ರೆಬೆಲ್‌ ಆದ ವೀಕೆಂಡ್‌ ಹುಡುಗಿ ಸಂಜನಾ

ವೀಕೆಂಡ್‌ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿದ್ದ ನಟಿ ಸಂಜನಾ ಬುರ್ಲಿ ಈಗ ಕನ್ನಡ ಮತ್ತು ತಮಿಳು ಚಿತ್ರರಂಗದಲ್ಲಿ ಬಿಝಿಯಾಗಿದ್ದಾರೆ. ಸಬ್‌ ಇನ್‌ಸ್ಪೆಕ್ಟರ್‌, ಬ್ಲ್ಯಾಕ್‌ ಮೆಜಿಷಿಯನ್‌, ರೆಬೆಲ್‌ ಹುಡುಗಿಯ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ.

ತಮಿಳಿನಲ್ಲಿ ಈಶ್ವರ್‌ ಕೊಟ್ಟಾವೆ ನಿರ್ದೇಶನದ ಹೊಸ ಚಿತ್ರದಲ್ಲಿ ನಟಿಸಿದ್ದಾರೆ. ಮಹಿಳಾ ಪ್ರಧಾನ ಚಿತ್ರ ಇದಾಗಿದ್ದು, ಸಂಜನಾ ಬುರ್ಲಿ ಬ್ಲ್ಯಾಕ್‌ ಮೆಜಿಷಿಯನ್‌ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಪಾತ್ರಕ್ಕೆ ಪಾಸಿಟಿವ್‌ ಮತ್ತು ನೆಗೆಟಿವ್‌ ಶೇಡ್‌ಗಳೆರಡೂ ಇವೆ. ಇದರ ಜತೆಯಲ್ಲೇ ವಿನಯ್‌ ರಾಜ್‌ಕುಮಾರ್‌ ನಟನೆಯ ವೀರ ಕೇಸರಿ ಚಿತ್ರಕ್ಕೂ ಆಯ್ಕೆಯಾಗಿದ್ದಾರೆ.

'ವೀರ ಕೇಸರಿ ಆ್ಯಕ್ಷನ್‌ ಓರಿಯೆಂಟೆಡ್‌ ಚಿತ್ರ. ಈ ಚಿತ್ರದಲ್ಲಿ ನನಗೆ ಪ್ರಮುಖ ಪಾತ್ರವೊಂದು ಸಿಕ್ಕಿದೆ. ರೆಬೆಲ್‌ ಹುಡುಗಿಯ ಪಾತ್ರ. ಬಹಳ ನೊಂದ ಹುಡುಗಿ ಕೊನೆಗೆ ರೆಬೆಲ್‌ ಆಗುತ್ತಾಳೆ. ನಟನೆಗೆ ಪ್ರಾಮುಖ್ಯತೆ ಇರುವ ಪಾತ್ರ. ಇದೇ ರೀತಿ ಉಳಿದ ಚಿತ್ರಗಳಲ್ಲೂ ಡಿಫರೆಂಟ್‌ ಪಾತ್ರಗಳು ಸಿಕ್ಕಿವೆ. ಇದು ಖುಷಿಯ ವಿಚಾರ' ಎಂದು ಸಂತಸ ವ್ಯಕ್ತಪಡಿಸುತ್ತಾರೆ.

ರಾಧಾ ಸರ್ಚಿಂಗ್‌ ರಮಣ ಮಿಸ್ಸಿಂಗ್‌ ಎಂಬ ಹೊಸ ಚಿತ್ರದಲ್ಲಿ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಈ ಚಿತ್ರದಲ್ಲಿ ರಾಘವ್‌ ನಾಯಕರಾಗಿ ನಟಿಸಿದ್ದಾರೆ. ಆರ್ಕಿಟೆಕ್ಟ್ ವಿದ್ಯಾರ್ಥಿನಿಯಾಗಿ ಸಂಜನಾ ನಟಿಸಿದ್ದಾರೆ. ಈ ಸಸ್ಪೆನ್ಸ್‌, ಥ್ರಿಲ್ಲರ್‌ ಚಿತ್ರದಲ್ಲಿ ಯಮುನಾ ಶ್ರೀನಿಧಿ, ಗೋಪಿನಾಥ್‌ ಭಟ್‌ ಕೂಡಾ ನಟಿಸಿದ್ದಾರೆ. ಮಂಗಳೂರು ಮತ್ತು ಚೆನ್ನೈನಲ್ಲಿ ಚಿತ್ರೀಕರಣ ಮಾಡಲಾಗಿದೆ. ಈಗ ಮೈಸೂರಿನಲ್ಲಿ ಚಿತ್ರೀಕರಣಕ್ಕೆ ಪ್ಲಾನ್‌ ಮಾಡಲಾಗಿದೆ. ಎನ್‌.ಎಂ.ಶ್ರೀಕಾಂತ್‌ ಚೊಚ್ಚಲ ನಿರ್ದೇಶನದ ಚಿತ್ರ ಇದು.

'ನಿರ್ದೇಶಕ ಶ್ರೀಕಾಂತ್‌ ತಮ್ಮ ಲೈಫ್‌ ಸ್ಟೋರಿಯನ್ನೇ ಸಿನಿಮಾ ಮಾಡುತ್ತಿದ್ದಾರೆ. ಇದರಲ್ಲಿ ನಾನು ಕ್ರಿಶ್ಚಿಯನ್‌ ಹುಡುಗಿಯ ಪಾತ್ರದಲ್ಲಿ ನಟಿಸಿದ್ದೇನೆ' ಎಂದಿದ್ದಾರೆ ಅವರು.

ಅರವಿಂದ್‌ ಕೌಶಿಕ್‌ ನಿರ್ದೇಶನದ ಸ್ಟೀಲ್‌ ಪಾತ್ರೆ ಸಾಮಾನು ಚಿತ್ರದಲ್ಲೂ ನಟಿಸಿದ್ದಾರೆ. ಕಾಮಿಡಿ ಚಿತ್ರ ಇದಾಗಿದ್ದು, ನಾಯಕಿಯಾಗಿ ನಟಿಸಿರುವ ಸಂಜನಾಗೆ ಮೂವರು ಹೀರೊಗಳಿದ್ದಾರೆ. 'ಸ್ಟೀಲ್‌ ಪಾತ್ರೆ ಸಾಮಾನು ಅನ್ನೋದು ಹೀರೊಗಳ ನಿಕ್‌ ನೇಮ್‌ ಆಗಿದೆ. ಮೂವರೂ ನಾಯಕಿಯ ಹಿಂದೆ ಬೀಳುತ್ತಾರೆ. ನಿಸಾರ್‌ ಅಹಮ್ಮದ್‌ ನಿರ್ದೇಶನದ ಸ್ನೇಹರ್ಷಿ ಎಂಬ ಚಿತ್ರದಲ್ಲಿ ಇನ್‌ಸ್ಪೆಕ್ಟರ್‌ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಚಿತ್ರದ ರಿಲೀಸ್‌ಗೆ ಅವರು ಕಾದಿದ್ದಾರೆ.