ಮದುವೆಯಾಗುವ ಹುಡುಗಿ ಬಗ್ಗೆ ಹಾಸ್ಯನಟ ಚಿಕ್ಕಣ್ಣ ಹೇಳಿದ್ದೇನು?

ಸ್ಯಾಂಡಲ್‌ವುಡ್ ಹಾಸ್ಯನಟರ ಬಗ್ಗೆ ಮಾತನಾಡುವಾಗ ಚಿಕ್ಕಣ್ಣ ಅವರನ್ನು ಬಿಟ್ಟು ಮಾತನಾಡುವುದು ಕಷ್ಟವೇ. ಅಂಥ ನಟ ಚಿಕ್ಕಣ್ಣ ಅವರಿಗೆ ಇತ್ತೀಚಿಗೆ 'ಹೆಮ್ಮೆಯ ಕನ್ನಡಿಗ' ಪ್ರಶಸ್ತಿ ದೊರಕಿದೆ. ಜೀ ವಾಹಿನಿಯಿಂದ ಈ ಪ್ರಶಸ್ತಿ ಪಡೆದು ಭಾರಿ ಹೆಮ್ಮೆ ಪಡುತ್ತಿದ್ದಾರೆ ನಟ ಚಿಕ್ಕಣ್ಣ.

ಇತ್ತೀಚಿನ ಕನ್ನಡದ ಸ್ಟಾರ್ ಚಿತ್ರಗಳಲ್ಲಿ ಚಿಕ್ಕಣ್ಣ ನಟಿಸದಿರುವ ಚಿತ್ರಗಳು ಅಪರೂಪ ಎನ್ನಬಹುದು. ಅಷ್ಟರಮಟ್ಟಿಗೆ ನಟ ಚಿಕ್ಕಣ್ಣ ಅವರು ಕನ್ನಡದಲ್ಲಿ ಫೇಮಸ್ ಆಗಿಬಿಟ್ಟಿದ್ದಾರೆ. ಅವರ ಸಂಭಾವನೆಯೂ ಕೂಡ ಇತ್ತೀಚಿಗೆ ಗಗನಕ್ಕೇರಿದೆ ಎನ್ನಲಾಗಿದೆ. ಒಟ್ಟಿನಲ್ಲಿ ವೃತ್ತಿಜೀವನದಲ್ಲಿ ಬಹಳಷ್ಟ ಬೆಳೆದಿರುವ ಚಿಕ್ಕಣ್ಣ ಅವರಿಗೆ ಸಹಜವಾಗಿಯೇ ಈ ಪ್ರಶಸ್ತಿ ಸಿಕ್ಕಿದೆ ಎನ್ನಬಹುದು.

ಬಹಳಷ್ಟು ಸಾಧಕರ ಜೊತೆ ಈ 'ಹೆಮ್ಮೆಯ ಕನ್ನಡಿಗ' ಪ್ರಶಸ್ತಿ ಪಡೆದ ಹಾಸ್ಯನಟ ಚಿಕ್ಕಣ್ಣ ಅವರಿಗೆ ಕಾರ್ಯಕ್ರಮದ ನಿರೂಪಕಿ ಅನುಶ್ರೀ ಅವರು "ನೀವು ಯಾವಾಗ ಮದುವೆ ಆಗುತ್ತೀರಿ? ಹುಡುಗಿ ಹೇಗಿರಬೇಕು?" ಎಂದು ಪ್ರಶ್ನಿಸಿದ್ದಾರೆ. ಇದಕ್ಕೆ ಚಿಕ್ಕಣ್ಣ ಬಹಳ ತಮಾಷೆಯಾಗಿ ಉತ್ತರಿಸಿದ್ದಾರೆ.

"ನಾನು ಕಲರ್ ಇಲ್ಲ, ಹೈಟ್ ವೈಟು ಏನೂ ಇಲ್ಲಾ.. ನನ್ನ ಫಿಗರ್ ನೋಡಿಕೊಂಡ್ರೆ ನಾನು ಚೆನ್ನಾಗಿರೋ ಹುಡುಗಿ ಸಿಗಬೇಕು ಎಂದು ಆಸೆ ಪಡೋದಕ್ಕಾಗುತ್ತಾ? ಹುಡುಗಿಗೆ ಒಳ್ಳೆ ಮನಸ್ಸಿದ್ದರೆ ಸಾಕು ಬಿಡಿ' ಎಂದು ಚಿಕ್ಕಣ್ಣ ನಗುತ್ತಾ ಹೇಳಿದ್ದಾರೆ. ಅಷ್ಟೇ ಅಲ್ಲ, ಸದ್ಯಕ್ಕೆ ತಾವು ಮದುವೆಯಾಗುವ ಬಗ್ಗೆ ಯೋಚನೆ ಮಾಡಿಲ್ಲ ಎಂದು ಚಿಕ್ಕಣ್ಣ ಹೇಳಿದ್ದಾರೆ.

ಅದಿರಲಿ, ಹಾಸ್ಯನಟ ಚಿಕ್ಕಣ್ಣ ಅವರು ಧಾರಾವಾಹಿ ಹಾಗೂ ಸಿನಿಮಾಗಳ ಮೂಲಕ ಬೆಳೆದು ಬಂದ ರೀತಿಯೇ ಒಂದು ಅಚ್ಚರಿ ಎನ್ನಬಹುದು. ಹಾಸ್ಯನಟರಲ್ಲಿ ಒಂದು ಪ್ರಮುಖ ಸ್ಥಾನ ಗಿಟ್ಟಿಸಿಕೊಂಡು, ತಮ್ಮದೇ ಸ್ವಂಥ ಛಾಪು ಮೂಡಿಸಿ ಸದ್ಯಕ್ಕೆ ಚಂದನವನದಲ್ಲಿ ಓಡುತ್ತಿರುವ ಕುದುರೆಯಾಗಿ ಗುರುತಿಸಿಕೊಂಡಿದ್ದಾರೆ ನಟ ಚಿಕ್ಕಣ್ಣ. ಅವರು ನಟಿಸಿರುವ ಚಿತ್ರಗಳ ಪಟ್ಟಿ ಬಹಳ ದೊಡ್ಡದು. ಹೀಗಾಗಿ ಅವರ ಹೆಸರೇ ಸಾಕು ಅವರನ್ನು ಪರಿಚಯ ಮಾಡಲು ಎಂದು ಧಾರಾಳವಾಗಿ ಹೇಳಬಹುದು.