ಶಿವಾಜಿ ಸೂರತ್ಕಲ್‌ನಲ್ಲಿ ಪೈಲಟ್‌ ಆದ ರೋಹಿತ್‌

'ಫೇಸ್‌ ಟು ಫೇಸ್‌' ಚಿತ್ರದಲ್ಲಿ ಲವರ್‌ ಬಾಯ್‌ ಆಗಿ ಅಭಿನಯಿಸಿದ್ದ ರೋಹಿತ್‌ ಭಾನುಪ್ರಕಾಶ್‌, ಇದೀಗ ರಮೇಶ್‌ ಅರವಿಂದ್‌ ಜತೆ ಹೊಸ ಸಿನಿಮಾದಲ್ಲಿ ಪ್ರಮುಖ ಪಾತ್ರವೊಂದನ್ನು ನಿರ್ವಹಿಸುತ್ತಿದ್ದಾರೆ.

'ಆಕಾಶ್‌ ಶ್ರೀವತ್ಸ ನಿರ್ದೇಶನ ಮಾಡುತ್ತಿರುವ 'ಶಿವಾಜಿ ಸೂರತ್ಕಲ್‌' ಚಿತ್ರದಲ್ಲಿ ಪತ್ತೆದಾರಿ ಕತೆ ಇದೆ. 'ನಾನು ಪೈಲಟ್‌ ಆಗಿ ಕಾಣಿಸಿಕೊಳ್ಳಲಿದ್ದೇನೆ. ಪೈಲಟ್‌ ವೃತ್ತಿಯನ್ನು ಬಿಟ್ಟು ರೆಸಾರ್ಟ್‌ ನೋಡಿಕೊಳ್ಳಲು ಮುಂದಾಗುವ ಹುಡುಗನ ಪಾತ್ರ. ರಮೇಶ್‌ ಅರವಿಂದ್‌ ಜತೆ ನಟಿಸುತ್ತಿರುವುದರಿಂದ ಶೂಟಿಂಗ್‌ ಸೆಟ್‌ನಲ್ಲಿ ಉತ್ತಮ ವಿಚಾರಗಳನ್ನು ನಿರಂತವಾಗಿ ಕಲಿಯುತ್ತಲೇ ಇದ್ದೇನೆ' ಎನ್ನುತ್ತಾರೆ ನಟ ರೋಹಿತ್‌ ಭಾನುಪ್ರಕಾಶ್‌.

ಶಿವಾಜಿ ಸೂರತ್ಕಲ್‌ ಚಿತ್ರದ ಚಿತ್ರೀಕರಣ ನಡೆಯುತ್ತಿರುವುದರಿಂದ ಅವರು ಬಿಝಿಯಾಗಿದ್ದಾರೆ. 'ಇದರ ಜತೆ ಮತ್ತೊಂದು ಹೊಸ ಚಿತ್ರಕ್ಕಾಗಿ ವರ್ಕೌಟ್‌ ಮಾಡಿ, ತಯಾರಿ ನಡೆಸುತ್ತಿದ್ದೇನೆ. ಶೀಘ್ರದಲ್ಲಿಯೇ ಆ ಚಿತ್ರದ ಬಗ್ಗೆ ಹೆಚ್ಚಿನ ಮಾಹಿತಿಯನ್ನು ನೀಡಲಿದ್ದೇನೆ. ಅದೊಂದು ಮಾಸ್‌ ಸಿನಿಮಾ ಎಂಬುದಷ್ಟೇ ಹೇಳಬಲ್ಲೆ' ಎಂದಿದ್ದಾರೆ ಅವರು. ನಟನೆಯ ಜತೆಗೆ ಹೋಟೆಲ್‌ ಬಿಝಿನೆಸ್‌ನಲ್ಲಿಯೂ ತೊಡಗಿಕೊಂಡಿದ್ದಾರೆ ಬಾನು ಪ್ರಕಾಶ್‌.

ಹಿರಿಯ ನಟ ಶಿವರಾಂ ಅಣ್ಣನ ಮಗ ರೋಹಿತ್‌ ಬಾನು ಪ್ರಕಾಶ್‌ ದೃಶ್ಯಂ ಚಿತ್ರದಲ್ಲಿ ವಿಲನ್‌ ಆಗಿ ನಟಿಸಿದ್ದರು. ಕೆಲ ವರ್ಷಗಳಿಂದ ಸ್ಟಾರ್‌ ನಟರ ಸಿನಿಮಾಗಳಲ್ಲಿ ನಟಿಸುತ್ತಿರುವ ಅವರು, ಹೊಸಬರ ಚಿತ್ರ ಫೇಸ್‌ 2 ಫೇಸ್‌ ಚಿತ್ರದಲ್ಲಿ ಮೊದಲ ಬಾರಿಗೆ ನಾಯಕ ನಟರಾಗಿ ನಟಿಸಿದ್ದರು.

ಉತ್ತಮ ಕಥೆ ಇರುವ ಸಿನಿಮಾ, ಒಳ್ಳೆಯ ಚಿತ್ರತಂಡದ ಜತೆ ಕೆಲಸ ಮಾಡಿ ಉತ್ತಮ ಕಲಾವಿದನಾಗಿ ಗುರುತಿಸಿಕೊಳ್ಳಬೇಕೆಂಬ ಆಸೆ ಇದೆ.

-ರೋಹಿತ್‌ ಭಾನುಪ್ರಕಾಶ್‌, ನಟ