ಸ್ಯಾಂಡಲ್‍ವುಡ್‌ನಲ್ಲಿ ಮಲ್ಟಿ ಸ್ಟಾರರ್ ಸಿನಿಮಾಗಳು ಬಂದಾಗಲೆಲ್ಲಾ ವಿವಾದಗಳು ತಪ್ಪಿದ್ದಲ್ಲ. ಈ ಹಿಂದೆ ಶಿವರಾಜ್ ಮಾರ್, ಉಪೇಂದ್ರ ತಾರಾಗಣದ 'ಪ್ರೀತ್ಸೆ' ಸಿನಿಮಾ ತೆರೆಕಂಡಾಗಲೂ ಇದೇ ರೀತಿಯ ವಾದ ವಿವಾದಗಳು ಉಂಟಾಗಿದ್ದವು. ಆದರೆ ಆಗೆಲ್ಲಾ ಟ್ವಿಟರ್, ಫೇಸ್‍ಬುಕ್ ಎಂಬ ಸಾಮಾಜಿಕ ಮಾಧ್ಯಮಗಳು ಇರಲಿಲ್ಲ. ಆದರೆ ಈಗಿನ ಪರಿಸ್ಥಿತಿ ಬೇರೆ ಇದೆ.

'ದಿ ವಿಲನ್' ಸಿನಿಮಾ ವಿರುದ್ಧ ಟ್ವಿಟರ್‌ನಲ್ಲಿ ಹೊಸ ಅಭಿಯಾನ ಶುರುವಾಗಿದೆ. ಚಿತ್ರದ ನಿರ್ದೇಶಕ ಪ್ರೇಮ್ ವಿರುದ್ಧ ಅಭಿಮಾನಿಗಳು ಗರಂ ಆಗಿದ್ದಾರೆ. ಇದಕ್ಕೆ ಅವರು ಗಮನಸೆಳೆಯುವ ಕೆಲವು ಕಾರಣಗಳನ್ನೂ ಪಟ್ಟಿ ಮಾಡಿದ್ದಾರೆ. ಕರುನಾಡ ಚಕ್ರವರ್ತಿ ಶಿವರಾಜ್ ಕುಮಾರ್‌ಗೆ ಸಿನಿಮಾದಲ್ಲಿ ಸಾಕಷ್ಟು ಪ್ರಾಮುಖ್ಯತೆ ನೀಡಿಲ್ಲ ಎಂಬ ಆರೋಪಗಳನ್ನು ಮಾಡಿದ್ದಾರೆ.


ಶಿವಣ್ಣ ಅಭಿಮಾನಿಗಳು ಕೇಳಿರುವ ಪ್ರಶ್ನೆಗಳು ಈ ರೀತಿ ಇವೆ. "ಪೋಸ್ಟರ್‌ಗಳಲ್ಲಿ ಡಾಕ್ಟರ್ ಎಂಬ ಬಿರುದನ್ನು ಯಾಕೆ ಬಳಸಿಲ್ಲ. ಜನಪ್ರಿಯ ನಟನಿಗೆ ಕೊಡುವ ಮರ್ಯಾದೆ ಇದೇನಾ? ಬಹುತೇಕ ಪೋಸ್ಟರ್‌ಗಳಲ್ಲಿ ಶಿವಣ್ಣ ಅವರನ್ನು ಎಡಭಾಗದಲ್ಲೇ ಯಾಕೆ ತೋರಿಸಿದ್ದೀರಾ? ದೀಪಣ್ಣನಿಗೆ ಯಾಕೆ ಮೂರು ಹಾಡು ಶಿವಣ್ಣನಿಗೆ ಯಾಕೆ ಎರಡೇ ಹಾಡು?" ಎಂಬ ಪ್ರಶ್ನೆಗಳನ್ನು ಎತ್ತಿದ್ದಾರೆ. ['ದಿ ವಿಲನ್' ವಿವಾದ: ಅಭಿಮಾನಿಗಳಿಗೆ ಸಂಯಮದ ಪಾಠ ಹೇಳಿದ ಸುದೀಪ್‌]
"ಶಿವಣ್ಣ ಟ್ವಿಟರ್‌ನಲ್ಲಿ ಇಲ್ಲ ಎಂಬ ಕಾರಣಕ್ಕೆ ದೀಪಣ್ಣನನ್ನೇ ಹೆಚ್ಚಾಗಿ ಯಾಕೆ ಹೊಗಳುತ್ತೀರ? ಶಿವಣ್ಣನಿಗೆ ತಲೆ ತುಂಬ ಕೂದಲಿದ್ದರೂ ವಿಗ್ ಯಾಕೆ ಹಾಕಿದ್ದು? ದೀಪಣ್ಣನಿಗೆ ಯಾಕೆ ಹೇರ್ ಕಟ್ ಮಾಡಿದ್ದು? ಕ್ಲೈಮ್ಯಾಕ್ಸ್ ಚೇಂಜ್ ಮಾಡಿದರೆ ಫಿಲಂ ನೋಡ್ತೀವಿ, ಇಲ್ಲ ಅಂದ್ರೆ ದೇವ್ರಾಣೆಗೂ ನಾವು ಪ್ರತಿಭಟಿಸಬೇಕಾಗುತ್ತದೆ" ಎಂಬ ಪ್ರಶ್ನೆಗಳನ್ನು ಚಿತ್ರದ ನಿರ್ದೇಶಕ ಪ್ರೇಮ್‍ಗೆ ಕೇಳಿದ್ದಾರೆ. #BoycottTheVillain ಎಂಬ ಹ್ಯಾಶ್‍ಟ್ಯಾಗ್‌ನಲ್ಲಿ ಪ್ರೇಮ್ ವಿರುದ್ಧ ಹೊಸ ಅಭಿಯಾನವನ್ನೇ ಆರಂಭವಾಗಿದೆ.