ವೈರಲ್ ಆದ ನಾಕು ಮುಖ ಚಿತ್ರದ ಮದರ್ ಸೆಂಟಿಮೆಂಟ್ ಹಾಡು

ಅಮ್ಮನ ತ್ಯಾಗ ಹೇಳುವ ನಾಕುಮುಖ

ಅಮ್ಮನ ದಿನಾಚರಣೆ ಆಚರಿಸಿದ ಬೆನ್ನಲ್ಲೇ ಹೊಸಬರ ತಂಡವೊಂದು ನಾಕುಮುಖ ಚಿತ್ರದ ವಿಶೇಷ ಹಾಡೊಂದನ್ನು ರಿಲೀಸ್‌ ಮಾಡಿದ್ದು, ಕೆಲವೇ ಗಂಟೆಗಳಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಅಮ್ಮನ ಸಂಕಟ, ತ್ಯಾಗ, ಪ್ರೀತಿಯನ್ನು ಹೇಳುವ ಹಾಡನ್ನು ವಿಜಯ ಪ್ರಕಾಶ್‌ ಹಾಡಿದ್ದಾರೆ. "ಇಷ್ಟು ದೊಡ್ಡ ಹಿಟ್‌ ಆಗುತ್ತೆ ಎಂದುಕೊಂಡಿರಲಿಲ್ಲ. ಕೆಲವೇ ಗಂಟೆಗಳಲ್ಲಿ ಒಂದು ಲಕ್ಷ ವೀಕ್ಷಣೆ ಪಡೆದುಕೊಂಡಿದೆ. ತುಂಬಾ ಜನರು ಹಾರ್ಟ್‌ ಟಚಿಂಗ್‌ ಆಗಿದೆ ಎಂದಿದ್ದಾರೆ. ಇದು ನಮಗೆ ಸಿಕ್ಕ ಪ್ರೋತ್ಸಾಹ' ಎಂದಿದ್ದಾರೆ ನಿರ್ದೇಶಕ ಕುಶನ್‌ ಗೌಡ.

ನಾಕುಮುಖ ಚಿತ್ರ ನಿರ್ದೇಶನ ಮಾಡಿರುವ ಕುಶನ್‌ ಗೌಡ ತಾವೇ ಸ್ವತಃ ಬರೆದ ಹಾಡು 'ಅಳುವುದಾದರೆ ಅತ್ತುಬಿಡು'. ಕ್ರೈಂ ಸಸ್ಪೆನ್ಸ್‌ ಥ್ರಿಲ್ಲರ್‌ ಚಿತ್ರವಾಗಿದ್ದರೂ ನಾಕುಮುಖದಲ್ಲಿ ಅಮ್ಮನ ಬದುಕನ್ನು ತೋರಿಸಲಾಗಿದೆ ಎಂದಿದ್ದಾರೆ ನಿರ್ದೇಶಕರು.

'ಇದೊಂದು ಎಲ್ಲಾ ರೀತಿಯ ಫ್ಲೇವರ್‌ ಇರುವ ಚಿತ್ರ. ಕ್ರೈಂ ಥ್ರಿಲ್ಲರ್‌ ಆಗಿದ್ದರೂ ಅಮ್ಮ ಮಕ್ಕಳ ನಡುವಿನ ಮನಕಲಕುವ ಕತೆ ಇದೆ. ಅನಿರೀಕ್ಷಿತ ಘಟನೆಗಳಿಂದ ಡ್ರಗ್‌ ಅಡಿಕ್ಟ್ ಮಗ, ಹುಚ್ಚಿಯಂತಾದ ಮಗಳನ್ನು ಮಡಿಲಲ್ಲಿಟ್ಟುಕೊಂಡು ಕಾಪಾಡುವ ತಾಯಿ ಇದ್ದಾಳೆ. ಭಾವನಾತ್ಮಕವಾಗಿ ಕಾಡುವ ಪಾತ್ರ ಚಿತ್ರದಲ್ಲಿದೆ' ಎಂದಿದ್ದಾರೆ ಕುಶನ್‌. ಚಿತ್ರದ ಮೋಷನ್‌ ಟೀಸರ್‌ ಇತ್ತೀಚೆಗೆ ರಿಲೀಸ್‌ ಆಗಿದ್ದು, ಎಲ್ಲರ ಗಮನ ಸೆಳೆದಿದೆ.

'ಹೆಜ್ಜೆ ಹೆಜ್ಜೆಗೂ ಟ್ವಿಸ್ಟ್‌ ಇರುವ ಕತೆ ಚಿತ್ರದಲ್ಲಿದೆ. ಮಡಿಕೇರಿಯಲ್ಲಿ ಬಹುತೇಕ ಚಿತ್ರೀಕರಣ ಮಾಡಲಾಗಿದೆ. ಮರ್ಡರ್‌ ಮಿಸ್ಟ್ರಿ ಚಿತ್ರದಲ್ಲಿ ಸೆಂಟಿಮೆಂಟ್‌ ಕತೆ ಇದೆ' ಎಂದಿದ್ದಾರೆ ಕುಶನ್‌.

ಚಿತ್ರದಲ್ಲಿ ನಾಯಕಿಯಾಗಿ ಅಮೃತಾ ನಟಿಸಿದ್ದು, ಕುಮಾರ್‌, ಕುಶನ್‌ ಗೌಡ, ದರ್ಶನ್‌ ನಾಗ್‌ ಮತ್ತಿತರರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಅಮೃತಾ ಇತ್ತೀಚೆಗೆ ತೆರೆಕಂಡ ಅನುಷ್ಕಾ ಚಿತ್ರದ ನಂತರ ಈಗ ಸೂರಿ ನಿರ್ದೇಶನದ ಪಾಪ್‌ ಕಾರ್ನ್‌ ಮಂಕಿ ಟೈಗರ್‌ ಚಿತ್ರದಲ್ಲೂ ಮುಖ್ಯ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.