ಗ್ಲಾಮರ್‌ ಫೋಟೋದಿಂದ ಟ್ರೋಲ್‌ಗೆ ಗುರಿಯಾದ ಸಂಯುಕ್ತಾ

ಹರೀಶ್‌ ಬಸವರಾಜ್‌

ಕಿರಿಕ್‌ ಪಾರ್ಟಿ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಕೊಟ್ಟ ಸಂಯುಕ್ತಾ ಹೆಗ್ಡೆ ಸಾಕಷ್ಟು ವಿವಾದಗಳಿಗೆ ಸಿಲುಕಿ ಹಾಕಿಕೊಂಡಿದ್ದರು. ಈಗ ಹೊಸ ಫೋಟೋಗಳನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಹರಿ ಬಿಡುವ ಮೂಲಕ ಮತ್ತೊಮ್ಮೆ ಟ್ರೋಲ್‌ ಆಗಿದ್ದಾರೆ. ಈ ಫೋಟೋಗಳಿಗೆ ನೆಟ್ಟಿಗರು ಸಾಮಾಜಿಕ ಜಾಲ ತಾಣಗಳಲ್ಲಿ ಸಾಕಷ್ಟು ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ.


ಕಾಲೇಜು ಕುಮಾರ ಚಿತ್ರದ ಡೇಟ್ಸ್‌ ವಿಚಾರದಲ್ಲಿ ಕಿರಿಕ್‌ ಮಾಡಿದ ಈ ಹುಡುಗಿ, ಆಮೇಲೆ ಬಿಗ್‌ ಬಾಸ್‌ ಮನೆಯಲ್ಲಿಯೂ ತನ್ನ ಕಿರಿಕ್‌ ವರಸೆಯಿಂದ ವಿವಾದ ಹುಟ್ಟು ಹಾಕಿ ಹೊರ ಬಂದಿದ್ದರು. ನೋಡಲು ಚೋಟು ಮೆಣಸಿನಕಾಯಿ ಥರ ಇರುವ ಸಂಯುಕ್ತಾ, ಸಖತ್‌ ಹಾಟ್‌ ಆಗಿ ಆಗಾಗ ಸೋಷಿಯಲ್‌ ಮೀಡಿಯಾದಲ್ಲಿ ಕಾಣಿಸಿಕೊಳ್ಳುತ್ತಿರುತ್ತಾರೆ. ಇತ್ತೀಚೆಗಷ್ಟೇ ಕೋರಿಯೋಗ್ರಫರ್‌ ಜತೆ ಸಖತ್‌ ಕೆಮಿಸ್ಟ್ರಿಯಲ್ಲಿ ಡಾನ್ಸ್‌ ಮಾಡಿ ವಿಡಿಯೋವೊಂದನ್ನು ಹರಿಬಿಟ್ಟಿದ್ದರು. ಅದು ಸಿಕ್ಕಾಪಟ್ಟೆ ವೈರಲ್‌ ಆಗಿತ್ತು. ಈಗ ಸಖತ್‌ ಗ್ಲಾಮರ್‌ ರೀತಿಯ ಫೋಟೋ ಶೂಟ್‌ ಮಾಡಿಸಿ ಮತ್ತೆ ಸುದ್ದಿಯಾಗಿದ್ದಾರೆ.

ಇತ್ತೀಚೆಗೆ ಫೋಟೋ ಶೂಟ್‌ ಮಾಡಿಸಿರುವ ಸಂಯುಕ್ತಾ, ಜೀನ್ಸ್‌ ಪ್ಯಾಂಟ್‌ ಮೇಲೆ ಬಿಕಿನ ತೊಟ್ಟು ಕೂಲಿಂಗ್‌ ಗ್ಲಾಸ್‌ ಹಾಕಿಕೊಂಡಿರುವ ಈ ಫೋಟೋಗಳನ್ನು, ಪೆಂಟಾಗ್ರಾಮ್‌ ಸ್ಟುಡಿಯೋ ವತಿಯಿಂದ ತೆಗೆಯಲಾಗಿದೆ. ಈ ಫೊಟೋಗಳನ್ನು ಇಟ್ಟುಕೊಂಡು ನೆಟ್ಟಿಗರು ಈಗಾಗಲೇ ಆನ್‌ಲೈನ್‌ನಲ್ಲಿ ವರಾತ ಆರಂಭಿಸಿದ್ದು, ಸಂಯುಕ್ತಾರನ್ನು ಸಖತ್‌ ಟ್ರೋಲ್‌ ಮಾಡಿದ್ದಾರೆ. ಇದು ಯಾವುದೇ ಸಿನಿಮಾಗಾಗಿ ಮಾಡಿಸಿದ್ದಲ್ಲಎಂದು ಕೆಲವೆಡೆ ವರದಿಯಾಗಿದೆ. ಈ ಬಗ್ಗೆ ಪ್ರತಿಕ್ರಿಯೆಗಾಗಿ ಪ್ರಯತ್ನಿಸಿದರೂ ಸಂಯುಕ್ತಾ ಸಿಗಲಿಲ್ಲ.