ಪೈಲ್ವಾನ್ ಚಿತ್ರದಲ್ಲಿ ಸುನಿಲ್ ಶೆಟ್ಟಿಯ ಪಾತ್ರದ ಗುಟ್ಟು ರಟ್ಟಾಯ್ತು!

ಕನ್ನಡದ ಸ್ಟಾರ್ ನಟ ಕಿಚ್ಚ ಸುದೀಪ್ ನಾಯಕತ್ವದ ಮುಂಬರುವ 'ಪೈಲ್ವಾನ್' ಚಿತ್ರದಲ್ಲಿ ಬಾಲಿವುಡ್ ನಟ ಸುನಿಲ್ ಶೆಟ್ಟಿ ಅಭಿನಯಿಸಿರುವುದು ಗೊತ್ತೇ ಇದೆ. ಆದರೆ ಈ ಚಿತ್ರದಲ್ಲಿ ನಟ ಸುನಿಲ್ ಶೆಟ್ಟಿಯ ಪಾತ್ರವೇನು ಎಂಬ ಗುಟ್ಟು ರಟ್ಟಾಗಿರಲಿಲ್ಲ. ಆದರೆ, ಇದೀಗ ಕಿಚ್ಚ ಸುದೀಪ್ ಮಾಡಿರುವ ಟ್ವೀಟ್‌ನಿಂದ ಸುನಿಲ್ ಶೆಟ್ಟಿ ಪಾತ್ರದ ಹೆಸರು ಜಗಜ್ಜಾಹೀರಾಗಿದೆ.

ಹೌದು, ಪೈಲ್ವಾನ್ ಚಿತ್ರದಲ್ಲಿ ಸುನಿಲ್ ಶೆಟ್ಟಿ ನಟಿಸಿರುವ ಪಾತ್ರದ ಹೆಸರು ಸರ್ಕಾರ್. "ಪೈಲ್ವಾನ್‌ ಚಿತ್ರದಲ್ಲಿ ಸುನಿಲ್ ಶೆಟ್ಟಿ ಅಣ್ಣ ನಟಿಸಿರುವ 'ಸರ್ಕಾರ್' ಪಾತ್ರದ ಪೋಸ್ಟರ್‌ಅನ್ನು ಇಂದು ಸಂಜೆ ಟ್ವೀಟ್ ಮಾಡಲಿದ್ದೇವೆ. ನಿಮ್ಮ ಬೆಂಬಲ ಮತ್ತು ಪ್ರೀತಿಗಾಗಿ ತುಂಬಾ ಧನ್ಯವಾದಗಳು... ನೀವು ಸೆಟ್‌ನಲ್ಲಿ ಅದ್ಭುತವಾಗಿದ್ರಿ.. ನೀವು ಪಾತ್ರದಲ್ಲೂ ಸಹ ಅಷ್ಟೆ ಅದ್ಭುತ ಎಂಬಂತೆ ಇದ್ರಿ.. " ಎಂದು ಸುದೀಪ್ ಅವರು ತಮ್ಮ ಟ್ವೀಟರ್ ಪೇಜ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ಅಲ್ಲಿಗೆ, ಸುನಿಲ್ ಶೆಟ್ಟಿ ಪಾತ್ರದ ಗುಟ್ಟು ರಟ್ಟಾಗಿದೆ. ಕಿಚ್ಚ ಮುಖ್ಯ ಭೂಮಿಕೆಯ ಪೈಲ್ವಾನ್ ಚಿತ್ರದಲ್ಲಿ ಸರ್ಕಾರ್ ಎಂಬ ಹೆಸರಿನ ಪಾತ್ರದಲ್ಲಿ ಸುನಿಲ್‌ ಶೆಟ್ಟಿ ನಟಿಸಿದ್ದಾರೆ. ಅಷ್ಟೇ ಅಲ್ಲ, ಚಿತ್ರದ ಶೂಟಿಂಗ್ ಸೆಟ್‌ನಲ್ಲಿ ಸುನಿಲ್ ಶೆಟ್ಟಿಯವರು ಬಹಳಷ್ಟು ಉತ್ತಮ ರೀತಿಯಲ್ಲಿ ನಡೆದುಕೊಂಡಿದ್ದರು ಎಂಬ ಸಂಗತಿ ಕೂಡ ಈ ಮೂಲಕ ರಿವೀಲ್ ಆಗಿದೆ. ಸುದೀಪ್ ಮಾಡಿರುವ ಈ ಒಂದು ಟ್ವೀಟ್ ಇದೀಗ ಚಿತ್ರದ ಸಾಕಷ್ಟು ಅಂಶಗಳನ್ನು ಹೊರಜಗತ್ತಿಗೆ ಅನಾವರಣ ಮಾಡಿದೆ ಎನ್ನಬಹುದು.

ಅಂದಹಾಗೆ, ಸುದೀಪ್ ನಾಯಕತ್ವದ 'ಪೈಲ್ವಾನ್' ಚಿತ್ರವು 9 ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ. ಅದ್ದೂರಿ ಮೇಕಿಂಗ್ ಹಾಗೂ ಬಹುತಾರಾಗಣದ ಈ ಚಿತ್ರವು ಆಗಸ್ಟ್‌ 8ರಂದು ಜಗತ್ತಿನಾದ್ಯಂತ ಬಿಡುಗಡೆಯಾಗಲಿದೆ. ಪೈಲ್ವಾನ್ ಚಿತ್ರದಲ್ಲಿ ನಟಿ ಆಕಾಂಕ್ಷಾ ಸಿಂಗ್ ನಾಯಕಿಯಾಗಿದ್ದು, ಈ ಚಿತ್ರವನ್ನು ಕೃಷ್ಣ ನಿರ್ದೇಶಿಸಿದ್ದಾರೆ. ಈ ಚಿತ್ರದ ಬಗ್ಗೆ ಈಗಾಗಲೇ ಭಾರೀ ನಿರೀಕ್ಷೆ ಸೃಷ್ಟಿಯಾಗಿದ್ದು, ಗ್ರಾಂಡ್‌ ರಿಲೀಸ್‌ ಆಗಲಿದೆ. ಸುದೀಪ್ ನಾಯಕತ್ವದ 'ಪೈಲ್ವಾನ್' ಚಿತ್ರದ ಬಿಡುಗಡೆಯ ಮಾರನೇ ದಿನ ದರ್ಶನ್ ನಾಯಕತ್ವದ 'ಕುರುಕ್ಷೇತ್ರ' ಚಿತ್ರವು ರಿಲೀಸ್ ಆಗಲಿದೆ.