*ಪದ್ಮಾ ಶಿವಮೊಗ್ಗ
ಯಶಸ್ಸಿನ ಅಲೆಯಲ್ಲಿ ತೇಲುತ್ತಿರುವ ಸ್ಯಾಂಡಲ್‌ವುಡ್‌ನ ಬಹುತೇಕ ನಟ ನಟಿಯರು ವಿಭಿನ್ನ ರೀತಿಯಲ್ಲಿ ಹೊಸ ವರ್ಷ ಆಚರಿಸಿದ್ದಾರೆ. ಹೊಸ ವರ್ಷ ತಮಗೆ ಹೇಗೆಲ್ಲ ಮುಖ್ಯ ಎಂಬುದನ್ನು ಹೇಳಿಕೊಂಡಿದ್ದಾರೆ. ಮುಖ್ಯವಾಗಿ ರಾಗಿಣಿ, ನಭಾ ನಟೇಶ್‌ ವಿಹಾನ್‌ ಗೌಡ ಹಾಗೂ ಸೋನು ಗೌಡ ಹೊಸ ವರ್ಷ ನವೋಲ್ಲಾಸ ತಂದಿದೆ ಎಂದು ಹೇಳಿದ್ದಾರೆ.
ಜತೆಗೆ ಸದ್ಯಕ್ಕೆ ಎಂಗೇಜ್‌ ಆಗಿ ಸಪ್ತಪದಿ ತುಳಿಯಲು ಸಿದ್ಧರಾಗಿರುವ ರಕ್ಷಿತ್‌ ಶೆಟ್ಟಿ ಹಾಗೂ ರಶ್ಮಿಕಾ ಮಂದಣ್ಣ ಹೊಸ ವರ್ಷದ ಸಂಭ್ರಮಕ್ಕಾಗಿ ವಿದೇಶಕ್ಕೆ ತೆರಳಿದ್ದಾರೆ. ಜತೆಗೆ ಎಲ್ಲರಿಗೂ ನ್ಯೂ ಯಿಯರ್‌ ಸುಖ ಸಂತೋಷಗಳನ್ನು ತರಲಿ ಎಂದು ಹಾರೈಸಿದ್ದಾರೆ.
ಇನ್ನು ಗೋಲ್ಡನ್‌ ಸ್ಟಾರ್‌ ಗಣೇಶ್‌ ಕೂಡ ಪ್ರತಿಯೊಬ್ಬರು ಹೊಸ ವರ್ಷದಲ್ಲಿ ಸಂತೋಷದಿಂದ ನಗು ನಗುತ್ತಾ ಇರಬೇಕೆಂದು ಹೇಳಿದ್ದಾರೆ.
ರಾಗಿಣಿಗೆ ಮನೆಯಲ್ಲೇ ಹೊಸ ವರ್ಷ
ಹೊಸ ವರ್ಷಾಚರಣೆ ಮನೆಯಲ್ಲೇ ಮಾಡುತ್ತಾ ಬಂದಿದ್ದೀನಿ. ಈ ಸಲವೂ ಮನೆಯಲ್ಲಿ ಫ್ಯಾಮಿಲಿ ಮತ್ತು ಸ್ನೇಹಿತರೊಂದಿಗೆ ಎಂಜಾಯ್‌ ಮಾಡ್ತಿದ್ದೀವಿ. ಫುಲ್‌ ಮಸ್ತಿ. ಜೋಕ್‌ ಮಾಡ್ತೀವಿ. ಶೂಟಿಂಗ್‌ ಬ್ಯಾಕ್‌ ಟು ಬ್ಯಾಕ್‌ ಇದ್ದಿದ್ದರಿಂದ ಹೊರಗೆ ಹೋಗೋ ಪ್ಲಾನ್‌ ಮಾಡೋಕೆ ಆಗಲಿಲ್ಲ.ಹೊಸ ವರ್ಷದಲ್ಲಿ ನನ್ನ ಅಭಿಮಾನಿಗಳಿಗೆ ಹೆಚ್ಚು ಎಂಟರ್‌ಟೈನ್‌ಮೆಂಟ್‌ ಕೊಡಬೇಕು ಅಂತ ಅಂದುಕೊಂಡಿದ್ದೇನೆ. 2018ರಲ್ಲಿ ಒಂದಾದ ಮೇಲೆ ಒಂದು ನನ್ನ ಸಿನಿಮಾ ಬಿಡುಗಡೆಯಾಗಲಿವೆ. ಇದು ನನಗೆ ತುಂಬಾ ಖುಷಿ ಮತ್ತು ಥ್ರಿಲ್‌ ಕೊಡ್ತಿದೆ.
ಹೈದರಬಾದ್‌ನಲ್ಲಿ ನಭಾ ನಟೇಶ್‌
ಈಗ ತೆಲುಗು ಚಿತ್ರದಲ್ಲಿ ನಟಿಸುತ್ತಿರುವ ನಟಿ ನಭಾ ನಟೇಶ್‌ ಹೈದರಾಬಾದ್‌ನಲ್ಲಿ ಶೂಟಿಂಗ್‌ನಲ್ಲಿ ಬಿಝಿ. ಹೊಸ ವರ್ಷ ಆಚರಣೆಯನ್ನೂ ಅಲ್ಲೇ ಮಾಡೋ ಪ್ಲಾನ್‌ ಮಾಡಿದ್ದಾರೆ. 'ಪ್ರತಿ ವರ್ಷ ಬೆಂಗಳೂರಿನಲ್ಲಿ ನ್ಯೂ ಯಿಯರ್‌ ಮಾಡುತ್ತಿದ್ದೆ. ಈ ವರ್ಷ ಶೂಟಿಂಗ್‌ ಭಾನುವಾರವೂ ಇತ್ತು.ಅದನ್ನು ಮುಗಿಸಿ ಬೆಂಗಳೂರಿಗೆ ಬರೋಣ ಅಂತ ಆಸೆ ಇತ್ತು. ಆದರೆ, ನ್ಯೂ ಯಿಯರ್‌ ಟ್ರಾಫಿಕ್‌ ಜಾಮ್‌ ಆಗಿರುತ್ತೆ ಅನ್ನೋ ಅನುಮಾನ. ಹಾಗಾಗಿ ಹೈದರಾಬಾದ್‌ನಲ್ಲೇ ಸ್ನೇಹಿತರೊಟ್ಟಿಗೆ ಎಂಜಾಯ್‌ ಮಾಡೋದು ಅಂತ ಡಿಸೈಡ್‌ ಮಾಡಿದೆ' ಎನ್ನುತ್ತಾರೆ ನಭಾ.
ಮನೆಯಲ್ಲೇ ಸಂಭ್ರಮ: ವಿಹಾನ್‌ ಗೌಡ
ನಾನು ಕಳೆದ ವರ್ಷದಿಂದ ಮನೆಯಲ್ಲಿ ಅಪ್ಪ, ಅಮ್ಮ ಮತ್ತು ಕಸಿನ್ಸ್‌ ಜತೆನೇ ಹೊಸ ವರ್ಷ ಆಚರಿಸುತ್ತ ಇರೋದು. ನನಗೆ ಯಾವ ಅಭ್ಯಾಸವೂ ಇಲ್ಲದೇ ಇರೋದ್ರಿಂದ ಸ್ನೇಹಿತರ ಜತೆ ಹೊರಗೆ ಸೆಲೆಬ್ರೇಟ್‌ ಮಾಡೋದು ಕಷ್ಟ. ಅವರೆಲ್ಲಾ ನಾನು ಬೋರ್‌ ಅಂತೆ. ನನಗೂ ಮನೆಯಲ್ಲಿ ಕಸಿನ್‌ ಫ್ಯಾಮಿಲಿ ಜತೆ ಕಾಲ ಕಳೆಯುತ್ತೇನೆ. ನಾನು ಹೊಸ ವರ್ಷದ ದಿನ ಕ್ಯಾನ್ಸರ್‌ನಿಂದ ಬಳಲುತ್ತಿರುವ ಒಬ್ಬ ಹುಡುಗಿಗೆ ವೈದ್ಯಕೀಯ ಖರ್ಚುವೆಚ್ಚ ಭರಿಸುತ್ತೇನೆ. ನನ್ನ ದುಡಿಮೆಯಿಂದ ಬಂದ ಹಣದಿಂದ ಸಹಾಯ ಮಾಡೋದ್ರಿಂದ ಇದು ನನಗೆ ಹೆಚ್ಚು ಖುಷಿ ಕೊಡುತ್ತೆ. ಯೋಗರಾಜ್‌ ಭಟ್‌ ನಿರ್ದೇಶನದ ಚಿತ್ರದಲ್ಲಿ ನಟಿಸುತ್ತಿದ್ದೇನೆ. ಸಾಕಷ್ಟು ಎಫರ್ಟ್‌ ಹಾಕಿ ಅವರ ನಿರೀಕ್ಷೆಯನ್ನು ಮುಟ್ಟಬೇಕು ಅನ್ನೋದು ಹೊಸ ವರ್ಷದ ರೆಸಲ್ಯೂಷನ್‌.
ಹೊಸ ವಾಚ್‌ ಖರೀದಿಸಿದ ಸೋನು
ಶೂಟಿಂಗ್‌ನಲ್ಲಿ ಫುಲ ಬಿಝಿ ಇದ್ದೆ. ನ್ಯೂ ಯಿಯರ್‌ಗೆ ಏನೂ ಪ್ಲಾನ್‌ ಮಾಡೋಕೆ ಆಗಲಿಲ್ಲ. ಮನೆಯಲ್ಲಿ ಎಲ್ಲರ ಜತೆ ಎಂಜಾಯ್‌ ಮಾಡೋದು. ತಂಗಿ ಮದುವೆ ನಿಶ್ಚಯವಾಗಿರೋದ್ರಿಂದ ಶಾಪಿಂಗ್‌ ಜೋರಾಗಿ ನಡೆಯುತ್ತಿದೆ. ಹೊಸ ವರ್ಷದಲ್ಲಿ ಸಮಯದ ಕಡೆ ಹೆಚ್ಚು ಗಮನ ನೀಡಬೇಕು ಎಂದುಕೊಂಡಿದ್ದೇನೆ. ಹೊಸ ವಾಚ್‌ ಕೊಂಡುಕೊಂಡೆ. ಒಳ್ಳೆಯ ದಿನಗಳ ನಿರೀಕ್ಷೆಯಲ್ಲಿದ್ದೇನೆ.