ಶಿವಲಿಂಗ ಸಡಗರಕ್ಕೆ ದಕ್ಷಿಣದ ತಾರೆಯರು

ಶಿವರಾಜ್‌ಕುಮಾರ್‌ ಮುಖ್ಯ ಭೂಮಿಕೆಯ ‘ಶಿವಲಿಂಗ’ ಚಿತ್ರ ಶತದಿನ ಪೂರೈಸಿದೆ. ಈ ಸಂಭ್ರಮಾಚರಣೆಗೆ ಸಾಕ್ಷಿಯಾಗಲು ದಕ್ಷಿಣ ಭಾರತದ ಸ್ಟಾರ್‌ ಹೀರೋಗಳು ಆಗಮಿಸಲಿದ್ದಾರೆ. ರಜನಿಕಾಂತ್‌, ಚಿರಂಜೀವಿ, ಬಾಲಯ್ಯ, ಮಮ್ಮೂಟ್ಟಿ, ಮೋಹನ್‌ ಲಾಲ್‌ ಸೇರಿದಂತೆ ಅನೇಕ ನಟರಿಗೆ ಈಗಾಗಲೇ ಆಹ್ವಾನ ನೀಡಲಾಗಿದೆ. ಜತೆಗೆ ಸ್ಯಾಂಡಲ್‌ವುಡ್‌ ಸಿನಿತಾರೆಯರೂ ಈ ಸಮಾರಂಭದಲ್ಲಿ ಭಾಗವಹಿಸುತ್ತಿದ್ದು, ಶತದಿನದ ನೆಪದಲ್ಲಿ ದಕ್ಷಿಣ ಭಾರತದ ಬಹುತೇಕ ನಟರು ಒಂದಾಗಲಿರುವುದು ವಿಶೇಷ.

‘ಇದು ಕೇವಲ ಶತದಿನದ ಸಂಭ್ರಮವಷ್ಟೇ ಅಲ್ಲ. ಶಿವರಾಜ್‌ ಕುಮಾರ್‌ ಸಿನಿಮಾ ರಂಗಕ್ಕೆ ಬಂದು ಮೂವತ್ತು ವರ್ಷವಾಯ್ತು. ಅಲ್ಲದೇ ಶಿವಣ್ಣನ ಮೊದಲ ಸಿನಿಮಾ ‘ಆನಂದ’ ತೆರೆಕಂಡದ್ದು ಜೂನ್‌. 19ರಂದು. ಹಾಗಾಗಿ ಅಂದೇ ಸಮಾರಂಭ ಆಯೋಜಿಸುತ್ತಿದ್ದೇವೆ. ಮನರಂಜನಾ ಕಾರ್ಯಕ್ರಮಗಳ ಜತೆ ಸೆಂಚೂರಿ ಸ್ಟಾರ್‌ಗೆ ಅದ್ಧೂರಿ ಸನ್ಮಾನ ಕೂಡ ಇದೆ’ ಅಂತಾರೆ ನಿರ್ಮಾಪಕ ಕೆ.ಎ.ಸುರೇಶ್‌. ದಕ್ಷಿಣ ಭಾರತದ ಹೆಸರಾಂತ ನಿರ್ದೇಶಕ ಪಿ.ವಾಸು ‘ಶಿವಲಿಂಗ’ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿರುವುದರಿಂದ, ದಕ್ಷಿಣದ ಹಲವು ಕಲಾವಿದರು ಸಮಾರಂಭದಲ್ಲಿ ಪಾಲ್ಗೊಳ್ಳುವುದು ಖಚಿತ ಎನ್ನಲಾಗಿದೆ. ಇದೇ ಸಮಾರಂಭದಲ್ಲಿ ಶಿವರಾಜ್‌ಕುಮಾರ್‌ ಅವರ ಮುಂದಿನ ಸಿನಿಮಾ ‘ಖದರ್‌’ ಟೀಸರ್‌ ಕೂಡ ರಿಲೀಸ್‌ ಆಗುತ್ತಿರುವುದು ವಿಶೇಷ.