ಶಿವಣ್ಣ-ಹರ್ಷ ಸಂಗಮದ 'ಮೈ ನೇಮ್ ಈಸ್ ಅಂಜಿ' ಹೆಸರು ಬದಲಾಯ್ತು!

ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಮತ್ತು ನಿರ್ದೇಶಕ ಹರ್ಷ ಮತ್ತೆ ಒಂದಾಗಿದ್ದಾರೆ. ಈ ಮೂಲಕ ನಟ ಶಿವರಾಜ್ ಕುಮಾರ್ ಮತ್ತು ಹರ್ಷ 'ಹ್ಯಾಟ್ರಿಕ್' ಸಿನಿಮಾ ಮಾಡುತ್ತಿದ್ದಾರೆ. ಅವರಿಬ್ಬರ ಸಂಗಮದ 3ನೇ ಸಿನಿಮಾಗೆ ಈ ಮೊದಲು 'ಮೈ ನೇಮ್ ಈಸ್ ಅಂಜಿ' ಎಂಬ ಟೈಟಲ್ ನಿಗದಿಯಾಗಿತ್ತು. ಆದರೆ, ಸಿನಿಮಾದ ಹೆಸರು ಇದೀಗ ಬದಲಾಗಿದ್ದು, ಅದು 'ಭಜರಂಗಿ-2' ಆಗಿದೆ.

ಹೌದು, ನಿರ್ದೇಶಕ ಹರ್ಷ ಅವರ ಮುಂಬರುವ ಸಿನಿಮಾಗೆ 'ಭಜರಂಗಿ 2' ಎಂಬ ಟೈಟಲ್ ಇಡಲಾಗಿದೆ. ಕರುನಾಡ ಚಿತ್ರವರ್ತಿ ಶಿವರಾಜ್ ಕುಮಾರ್ ಅವರಿಗೆ ಹರ್ಷ ಮೊದಲ ಬಾರಿಗೆ ಆಕ್ಷನ್ ಕಟ್ ಹೇಳಿದ್ದ ಸಿನಿಮಾ 'ಭಜರಂಗಿ'. ಈಗ ಅದೇ ಟೈಟಲ್ ಮೂಲಕ ಮತ್ತೆ ಈ ಜೋಡಿ ಒಂದಾಗಿದೆ. 'ಭಜರಂಗಿ 2' ಟೈಟಲ್ ನಲ್ಲಿಯೇ ಹೇಳುವ ಹಾಗೆ ಆಂಜನೇಯನ ಬಗ್ಗೆಯ ಕಥೆ ಹೊಂದಿರುವುದಂತೂ ಪಕ್ಕಾ. ಅಂದಮೇಲೆ, ಈ ಸಿನಿಮಾದಲ್ಲಿಯೂ ಹನುಮಂತನ ಆರಾಧನೆಯನ್ನು ಹರ್ಷ ಮುಂದುವರೆಸಿದ್ದಾರೆ ಎನ್ನಬಹುದು.

ನಟ ಶಿವಬರಾಜ್‌ಕುಮಾರ್ ನಾಯಕತ್ವದ 'ಭಜರಂಗಿ-2' ಚಿತ್ರಕ್ಕೆ ಜಯಣ್ಣ ಈ ಸಿನಿಮಾಗೆ ಬಂಡವಾಳ ಹಾಕುತ್ತಿದ್ದಾರೆ. ಭಾವನ ಈ ಸಿನಿಮಾದ ನಾಯಕಿಯಾಗಿದ್ದು, ಮತ್ತೆ 'ಟಗರು' ಜೋಡಿ ಇಲ್ಲಿಯೂ ಒಂದಾಗಿದೆ. 'ಭಜರಂಗಿ 2' ಸಿನಿಮಾದ ಮುಹೂರ್ತ ಜೂನ್ 20 ರಂದು ನಡೆಯಲಿದೆ ಎನ್ನಲಾಗಿದೆ.

ಅಂದಹಾಗೆ, ಶಿವಣ್ಣ ನಟನೆಯ 'ಭಜರಂಗಿ' ಸಿನಿಮಾ 2013ರಲ್ಲಿ ಬಿಡುಗಡೆಯಾಗಿತ್ತು. ಶಿವರಾಜ್ ಕುಮಾರ್ ಮತ್ತು ಐಂದ್ರಿತಾ ರೇ ಜೋಡಿ ಆ ಚಿತ್ರದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದ್ದರು. ಈ ಚಿತ್ರವು ಸೂಪರ್ ಹಿಟ್ ದಾಖಲಿಸಿತ್ತು.