ಮೈಸೂರಿನ ಕಾಲೇಜು ಆವರಣದಲ್ಲಿ ಸುತ್ತಾಡುತ್ತಿರುವ ನಟ ರಕ್ಷಿತ್ ಶೆಟ್ಟಿ!

ಕನ್ನಡದ ನಟ, ನಿರ್ದೇಶಕ ರಕ್ಷಿತ್ ಶೆಟ್ಟಿ ಅವರು ಮೈಸೂರಿನ ಮಾನಸ ಗಂಗೋತ್ರಿ ಕ್ಯಾಂಪಸ್‌ನಲ್ಲಿ ಸದ್ಯಕ್ಕೆ ವಾಸ ಮಾಡುತ್ತಿದ್ದಾರೆ. ಕಾರಣ, ರಕ್ಷಿತ್ ಶೆಟ್ಟಿ ನಟನೆಯ '777 ಚಾರ್ಲಿ' ಚಿತ್ರದ ಚಿತ್ರೀಕರಣಕ್ಕಾಗಿ ನಟ ರಕ್ಷಿತ್ ಶೇಟ್ಟಿ ಮತ್ತು ಚಿತ್ರತಂಡ 'ಮೈಸೂರಿನ ಮಾನಸ ಗಂಗೋತ್ರಿ'ಯಲ್ಲಿ ಬೀಡುಬಿಟ್ಟಿದೆ.

ಕಿರಣ್ ರಾಜ್ ನಿರ್ದೇಶನದಲ್ಲಿ ಮೂಡಿ ಬರುತ್ತಿರುವ '777 ಚಾರ್ಲಿ' ಚಿತ್ರದ ಚಿತ್ರೀಕರಣ ಸಾಕಷ್ಟು ಮೊದಲೇ ಪ್ರಾರಂಭವಾಗಬೇಕಿತ್ತು. ಆದರೆ, ರಕ್ಷಿತ್ ಶೆಟ್ಟಿ ಅವರು ತಮ್ಮ 'ಅವನೇ ಶ್ರೀಮನ್ನಾರಾಯಣ' ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದರು. ಇತ್ತೀಚೆಗಷ್ಟೇ 'ಅವನೇ ಶ್ರೀಮನ್ನಾರಾಯಣ' ಚಿತ್ರೀಕರಣ ಮುಗಿಸಿರುವ ರಕ್ಷಿತ್ ಇದೀಗ 'ಚಾರ್ಲಿ' ತಂಡವನ್ನು ಸೇರಿಕೊಂಡಿದ್ದಾರೆ.

ಸದ್ಯ, ಮೈಸೂರಿನ ಮಾನಸ ಗಂಗೋತ್ರಿ ಕ್ಯಾಂಪಸ್ ನ ವಸತಿ ನಿವಾಸದಲ್ಲಿ ಚಿತ್ರೀಕರಣ ನಡೆಯುತ್ತಿದ್ದು, ಈ ದೃಶ್ಯಕ್ಕಾಗಿ ಮುಂಗಾರಿನ ಕಾಲವನ್ನು ಸೃಷ್ಟಿಸಬೇಕಾಗಿದೆಯಂತೆ. ಅಲ್ಲಿ ನಾಯಕನ ಮನೆಯ ಸುತ್ತಮುತ್ತಲಿನ ದೃಶ್ಯಗಳನ್ನು ಸೆರೆಹಿಡಿಯಲಾಗುತ್ತಿದೆ ಎನ್ನಲಾಗಿದೆ. ಲೊಕೇಶನ್ ಗಾಗಿ ಸಾಕಷ್ಟು ಸುತ್ತಾಡಿದ್ದ ಚಿತ್ರತಂಡ, ಫೈನಲ್ಲಾಗಿ ಮೈಸೂರನ್ನು ಆಯ್ಕೆ ಮಾಡಿಕೊಂಡಿದೆ. ಕಾರಣ, ಮೈಸೂರಿನಲ್ಲಿ ಬಹಳಷ್ಟು ಹಳೆಯ ಕಟ್ಟಡಗಳು ಇರುವುದರಿಂದ, ಹಾಗೂ ಇದು ಕಥೆಗೆ ಹೊಂದಿಕೆ ಆಗುವುದರಿಂದ ಇಲ್ಲಿಯೇ ಚಿತ್ರೀಕರಣ ನಡೆಸಲಾಗುತ್ತಿದೆ.

ಈ '777 ಚಾರ್ಲಿ' ಚಿತ್ರಕ್ಕೆ ಸುಮಾರು 30 ದಿನಗಳು ಮೈಸೂರಿನಲ್ಲಿ ಚಿತ್ರೀಕರಣ ಮುಗಿಸಲಿದೆಯಂತೆ ಚಿತ್ರತಂಡ. ಆ ಬಳಿಕ, ಎರಡನೇ ಭಾಗದ ಚಿತ್ರೀಕರಣಕ್ಕಾಗಿ ಚಿಕ್ಕಮಗಳೂರು ಮತ್ತು ಉತ್ತರ ಭಾರತದಲ್ಲಿ ಚಿತ್ರೀಕರಣ ಮಾಡುವ ಪ್ಲಾನ್ ಆಗಿದೆ ಎನ್ನಲಾಗಿದೆ. ಈ ಚಿತ್ರವನ್ನು ಈ ವರ್ಷದ ಕೊನೆಯಲ್ಲಿ ತೆರೆಗೆ ತರುವ ನಿರ್ಧಾರ ಮಾಡಲಾಗಿದೆ ಎಂದಿದೆ ಚಿತ್ರತಂಡ. ಒಟ್ಟಿನಲ್ಲಿ, ರಕ್ಷಿತ್ ಶೆಟ್ಟಿ ಚಿತ್ರಗಳು ತೆರೆಗೆ ಬಾರದೇ ಅವರ ಅಭಿಮಾನಿಗಳು ಆತಂಕಕ್ಕೆ ಸಿಲುಕಿದ್ದಾರೆ.

ಇದೀಗ, 'ಅವನೇ ಶ್ರೀಮನ್ನಾರಾಯಣ' ಚಿತ್ರೀಕರಣ ಮುಗಿಸಿದ್ದು, ಈ '777 ಚಾರ್ಲಿ' ಚಿತ್ರವು ಶೂಟಿಂಗ್ ಪ್ರಾರಂಭಿಸಿದೆ. ಅಲ್ಲಿಗೆ, ನಟ ರಕ್ಷಿತ್ ಶೆಟ್ಟಿಯವರ ಎರಡು ಸಿನಿಮಾಗಳು ಈ ವರ್ಷದ ಕೊನೆಯೊಳಗೆ ಪ್ರೇಕ್ಷಕರ ಮುಂದೆ ಬರಲಿವೆ ಎನ್ನಬಹುದು.