​ಯಶ್‌, ಸುದೀಪ್‌ ಇನ್ನೂ ಪಾವತಿಸಿಲ್ಲ ಪ್ರೊಫೆಷನಲ್‌ ಟ್ಯಾಕ್ಸ್‌!

ಒಂದಿಷ್ಟು ವರ್ಷಗಳಿಂದ ವೃತ್ತಿಪರ ತೆರಿಗೆ (ಪ್ರೊಫೆಷನಲ್‌ ಟ್ಯಾಕ್ಸ್‌) ಕಟ್ಟದ ಸ್ಯಾಂಡಲ್‌ವುಡ್‌ ನಟರಿಗೆ ರಾಜ್ಯ ವಾಣಿಜ್ಯ ತೆರಿಗೆ ಇಲಾಖೆ ನೋಟಿಸ್‌ ಕಳುಹಿಸಿತ್ತು. ಇದಾದ ಬಳಿಕ ಎಚ್ಚೆತ್ತುಕೊಂಡ ಕನ್ನಡ ಚಿತ್ರರಂಗದ ಸೆಲೆಬ್ರಿಟಿಗಳು ಉಳಿದ ಬಾಕಿಯನ್ನು ಬಡ್ಡಿ ಹಾಗೂ ದಂಡದ ಸಮೇತ ಕಟ್ಟಿದ್ದಾರೆ. ಆದರೆ ಈ ಸ್ಟಾರ್‌ ನಟರು ಮಾತ್ರ ತೆರಿಗೆ ಪಾವತಿಸುವುದರಲ್ಲಿ ಹಿಂದೆ ಬಿದ್ದಿದ್ದಾರೆ.

ಹೌದು, ರಾಕಿಂಗ್‌ ಸ್ಟಾರ್‌ ಯಶ್‌ ಮತ್ತು ಕಿಚ್ಚ ಸುದೀಪ್‌ ತಮ್ಮ ಬಾಕಿ ಉಳಿದ ವೃತ್ತಿಪರ ತೆರಿಗೆಯನ್ನು ಇದುವರೆಗೆ ಕಟ್ಟುವುದರಲ್ಲಿ ವಿಫಲರಾಗಿದ್ದಾರೆ ಎಂದು ರಾಜ್ಯ ವಾಣಿಜ್ಯ ತೆರಿಗೆ ಇಲಾಖೆಯ ಮೂಲಗಳು ತಿಳಿಸಿವೆ. ತೆರಿಗೆ ಇಲಾಖೆಯ ನೋಟಿಸ್‌ ನಂತರ ಎಚ್ಚೆತ್ತುಕೊಂಡ ಪುನೀತ್‌ ರಾಜ್‌ಕುಮಾರ್‌, ಉಪೇಂದ್ರ, ರಮ್ಯಾ, ದರ್ಶನ್‌, ದಿಗಂತ್‌, ಜಗ್ಗೇಶ್‌, ಶರ್ಮಿಳಾ ಮಾಂಡ್ರೆ ಸೇರಿದಂತೆ ಹಲವು ನಟ-ನಟಿಯರು ಬಾಕಿ ಉಳಿದ ವೃತ್ತಿಪರ ತೆರಿಗೆಯನ್ನು ಇಲಾಖೆಗೆ ಕಟ್ಟಿದ್ದಾರೆ. ಕಿಚ್ಚ ಸುದೀಪ್‌ ಮತ್ತು ರಾಕಿಂಗ್‌ ಸ್ಟಾರ್‌ ಯಶ್‌ ಇನ್ನೂ ತಮ್ಮ ವೃತ್ತಿಪರ ತೆರಿಗೆಯನ್ನು ಕಟ್ಟಬೇಕಿದೆ.

'ನಾವು ಸ್ಯಾಂಡಲ್‌ವುಡ್‌ ಕಲಾವಿದರಿಗೆ ನೋಟಿಸ್‌ ಕಳುಹಿಸಿದ್ದೇವೆ. ಆದರೆ ಯಶ್‌ ಮತ್ತು ಸುದೀಪ್‌ರಿಂದ ಇದುವರೆಗೆ ಉತ್ತರ ಬಂದಿಲ್ಲ.ಬೇರೆ ತೆರಿಗೆಗಳಿಗೆ ಹೋಲಿಸಿದರೆ ಪ್ರೊಫೆಷನಲ್‌ ಟ್ಯಾಕ್ಸ್‌ ಮೊತ್ತ ತುಂಬಾ ಕಡಿಮೆ (ವರ್ಷಕ್ಕೆ 2500 ರೂ.) ಆದಷ್ಟು ಬೇಗ ಅವರು ನಮಗೆ ಪ್ರತಿಕ್ರಿಯಿಸುತ್ತಾರೆಂದು ಭಾವಿಸಿದ್ದೇವೆ'ಎಂದು ತೆರಿಗೆ ಇಲಾಖೆಯ ಜಂಟಿ ಕಮಿಷನರ್‌ ಕೆ. ರಮಣ್‌ ಬೆಂಗಳೂರು ಮಿರರ್‌ಗೆ ತಿಳಿಸಿದ್ದಾರೆ.

ಮೂಲಗಳ ಪ್ರಕಾರ ಸುದೀಪ್‌ ಒಟ್ಟು 36,313 ರೂ. ತೆರಿಗೆ ಮೊತ್ತವನ್ನು ಕಟ್ಟಬೇಕಿದೆ. ಇದು ದಂಡ ಮತ್ತು ಬಡ್ಡಿಯನ್ನು ಒಳಗೊಂಡಿದೆ. ಸುದೀಪ್‌ ಅವರ 7 ವರ್ಷದ ಪ್ರೊಫೆಷನಲ್‌ ಟ್ಯಾಕ್ಸ್‌ ಬಾಕಿ ಇದೆ ಎನ್ನಲಾಗಿದೆ. ಇನ್ನು ರಾಕಿಂಗ್‌ ಸ್ಟಾರ್‌ ಯಶ್‌ 53,500 ರೂ. ವೃತ್ತಿಪರ ತೆರಿಗೆ ಕಟ್ಟಬೇಕಿದೆ. ಈ ಮೊತ್ತ ಸಹ ದಂಡ ಮತ್ತು ಬಡ್ಡಿಯನ್ನು ಒಳಗೊಂಡಿದೆ.

'ಈ ಸ್ಟಾರ್‌ ನಟರಿಗೆ ಸಾಕಷ್ಟು ಜನ ಅಭಿಮಾನಿಗಳಿರುತ್ತಾರೆ. ಈ ನಟರು ತೆರೆಯ ಹಿಂದೆಯೂ ಅಭಿಮಾನಿಗಳಿಗೆ ಮಾದರಿಯಾಗಬೇಕು. ಸಣ್ಣ ಮೊತ್ತದ ತೆರಿಗೆಯನ್ನು ವಂಚಿಸುವುದರಿಂದ ಸಮಾಜಕ್ಕೆ ಕೆಟ್ಟ ಸಂದೇಶ ಹೋಗುತ್ತದೆ' ಎಂದು ರಮಣ್‌ ಅಭಿಪ್ರಾಯಪಟ್ಟಿದ್ದಾರೆ.

ಇನ್ನು ಈ ಕುರಿತು ಪ್ರತಿಕ್ರಿಯಿಸಿರುವ ಯಶ್‌, 'ನನಗೆ ತೆರಿಗೆ ಇಲಾಖೆಯಿಂದ ನೋಟಿಸ್‌ ಬಂದಿರುವುದು ನಿಜ. ಕಳೆದ ಹತ್ತು ವರ್ಷಗಳ ಪ್ರೊಫೆಷನಲ್‌ ಟ್ಯಾಕ್ಸ್‌ ಬಾಕಿ ಇದೆ. ಒಟ್ಟು 53,500 ರೂ. ಬಾಕಿ ಇದ್ದು, ಈಗಾಗಲೇ ಡಿಡಿಗಳನ್ನು ಸಲ್ಲಿಸಿದ್ದೇನೆ. ಇತರ ತೆರಿಗೆ ರೂಪದಲ್ಲಿ ಕೋಟ್ಯಾಂತರ ಹಣವನ್ನು ನೀಡುವ ನಾವು, ಇಂತಹ ಸಣ್ಣ ಮೊತ್ತವನ್ನು ನಿರ್ಲಕ್ಷಿಸುವುದಿಲ್ಲ' ಎಂದು ಹೇಳಿದ್ದಾರೆ.


ಅದೇ ರೀತಿ ಕಿಚ್ಚ ಸುದೀಪ್‌ ಕೂಡ ಈ ವಿಚಾರವಾಗಿ ಪ್ರತಿಕ್ರಿಯಿಸಿದ್ದು, 'ಆಡಿಟರ್‌ಗಳು ಇದರ ಬಗ್ಗೆ ಪರೀಶಿಲಿಸುತ್ತಿದ್ದಾರೆ. ನನಗೆ ಸಂಬಂಧಿತ ಇತರ ತೆರಿಗೆಗಳನ್ನು ನಾನು ಕಟ್ಟಿದ್ದೇನೆ. ಆದರೆ ಪ್ರೊಫೆಷನಲ್‌ ಟ್ಯಾಕ್ಸ್‌ ಬಗ್ಗೆ ನನಗೆ ಮಾಹಿತಿ ಇರಲಿಲ್ಲ. ಎಷ್ಟು ಬಾಕಿ ಇದೆಯೋ ಅದನ್ನೆಲ್ಲ ಪೂರ್ಣಗೊಳಿಸುತ್ತೇನೆ' ಎಂದು ತಿಳಿಸಿದ್ದಾರೆ.