ಮನೆ ಮೂರಾಗಿದ್ದರೂ ಮನಸ್ಸು ಒಂದೇ ಎಂದ ಶಿವಣ್ಣ

* ಹರೀಶ್‌ ಬಸವರಾಜ್‌

Vijaya Karnataka Web

ಪುನೀತ್‌ ರಾಜ್‌ಕುಮಾರ್‌, ರಾಘವೇಂದ್ರ ರಾಜ್‌ಕುಮಾರ್‌ ಮತ್ತು ನಾನು ಬೇರೆ ಬೇರೆ ಮನೆಗಳಲ್ಲಿ ವಾಸವಿರಬಹುದು. ಆದರೆ ನಮ್ಮ ಮನಸ್ಸುಗಳು ಒಂದೇ. ಯಾವತ್ತಿಗೂ ನಾವು ಒಟ್ಟಾಗಿಯೇ ಇರುತ್ತೇವೆ ಎಂದು ಶಿವರಾಜ್‌ ಕುಮಾರ್‌ ಹೇಳಿದರು. ಗುರುವಾರ ನಡೆದ ಗ್ರಾಮಯಾಣ ಚಿತ್ರದ ಟೀಸರ್‌ ಬಿಡುಗಡೆ ಕಾರ್ಯಕ್ರಮದಲ್ಲಿ ಗಾಜನೂರನ್ನು ನೋಡಿ ತಮ್ಮ ಹಳೆಯ ನೆನಪಿಗೆ ಜಾರಿದ ಅವರು ಆನೇಕ ಆಸಕ್ತಿಕರ ವಿಷಯಗಳನ್ನು ಹಂಚಿಕೊಂಡಿದ್ದಾರೆ.

'ಎಲ್ಲ ಕುಟುಂಬಗಳಲ್ಲೂ ಸಣ್ಣಪುಟ್ಟ ಮನಸ್ತಾಪ, ಭಿನ್ನಾಭಿಪ್ರಾಯಗಳು ಇದ್ದೇ ಇರುತ್ತವೆ. ಅದನ್ನು ಯಾರೂ ತೋರಿಸಿಕೊಳ್ಳವುದಿಲ್ಲ. ಅಲ್ಲದೇ ನಮ್ಮನ್ನು ನಾವು ಎಂದಿಗೂ ಬಿಟ್ಟುಕೊಡುವುದಿಲ್ಲ. ಆಸ್ತಿ ವಿಚಾರದಲ್ಲೂ ನಾವು ಮೂವರು ಆಸೆ ಪಟ್ಟವರಲ್ಲ. ಅದರ ಬಗ್ಗೆ ಮಾತನಾಡಿದವರೂ ಅಲ್ಲ ನಾವು. ರಾಜ್‌ಕುಮಾರ್‌ ಮಕ್ಕಳು ಯಾವತ್ತಿಗೂ ಒಂದೆ'ಎಂದು ಹೇಳಿದರು.


'ಇನ್ನು ನನಗೆ ಗ್ರಾಮಯಾಣ ಸಿನಿಮಾದ ಟೀಸರ್‌ನ್ನು ಅಪ್ಪಾಜಿ ಮನೆಯಲ್ಲಿ ಶೂಟಿಂಗ್‌ ಮಾಡಿದ್ದನ್ನು ನೋಡಿ ನನಗೆ ಹಳೆಯದೆಲ್ಲವೂ ನೆನಪಿಗೆ ಬಂತು. ನಾನು ಮತ್ತು ರಾಘು ಎಲ್ಲರೂ ಒಟ್ಟಿಗೆ ಅಲ್ಲಿ ಆಟ ಆಡುತ್ತಿದ್ದೆವು. ನಮ್ಮ ಗಾಜನೂರಿನಲ್ಲಿ ಯಾವುದೇ ಜಾತಿ ಮತ ಬೇಧವಿಲ್ಲ. ಚಿಕ್ಕ ವಯಸ್ಸಿನಲ್ಲಿ ಆ ಊರಿನ ಎಲ್ಲರ ಮನೆಗಳಲ್ಲೂ ನಾನು ಊಟ ಮಾಡಿದ್ದೇನೆ. ಅಲ್ಲಿ ಮರ ಕೋತಿ ಆಟ ಆಡಿದ್ದೇನೆ. ಶಿವರಾಜ್‌ ಕುಮಾರ್‌ಗೆ 50 ವರ್ಷ ವಯಸ್ಸಾದರೂ ಇನ್ನೂ ಫಿಟ್‌ ಆಗಿದ್ದಾರೆ ಎಂದರೆ ಅದಕ್ಕೆ ಅಂದು ಗಾಜನೂರಿನಲ್ಲಿ ಆಡಿದ ಆಟಗಳೇ ಕಾರಣ. ಹಾಗಾಗಿ ನನ್ನ ತುಂಬು ಕುಟುಂಬ ಇಂದು ನನೆಪಿಗೆ ಬಂತು' ಎಂದು ಶಿವಣ್ಣ ಭಾವುಕರಾಗಿ ಹೇಳಿದ್ದಾರೆ.

ವೇದಿಕೆಯ ಮೇಲೆ ಅಣ್ಣನ ಮಾತುಗಳನ್ನು ಕೇಳುತ್ತಾ ರಾಘವೇಂದ್ರ ರಾಜ್‌ಕುಮಾರ್‌ ಮತ್ತು ಪುನೀತ್‌ ರಾಜ್‌ಕುಮಾರ್‌ ಸಹ ತಮ್ಮ ಬಾಲ್ಯದ ನೆನಪುಗಳಿಗೆ ಜಾರಿದರು. 'ಶಿವಣ್ಣ ಹೇಳಿದಂತೆ ನಾವೆಲ್ಲರೂ ಒಂದೇ. ನಮ್ಮ ನಡುವೆ ಯಾವುದೇ ಭಿನ್ನಾಭಿಪ್ರಾಯ ಇಲ್ಲ ' ಎಂದು ಇಬ್ಬರೂ ಹೇಳಿದರು.