* ಶುಭಾ ವಿಕಾಸ್‌
ಅಸ್ಸಾಂನ ಶಾಸಕಿ ಅಂಗೂರ್‌ಲತಾ ದೇಕಾ, ಮೋಸ್ಟ್‌ ಬ್ಯೂಟಿಪುಲ್‌ ಆ್ಯಂಡ್‌ ಟ್ಯಾಲೆಂಟೆಡ್‌ ಅನ್ನುವುದರಲ್ಲಿ ಡೌಟೇ ಇಲ್ಲ. ಆದರೆ ಸಾಮಾಜಿಕ ಜಾಲತಾಣಗಳಲ್ಲಿ ಮಾತ್ರ ಅಂಗೂರ್‌ ಹಾಟ್‌ ಆ್ಯಂಡ್‌ ಸೆಕ್ಸಿ ಪಟ್ಟವನ್ನೇರಿದ್ದಾರೆ. ಡರ್ಟಿ ಪಾಲಿಟಿಕ್ಸ್‌ ಎನ್ನುವ ಲೆವಲ್‌ಗೆ ಅವರ ಬಗ್ಗೆ ಚರ್ಚೆ ನಡೆಯುತ್ತಿದೆ.
ಅಸ್ಸಾಂನ ವಿಧಾನಸಭೆಗೆ ಇತ್ತೀಚೆಗೆ ಆಯ್ಕೆಯಾದ ಬಿಜೆಪಿ ಅಭ್ಯರ್ಥಿ ಹಾಗೂ ನಟಿ ಅಂಗೂರ್‌ಲತಾ ಹಾಟ್‌ ನಟಿ ಅಂತಲೇ ಫೇಮಸ್‌ ಆದವರು. ತಾರೆಯರು ರಾಜಕೀಯ ಸೇರುವುದೇನೂ ಹೊಸತಲ್ಲ, ಆದರೆ ಅಂಗೂರ್‌ ಮಾತ್ರ ಇದೀಗ ಸಾಮಾಜಿಕ ತಾಣಗಳಲ್ಲಿ ವೈರಲ್‌ ಆಗಿದ್ದಾರೆ. ಅಂಗೂರ್‌ ಗೆದ್ದಿದ್ದೇ ತಡ, ಅವರ ಸಿನಿಮಾಗಳ ಚಿತ್ರಗಳು, ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ನಿರಂತರ ಅಪ್‌ಲೋಡ್‌ ಆಗುತ್ತಿವೆ. ಅವರ ಮಾದಕ ಭಂಗಿಯ ಚಿತ್ರಗಳನ್ನು ತಮ್ಮ ಫೇಸ್‌ಬುಕ್‌ ವಾಲ್‌ಗಳಲ್ಲಿ ಹಾಕಿಕೊಂಡು ಕೆಲವರು ಸಂಭ್ರಮಿಸುತ್ತಿದ್ದಾರೆ. ವಾಟ್ಸ್‌ ಆ್ಯಪ್‌ ಗ್ರೂಪ್‌ಗಳಲ್ಲಿ ಅವರ ಫೋಟೊದ ಮೇಲೆ ಚರ್ಚೆ ನಡೆಯುತ್ತಿದೆ.
ತಮ್ಮ ಬಗ್ಗೆ ಇಷ್ಟೆಲ್ಲ ಚರ್ಚೆ ನಡೆಯುತ್ತಿದ್ದರೂ ತಲೆ ಕೆಡಿಸಿಕೊಳ್ಳದೆ, ಹೇಳುವವರ ಬಾಯಿ ಮುಚ್ಚಿಸಲಿಕ್ಕಾಗುವುದಿಲ್ಲ ಎಂದಿದ್ದಾರೆ ಅಂಗೂರ್‌ ಲತಾ. ಬೋಲ್ಡ್‌ ಪಾತ್ರಗಳಲ್ಲಿ ಅಭಿನಯಿಸಿದ ಅಂಗೂರ್‌ ಅವರ ಫೋಟೊ, ವಿಡಿಯೋಗಳನ್ನು ಕೆದಕಿ ಕೆದಕಿ ತೆಗೆದು ಅಪ್‌ಲೋಡ್‌ ಮಾಡುತ್ತಿರುವವರು ನಿಜವಾಗಲೂ ಅವರದ್ದೇ ಫೋಟೊ ಅಪ್‌ಲೋಡ್‌ ಮಾಡುತ್ತಿದ್ದಾರಾ ಅಥವಾ ಮರುಸೃಷ್ಟಿಯಾ ಅನ್ನುವ ಊಹಾ ಪೂಹಗಳು ಕೂಡ ಇವೆ.
ಅಂತೂಇಂತೂ ನೆಟ್ಟಿಗರ ಬಾಯಿ ಚಪಲವಂತೂ ತೀರಿದೆ. ಮಾತನಾಡುವಷ್ಟು ಮಾತನಾಡಲಿ ಅಂತ ಅಂಗೂರ್‌ ತಮ್ಮನ್ನು ಸಾಮಾಜಿಕ ತಾಣಗಳಲ್ಲಿ ಕಾಲೆಳೆದವರಿಗೆ ಸೊಪ್ಪೇ ಹಾಕಿಲ್ಲ.
ಅದೇನೇ ಆಗಲಿ ನಟನೆಯೇ ಬೇರೆ ರಾಜಕೀಯವೇ ಬೇರೆ. ತೆರೆಯ ಮೇಲೆ ಹಾಟ್‌ ಆಗಿ ಕಾಣಿಸಿದಾಕ್ಷಣ ರಾಜಕೀಯ ವಲಯದಲ್ಲೂ ಅವರು ಹಾಗೆ ಇರುತ್ತಾರೆ ಅಂತೇನೂ ಇಲ್ಲ ಎಂದಿದ್ದಾರೆ ಹಲವರು.
ಸಮರ್ಥನೆ
ಸಾಮಾಜಿಕ ಜಾಲತಾಣಗಳಲ್ಲಿ ಅಂಗೂರ್‌ರನ್ನು ಟೀಕಿಸುವ, ವೈವಿಧ್ಯ ಭಂಗಿಯ ಚಿತ್ರಗಳನ್ನು ನೋಡಿ ಚಪಲ ತೀರಿಸಿಕೊಳ್ಳುವವರ ವರ್ಗ ಒಂದೆಡೆಯಾದರೆ ಈ ಶಾಸಕಿಯನ್ನು ಸಮರ್ಥಿಸಿಕೊಂಡ ವರ್ಗವೂ ದೊಡ್ಡದಿದೆ. ನಾಟಕ, ಸಿನಿಮಾ ಮಂದಿಯೆಲ್ಲ ಅಂಗೂರ್‌ ಅವರನ್ನು ಸಮರ್ಥಿಸಿಕೊಂಡಿದ್ದಾರೆ. ಟ್ಯಾಲೆಂಟೆಡ್‌ ನಟಿ ಅವರು. ರಾಜಕೀಯವನ್ನು ಕೂಡ ಸಮರ್ಥವಾಗಿ ನಿಭಾಯಿಸುತ್ತಾರೆ. ಅದಲ್ಲದೆ ಹೀಗೆಲ್ಲ ಸಾಮಾಜಿಕ ಜಾಲ ತಾಣಗಳಲ್ಲಿ ಕಾಲೆಳೆಯುವುದು ಸ್ಯಾಡಿಸ್ಟ್‌ ಮನಸ್ಥಿತಿ ಎಂದು ಹೇಳಲಾಗಿದೆ.
ಯಾರಿವರು?
ಅಸ್ಸಾಂನ ಹಳ್ಳಿಯೊಂದರಲ್ಲಿ ಜನಿಸಿದ ಅಂಗೂರ್‌ಲತಾ ದೇಕಾ ರಂಗಭೂಮಿ, ನೃತ್ಯ, ಮಾಡೆಲಿಂಗ್‌, ಚಲನಚಿತ್ರಗಳ ಮೂಲಕ ಹೆಸರು ಮಾಡಿದವರು. ಬೆಂಗಾಳಿ ಹಾಗೂ ಅಸ್ಸಾಮಿ ಚಿತ್ರಗಳ ಮೂಲಕ ಜನಪ್ರಿಯರಾದ ಅಂಗೂರ್‌ಲತಾ ಅಸ್ಸಾಂನ ಸಂಚಾರಿ ನಾಟಕದ ಮೂಲಕ ಸ್ಥಳೀಯ ಜನರ ನಾಡಿ ಬಡಿತ ಅರಿತವರು. ನಾಟಕದ ಮೂಲಕ ಅಸ್ಸಾಂನ ಊರೂರು ಅಲೆದು ಜನರೊಂದಿಗೆ ಬೆರೆತ ಅವರಿಗೆ ರಾಜಕೀಯ ಪ್ರವೇಶ ಸುಲಭವಾಗಿದೆ.
-----
ಸಿನಿಮಾ ಮಂದಿ ರಾಜಕೀಯಕ್ಕೆ ಬಂದಾಗ ಅವರನ್ನು ನೋಡುವ ದೃಷ್ಟಿಕೋನವೇ ಬೇರೆ. ತೆರೆಯ ಮೇಲೆ ಮೆಚ್ಚಿದವರು ತೆರೆಯ ಹಿಂದೆ ನಮಗೊಂದು ಬೇರೆಯದೇ ವ್ಯಕ್ತಿತ್ವ ಇದೆ ಎಂದು ನೋಡುವುದಿಲ್ಲ. ರಾಜಕೀಯಕ್ಕೆ ಬಂದು ಇವರೇನು ಮಾಡುತ್ತಾರೆ ಎನ್ನುವ ಒಂದು ರೀತಿಯ ನಿರ್ಲಕ್ಷ್ಯ ಮನೋಭಾವ ಇದೆ. ಅಂಗೂರ್‌ ನೋಡಲಿಕ್ಕೆ ಸುಂದರವಾಗಿದ್ದಾರೆ. ಅವರ ಬಗ್ಗೆ ಪರದೆಯ ಮೇಲಿನ ಇಮೇಜ್‌ ಕಲ್ಪಿಸಿಕೊಂಡೇ ಮಾತನಾಡುತ್ತಿದ್ದಾರೆ.
* ಭಾವನಾ, ನಟಿ ಹಾಗೂ ರಾಜಕಾರಣಿ
ಹೆಣ್ಣು ಮಕ್ಕಳು ಹೇಗಿದ್ದರೂ ಮಾತನಾಡುತ್ತಾರೆ. ಅದಕ್ಕೆ ರಾಜಕೀಯವೇ ಆಗಬೇಕು ಅಂತೇನೂ ಇಲ್ಲ. ಆದರೆ ಯಾರೋ ನಮ್ಮ ಬಗ್ಗೆ ಮಾತನಾಡುತ್ತಾರೆ ಎಂದರೆ ನಮ್ಮನ್ನು ಜನ ಗಮನಿಸುತ್ತಿದ್ದಾರೆ ಎಂದರ್ಥ.
- ರಕ್ಷಿತಾ , ನಟಿ ಹಾಗೂ ರಾಜಕಾರಣಿ