ಚುನಾವಣೆ ಜಾಗೃತಿಯಲ್ಲಿ ಸ್ಯಾಂಡಲ್‌ವುಡ್‌ ನಟಿಯರು

ಕನ್ನಡದ ಹಿರಿಯ ನಟಿಯರ ಮಕ್ಕಳು ಒಟ್ಟಾಗಿ ನಟಿಸುತ್ತಿರುವ ಎಂಎಂಸಿಹೆಚ್‌ ಸಿನಿಮಾದ ನಾಯಕಿಯರು ಒಟ್ಟಾಗಿ ಚುನಾವಣಾ ಜಾಗೃತಿಗೆ ಮುಂದಾಗಿದ್ದಾರೆ. ಮೇಘನಾ ರಾಜ್‌, ಸಂಯುಕ್ತ ಹೊರನಾಡು, ಪ್ರಥಮಾ, ನಕ್ಷತ್ರ ಮತ್ತು ರಾಗಿಣಿ ಒಟ್ಟಾಗಿ ಟೀಸರ್‌ವೊಂದನ್ನು ರೆಡಿ ಮಾಡಿದ್ದು, ಇನ್ನೆರಡು ದಿನದಲ್ಲಿ ಆ ಟೀಸರ್‌ ಬಿಡುಗಡೆ ಮಾಡಲಿದೆಯಂತೆ ಚಿತ್ರತಂಡ.

ಈ ಸಿನಿಮಾದಲ್ಲಿ ಬಹುತೇಕವಾಗಿ ಮಹಿಳಾಮಣಿಗಳೇ ಇದ್ದಾರೆ. ಅಲ್ಲದೇ ರಾಗಿಣಿ ಈಗಾಗಲೇ ಚುನಾವಣೆಯ ಅಂಬಾಸಿಡರ್‌ ಕೂಡ. ಎಲ್ಲವನ್ನೂ ಬಳಸಿಕೊಂಡು ನಿರ್ದೇಶಕ ಮುಸ್ಸಂಜೆ ಮಹೇಶ್‌ ಟೀಸರ್‌ ರೆಡಿ ಮಾಡಿದ್ದಾರೆ. ಕಡ್ಡಾಯವಾಗಿ ಮತದಾನ ಮಾಡಿ ಎಂಬ ಸಂದೇಶ ಹೊತ್ತು ಈ ಟೀಸರ್‌ ಬರಲಿದೆ.

'ನಮ್ಮ ಸಿನಿಮಾದ ನಿರ್ಮಾಪಕರಾದ ಎಸ್‌.ಪುರುಷೋತ್ತಮ್‌, ಜಾನಕಿರಾಮ್‌ ಹಾಗೂ ಅರವಿಂದ್‌ ಇಂಥದ್ದೊಂದು ಐಡಿಯಾ ಕೊಟ್ಟರು. ನನಗೂ ಅದು ಸರಿ ಅನಿಸಿತು. ಇರುವ ಕಡಿಮೆ ಸಮಯದಲ್ಲಿಯೇ ಉತ್ತಮವಾಗಿರುವ ಟೀಸರ್‌ ರೆಡಿ ಮಾಡಿದ್ದೇನೆ. ಎಲ್ಲರೂ ತಪ್ಪದೇ ಮತದಾನ ಮಾಡಿ ಎಂದು ಹೇಳಿದ್ದೇವೆ. ಇಂಥದ್ದೊಂದು ಕಾರ‍್ಯಕ್ರಮದಲ್ಲಿ ನಾವು ಭಾಗಿಯಾಗಿದ್ದಕ್ಕೆ ನಮಗೊಂದು ಹೆಮ್ಮೆಯಿದೆ' ಎನ್ನುವುದು ಚಿತ್ರತಂಡದ ಮಾತು.