ಬನ್ಸಾಲಿ ಚಿತ್ರದಲ್ಲಿ ಖಾನ್ ಜೋಡಿ

ಸಂಜಯ್‌ ಲೀಲಾ ಬನ್ಸಾಲಿ ನಿರ್ದೇಶನದಲ್ಲಿ ಬಾಲಿವುಡ್‌ನ ಖಾನ್‌ ಜೋಡಿ ನಟಿಸಲಿದ್ದಾರೆನ್ನಲಾಗಿದೆ. ಬನ್ಸಾಲಿ ಹೊಸ ಚಿತ್ರಕ್ಕೆ ಈಗಾಗಲೇ ಸಿದ್ಧತೆ ನಡೆದಿದೆ.

ಹಿಂದಿಯ ಜನಪ್ರಿಯ ಚಿತ್ರ ಸೌದಾಗರ್‌ ಮತ್ತೆ ಹೊಸ ರೂಪದಲ್ಲಿ ತೆರೆಗೆ ಬರಲಿದೆಯಾ? ಹಾಗೊಂದು ಸುದ್ದಿ ಹರಿದಾಡುತ್ತಿದೆ. ಸಂಜಯ್‌ ಲೀಲಾ ಬನ್ಸಾಲಿ 1991ರಲ್ಲಿ ತೆರೆ ಕಂಡಿದ್ದ ಸೌದಾಗರ್‌ ಚಿತ್ರದ ಕತೆಯನ್ನು ಕಂಟೆಂಪರರಿಗೆ ಅಳವಡಿಸಿಕೊಂಡು ಸ್ಕ್ರಿಪ್ಟ್‌ ಮಾಡಿದ್ದಾರೆನ್ನಲಾಗಿದೆ.

ಈ ಚಿತ್ರದಲ್ಲಿ ಸಲ್ಮಾನ್‌ ಖಾನ್‌ ಮತ್ತು ಶಾರುಖ್‌ ಖಾನ್‌ ಒಟ್ಟಿಗೆ ನಟಿಸಲಿದ್ದಾರೆ. ಚಿತ್ರದಲ್ಲಿ ಇಬ್ಬರೂ ಸ್ನೇಹಿತರಾಗಿ ಕಾಣಿಸಿಕೊಳ್ಳಲಿದ್ದಾರೆ. ನಾಯಕ ನಟರಿಬ್ಬರೂ ಬದ್ಧವೈರಿಗಳಾಗಿದ್ದವರು, ನಂತರ ಶತ್ರುವಿನ ಶತ್ರು ಮಿತ್ರ ಎಂಬಂತೆ ಇಬ್ಬರೂ ತಮಗಿರುವ ವೈರಿಯನ್ನು ಸದೆಬಡಿಯಲು ಒಂದಾಗುವ ಕತೆ ಚಿತ್ರದಲ್ಲಿದೆ. ಸೌದಾಗರ್‌ ಚಿತ್ರದಲ್ಲಿ ದಿಲೀಪ್‌ ಕುಮಾರ್‌, ರಾಜ್‌ ಕುಮಾರ್‌ ನಟಸಿದ್ದು, ಶುಭಾಷ್‌ ಘಾಯ್‌ ನಿರ್ದೇಶನ ಮಾಡಿದ್ದರು. ಸೂಪರ್‌ ಹಿಟ್‌ ಸಿನಿಮಾ ಇದಾಗಿತ್ತು.