ರಾಬರ್ಟ್‌ಗೆ ಕೆಲಸ ಶುರುವಾಗಿದೆ

ದರ್ಶನ್‌ ನಟನೆಯ ರಾಬರ್ಟ್‌ ಚಿತ್ರದ ಪೊಸ್ಟರ್ಸ್‌ ರಿಲೀಸ್‌ ಆಗಿ ಹಲವು ದಿನಗಳಾಗಿವೆ. ಈಗ ಮೇ ತಿಂಗಳಲ್ಲಿ ಚಿತ್ರ ಸೆಟ್ಟೇರುವ ಸಾಧ್ಯತೆಗಳಿವೆ ಎಂಬ ಸುದ್ದಿ ಹರಡಿದ್ದು, ನಿರ್ದೇಶಕ ತರುಣ್‌ ಸುಧೀರ್‌ ಇದನ್ನು ಅಲ್ಲಗಳೆದಿದ್ದಾರೆ. ಚಿತ್ರದ ಪ್ರೀಪ್ರೊಡಕ್ಷನ್‌ ಕೆಲಸ ಇನ್ನೂ ಬಾಕಿ ಇದೆ ಎಂದಿದ್ದಾರೆ ಅವರು.

'ಚಿತ್ರಕ್ಕೆ ತುಂಬಾ ಪ್ರಿಪರೇಷನ್‌ ಬೇಕಿದೆ. ಅದರ ಕೆಲಸ ನಡೆಯುತ್ತಿದೆ. ಶೂಟಿಂಗ್‌ ಡೇಟ್‌ ಇನ್ನೂ ಫಿಕ್ಸ್‌ ಮಾಡಿಲ್ಲ. ಯಾವಾಗ ಸೆಟ್ಟೇರುತ್ತೆ ಎಂದು ಈಗಲೇ ಹೇಳಲು ಸಾಧ್ಯವಿಲ್ಲ. ಇನ್ನೂ ಸಾಕಷ್ಟ ಸಮಯ ಬೇಕಿದೆ. ಆದಷ್ಟು ಬೇಗ ಶುರು ಮಾಡಬೇಕೆಂದಿದ್ದೇವೆ' ಎಂದಿದ್ದಾರೆ ಅವರು.

ದರ್ಶನ್‌ ರಾಬರ್ಟ್‌ ಚಿತ್ರದಲ್ಲಿ ನಟಿಸಲಿದ್ದಾರೆ ಎಂಬ ಸುದ್ದಿ ಹಿಂದೆಯೇ ಕೇಳಿಬಂದಿತ್ತು. ಅಲ್ಲದೆ, ಚಿತ್ರದ ಪೋಸ್ಟರ್‌ ಕೂಡಾ ರಿಲೀಸ್‌ ಆಗಿತ್ತು. ಪೋಸ್ಟರ್‌ ಕುತೂಹಲ ಕೆರಳಿಸಿತ್ತು. 2 ಪೊಸ್ಟರ್‌ಗಳು ವಿಭಿನ್ನ ಕತೆಯನ್ನು ಹೇಳುತ್ತಿದ್ದವು. ಒಂದರಲ್ಲಿ ಪುಟ್ಟ ಹುಡುಗನೊಬ್ಬನ ಕೈಯನ್ನು ಹಿಡಿದುಕೊಂಡಿರುವ ಚಿತ್ರ ಇದ್ದರೆ, ಇನ್ನೊಂದರಲ್ಲಿ ಹೆಗಲಲ್ಲಿ ರಾಮನನ್ನು ಹೊತ್ತ ಆಂಜನೇಯ ಕಾಣಿಸಿಕೊಂಡಿದ್ದ. ಪೋಸ್ಟರ್‌ನಲ್ಲಿ 'ಈ ಕೈಗೆ ಶಬರಿ ಮುಂದೆ ಸೋಲೋದು ಗೊತ್ತು, ರಾವಣನ ಮುಂದೆ ಗೆಲ್ಲೋದೂ ಗೊತ್ತು' ಎಂಬ ಟ್ಯಾಗ್‌ಲೈನ್‌ ನೀಡಲಾಗಿತ್ತು. ಇದು ಪಕ್ಕಾ ಆ್ಯಕ್ಷನ್‌ ಚಿತ್ರ ಎನ್ನುವುದನ್ನು ಹೇಳುತ್ತಿದೆ.

ತರುಣ್‌ ಸುಧೀರ್‌ ಈ ಹಿಂದೆ ಚೌಕ ಚಿತ್ರ ನಿರ್ದೇಶಿಸಿದ್ದರು. ಇದರಲ್ಲಿ ದರ್ಶನ್‌ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈ ಪಾತ್ರದ ಹೆಸರು ರಾಬರ್ಟ್‌. ಚಿತ್ರ ರಿಲೀಸ್‌ ನಂತರ ಇದೇ ಹೆಸರಿನಲ್ಲಿ ದರ್ಶನ್‌ಗೆ ಸುಧೀರ್‌ ಚಿತ್ರ ನಿರ್ದೇಶಿಸಲು ಮುಂದಾಗಿದ್ದಾರೆ. ದರ್ಶನ್‌ ಈಗ ಒಡೆಯ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರ ರಿಲೀಸ್‌ ನಂತರ ರಾಬರ್ಟ್‌ ಚಿತ್ರ ತೆರೆಗೆ ಬರಲಿದೆ.