ಅದರಲ್ಲಿ ನಾನು ಚೆನ್ನಾಗಿ ನಟಿಸಿದೆ ಅಂತ ನಿರ್ದೇಶಕ ಚೇತನ್ಕುಮಾರ್ ಹೇಳಿದರು.
* ರಿಯಾ ಅಂದರೆ ಯಾರು? ನಿಮ್ಮನ್ನು ಹೇಗೆ ಪರಿಚಯ ಮಾಡಿಕೊಳ್ಳುತ್ತೀರಿ?
- ನನ್ನ ತಂದೆ ಮೂಲತಃ ಬೆಳಗಾವಿಯವರು. ತಾಯಿಯ ಊರು ಅಥಣಿ. ಹದಿನೈದು ವರ್ಷಗಳಿಂದ ನಾವು ಬೆಂಗಳೂರಿನಲ್ಲಿಯೇ ವಾಸವಾಗಿದ್ದೇವೆ. ಇತ್ತೀಚೆಗೆ ನಡೆದ ಟ್ಯಾಲೆಂಟ್ ಹಂಟ್ ನ್ಯಾಷನಲ್ ಫ್ರೆಶ್ ಫೇಸ್ ಸ್ಪರ್ಧೆಯಲ್ಲಿ ನಾನು ಬೆಂಗಳೂರನ್ನು ಪ್ರತಿನಿಧಿಸಿ, ಗೆದ್ದಿದ್ದೇನೆ. ಸ್ಕೂಲ್ ದಿನಗಳಿಂದಲೂ ನನಗೆ ನಟಿಸುವ ಆಸಕ್ತಿ. ತಾಯಿ ಸಾಫ್ಟ್ವೇರ್ ಎಂಜಿನಿಯರ್. ತಂದೆ ಬಿಸ್ನೆಸ್ಮನ್. ಸಿನಿಮಾ ರಂಗಕ್ಕೆ ಬರುತ್ತಿರುವ ನಮ್ಮ ಕುಟುಂಬದ ಮೊದಲನೇ ಹುಡುಗಿ ನಾನು. ಭರತನಾಟ್ಯ ಹಾಗೂ ಪಾಶ್ಚಾತ್ಯ ನೃತ್ಯ ತರಬೇತಿ ಪಡೆದಿದ್ದೇನೆ. ಸದ್ಯ ಬೆಂಗಳೂರಿನ ಡೆಲ್ಲಿ ಪಬ್ಲಿಕ್ ಸ್ಕೂಲ್ನಲ್ಲಿ ಓದುತ್ತಿದ್ದೇನೆ.
* ಈ ಸಿನಿಮಾದಲ್ಲಿ ನಿಮಗೆ ಯಾವ ರೀತಿಯ ಪಾತ್ರ ಸಿಕ್ಕಿದೆ?
- ಟ್ರಡಿಷನಲ್ ಹುಡುಗಿಯಾಗಿ ಕಾಣಿಸಿಕೊಳ್ಳುತ್ತಿದ್ದೇನೆ. ಪಾತ್ರದ ಹಿನ್ನೆಲೆ ಬಗ್ಗೆ ಸದ್ಯಕ್ಕೆ ಏನೂ ಹೇಳಲಾರೆ. ಕಥಾ ನಾಯಕನಿಗೆ ನಾನು ಲವರ್. ಇದೊಂದು ಕೌಟುಂಬಿಕ ಸಿನಿಮಾ ಆಗಿದ್ದರಿಂದ ನನ್ನ ಪಾತ್ರ ಹೇಗಿರುತ್ತದೆ ಅಂತ ಎಲ್ಲರೂ ಊಹಿಸಿಕೊಳ್ಳಬಹುದು.
* ಕನ್ನಡದಲ್ಲಿ ನಿಮ್ಮ ಫೇವರಿಟ್ ಹೀರೋ ಮತ್ತು ಹಿರೋಯಿನ್ ಯಾರು?
- ನನ್ನ ಚಿತ್ರದ ನಾಯಕ ನಿಖಿಲ್ ನೆಚ್ಚಿನ ಹೀರೋ. ಕಿರಿಕ್ ಪಾರ್ಟಿ ಹುಡುಗಿ ಸಂಯುಕ್ತಾ ಹೆಗಡೆ ನೆಚ್ಚಿನ ನಾಯಕಿ. ಸಂಯುಕ್ತಾ ನನ್ನ ಬೆಸ್ಟ್ ಫ್ರೆಂಡ್ ಕೂಡ.
* ಏನೇನು ತಯಾರಿ ಮಾಡಿಕೊಂಡು ಸಿನಿಮಾ ರಂಗಕ್ಕೆ ಬಂದಿದ್ದೀರಿ?
- ಸದ್ಯ ನಟಿಸುತ್ತಿರುವ ಚಿತ್ರಕ್ಕೆ ಯಾವ ತಯಾರಿಯೂ ಬೇಕಿಲ್ಲ ಅನಿಸುತ್ತಿದೆ. ನಾನು ಹೇಗಿದ್ದೀನೋ, ಪಾತ್ರವೂ ಹೆಚ್ಚು ಕಡಿಮೆ ಹಾಗೆಯೇ ಇದೆ. ಮುಂದಿನ ಸಿನಿಮಾಗಳ ಬಗ್ಗೆ ಯೋಚನೆ ಮಾಡಿಲ್ಲ. ತರಬೇತಿ ಬೇಕು ಅನಿಸಿದರೆ, ಪಡೆದುಕೊಳ್ಳುವೆ.