ಸ್ಯಾಂಡಲ್‌ವುಡ್‌ನಲ್ಲಿ ಹೊಸ ಮೈಲುಗಲ್ಲು ಮುಟ್ಟಿದ ಶಿವಣ್ಣ

ಸ್ಯಾಂಡಲ್‍ವುಡ್ 'ಯುವರಾಜ' ಹ್ಯಾಟ್ರಿಕ್ ಹೀರೋ, ಸೆಂಚುರಿ ಸ್ಟಾರ್ ಶಿವರಾಜ್ ಕುಮಾರ್ ಬೆಳ್ಳಿಪರದೆಗೆ ಅಡಿಯಿಟ್ಟು ಇಂದಿನ (ಫೆಬ್ರವರಿ 19) ಬರೋಬ್ಬರಿ 33 ವರ್ಷಗಳು. ಈ ಸಂಭ್ರಮವನ್ನು ಸಹಜವಾಗಿಯೇ ಶಿವಣ್ಣ ಅಭಿಮಾನಿಗಳು ಸಂಭ್ರಮದಿಂದ ಬರಮಾಡಿಕೊಂಡಿದ್ದಾರೆ.

ಆದರೆ ಪುಲ್ವಾಮಾದಲ್ಲಿ ಯೋಧರ ಮೇಲೆ ನಡೆದ ದಾಳಿಯ ಹಿನ್ನೆಲೆಯಲ್ಲಿ ಇಡೀ ದೇಶವೇ ದುಃಖದಲ್ಲಿರುವಾಗ ಈಗ ಈ ಸಂಭ್ರಮ ಆಚರಿಸುವುದು ಬೇಡ ಎಂದು ಶಿವಣ್ಣ ತಮ್ಮ ಅಭಿಮಾನಿಗಳಿಗೆ ಸೂಚಿಸಿರುವ ಹಿನ್ನೆಲೆಯಲ್ಲಿ ಅದ್ದೂರಿ ಕಾರ್ಯಕ್ರಮವನ್ನು ಆಯೋಜಿಸಲಿಲ್ಲ ಅಭಿಮಾನಿಗಳು. ಈ ಬಗ್ಗೆ ಟ್ವಿಟರ್‌ನಲ್ಲಿ #33YearsForKFIwithShivanna #33YearsForShivannaInKFI ಎಂಬ ಹ್ಯಾಶ್‍ ಟ್ಯಾಗ್ ಮೂಲಕ ಸಂಭ್ರಮಿಸಿದ್ದಾರೆ.

ಶಿವರಾಜ್ ಕುಮಾರ್ ಅವರ ಮೂಲ ಹೆಸರು ನಾಗರಾಜು ಶಿವ ಪುಟ್ಟಸ್ವಾಮಿ. ಬೆಳ್ಳಿ ಪರದೆಗೆ ಅಡಿಯಿಟ್ಟ ಬಳಿಕ ಅವರ ಹೆಸರು ಶಿವ ರಾಜ್‌ಕುಮಾರ್ ಎಂದಾಯಿತು. ಸಿಂಗೀತಂ ಶ್ರೀನಿವಾಸರಾವ್ ನಿರ್ದೇಶನದ ಆನಂದ್ (1986) ಸಿನಿಮಾ ಮೂಲಕ ಬೆಳ್ಳಿಪರದೆ ಪ್ರವೇಶಿಸಿ ಅಲ್ಲಿಂದ ಆರಂಭವಾದ ಅವರ ಸಿನಿ ಪಯಣದಲ್ಲಿ ಭಿನ್ನ ಪಾತ್ರಗಳು, ವಿಭಿನ್ನ ಸಿನಿಮಾಗಳನ್ನು ಕಾಣಬಹುದು.

ರಥಸಪ್ತಮಿ (1986), ಜನುಮದ ಜೋಡಿ, ಓಂ (1995), ನಮ್ಮೂರ ಮಂದಾರ ಹೂವೆ, ಎಕೆ 47, ಜೋಗಿ, ಭಜರಂಗಿ, ಕಿಲ್ಲಿಂಗ್ ವೀರಪ್ಪನ್, ಶಿವಲಿಂಗ ಚಿತ್ರಗಳು ಹೊಸ ಮೈಲುಗಲ್ಲುಗಳಾಗಿವೆ. ಕನ್ನಡ ಚಿತ್ರೋದ್ಯಮದಲ್ಲಿ ಹೊಸ ದಾಖಲೆ ಬರೆದಂತಹ ಸಿನಿಮಾಗಳು.

2010ರಲ್ಲಿ ಶಿವಣ್ಣ ಕಿರುತೆರೆಗೂ ಅಡಿಯಿಟ್ಟರು. ನಾನಿರುವುದೆ ನಿಮಗಾಗಿ ಎಂಬ ಕಾರ್ಯಕ್ರಮದ ಮೂಲಕ ಮೊಟ್ಟ ಮೊದಲ ಕಿರುತೆರೆಗೆ ಲಗ್ಗೆ ಹಾಕಿದರು. ಸದ್ಯಕ್ಕೆ ಹೇಟ್ ಯೂ ರೋಮಿಯೋ ಎಂಬ ವೆಬ್ ಸೀರೀಸ್ ನಿರ್ಮಿಸುತ್ತಿದ್ದಾರೆ. ಇದರ ಚಿತ್ರೀಕರಣ ವಿಯಟ್ನಾಂನಲ್ಲಿ ನಡೆಯುತ್ತಿದೆ.

ದಿ ವಿಲನ್ ಚಿತ್ರದ ಬಳಿಕ ಶಿವಣ್ಣ ರುಸ್ತುಂ, ಕವಚ, ಎಸ್‍ಆರ್‌ಕೆ ಹಾಗೂ ದ್ರೋಣ ಸಿನಿಮಾಗಳ ಮೂಲಕ ಪ್ರೇಕ್ಷಕರ ಮುಂದೆ ಬರಲು ಸಿದ್ಧರಾಗಿದ್ದಾರೆ. ವರ್ಷ ಪೂರ್ತಿ ಬ್ಯುಸಿಯಾಗಿರುವ, ಲವಲವಿಕೆಯ ನಟ ಶಿವರಾಜ್ ಕುಮಾರ್ ಎಂಬುದರಲ್ಲಿ ಎರಡು ಮಾತಿಲ್ಲ.