ದೇಹದಾನ ಮಾಡಿದ ಶಿವರಾಜ್‌ ಕುಮಾರ್ ಮತ್ತು ಸಹೋದರರು

ಅಪ್ಪನ ಹಾದಿಯಲ್ಲೇ ನಡೆದು ಇತರರಿಗೆ ಮಾದರಿ ಆಗುತ್ತಿದ್ದಾರೆ ನಟ ಶಿವರಾಜ್‌ ಕುಮಾರ್‌. ತಮ್ಮ ಸಹೋದರರು ಸೇರಿದಂತೆ ತಾವು ಕೂಡ ದೇಹದಾನ ಮಾಡುವುದಾಗಿ ಹೇಳಿದ್ದಾರೆ ಶಿವರಾಜ್‌ ಕುಮಾರ್‌. ಸದ್ಯ ಅವರು ಕವಚ ಸಿನಿಮಾದಲ್ಲಿ ನಟಿಸುತ್ತಿದ್ದು, ಈ ಸಿನಿಮಾದಲ್ಲಿ ಅವರು ಅಂಧನಾಗಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾದ ಟೀಸರ್‌ ರಿಲೀಸ್‌ ವೇಳೆ, ಇಂಥದ್ದೊಂದು ಮಾದರಿಯ ಕೆಲಸಕ್ಕೆ ಅವರು ಕೈ ಹಾಕಿದ್ದಾರೆ.

'ಅಪ್ಪಾಜಿ (ರಾಜ್‌ಕುಮಾರ್‌) ನೇತ್ರದಾನ ಮಾಡಿ, ಇತರರಿಗೆ ಬೆಳಕಾಗಿದ್ದಾರೆ. ಹಾಗಾಗಿಯೇ ನಾವು ಕೂಡ ದೇಹದಾನಕ್ಕೆ ಮುಂದಾಗಿದ್ದೇವೆ. ಸತ್ತ ನಂತರ ನಮ್ಮ ದೇಹವೂ ಉಪಯೋಗಕ್ಕೆ ಬರಲಿ ಎಂಬುದು ನಮ್ಮ ಆಸೆ ಆಗಿದೆ. ಹಾಗಾಗಿಯೇ ಇಂಥದ್ದೊಂದು ನಿರ್ಧಾರಕ್ಕೆ ಬಂದಿದ್ದೇವೆ' ಅಂದಿದ್ದಾರೆ ಶಿವರಾಜ್‌ಕುಮಾರ್‌.

ಟೀಸರ್‌ ಬಿಡುಗಡೆ ಕಾರ್ಯಕ್ರಮದಲ್ಲಿ ಅನೇಕ ಅಂಧ ಮಕ್ಕಳು ಹಾಜರಿದ್ದರು. ಅವರ ಸಮ್ಮುಖದಲ್ಲಿಯೇ ಇಂಥದ್ದೊಂದು ಮಾದರಿಯ ಕೆಲಸಕ್ಕೆ ಅವರು ಚಾಲನೆ ನೀಡಿದರು.

ಶಿವರಾಜ್‌ ಕುಮಾರ್‌ರ ಈ ಕೆಲಸಕ್ಕೆ ಸ್ಯಾಂಡಲ್‌ವುಡ್‌ನಲ್ಲಿ ಮೆಚ್ಚುಗೆಯ ಮಾತು ಕೇಳಿ ಬಂದಿದೆ. 'ಶಿವಣ್ಣ ತುಂಬಾ ಸರಳ ವ್ಯಕ್ತಿ. ಅವರು ಆಗಾಗ್ಗೆ ಇಂತಹ ಸಮಾಜಮುಖಿ ಕೆಲಸಗಳನ್ನು ಮಾಡುತ್ತಲೇ ಇರುತ್ತಾರೆ. ಅವರೆಲ್ಲ ನಮಗೆ ಮಾದರಿ' ಅಂದರು ನಟ ಧನಂಜಯ್‌.

'ಕಣ್ಣಿದ್ದರೂ ಕಣ್ಣಿಲ್ಲದಂತೆ ನಟಿಸುವುದು ತುಂಬಾ ಕಷ್ಟ. ಅವರ ಭಾವನೆಗಳನ್ನು ಕೊಂಚ ಮಟ್ಟಿಗೆ ಅರ್ಥ ಮಾಡಿಕೊಂಡು ಕವಚ ಸಿನಿಮಾದಲ್ಲಿ ನಟಿಸಿದ್ದೇನೆ. ಇಂತಹ ಪಾತ್ರದಲ್ಲಿ ನಾನು ಕಾಣಿಸಿಕೊಂಡಿದ್ದಕ್ಕೆ ಹೆಮ್ಮೆ ಪಡುತ್ತೇನೆ' ಅಂದಿದ್ದಾರೆ ಶಿವರಾಜ್‌.