ತಾರಕಾಸುರನಿಗೆ ಹಾಡಿದ ಶಿವಣ್ಣ

ರಥಾವರ ಚಿತ್ರ ಖ್ಯಾತಿಯ ನಿರ್ದೇಶಕ ಚಂದ್ರಶೇಖರ್‌ ಬಂಡೆಯಪ್ಪ ಆ್ಯಕ್ಷನ್‌ ಕಟ್‌ ಹೇಳಿರುವ 'ತಾರಕಾಸುರ' ಚಿತ್ರಕ್ಕಾಗಿ ಶಿವರಾಜ್‌ ಕುಮಾರ್‌ ಹಾಡಿದ್ದಾರೆ. ಶನಿವಾರವಷ್ಟೇ ಈ ಗೀತೆಯನ್ನು ಶಿವರಾಜ್‌ ಹಾಡಿದ್ದು, ಸೆ.3ರಂದು ರಾಜ್ಯದ ಪ್ರಮುಖ ವ್ಯಕ್ತಿಯೊಬ್ಬರು ಈ ಹಾಡನ್ನು ಲೋಕಾರ್ಪಣೆ ಮಾಡಲಿರುವುದು ವಿಶೇಷ.

ಹೀರೋ ಇಂಟ್ರಡಕ್ಷನ್‌ ಸಾಂಗ್‌ ಇದಾಗಿದ್ದು, ಕವಿರಾಜ್‌ರ ಸಾಹಿತ್ಯದಲ್ಲಿ ಗೀತೆ ಮೂಡಿ ಬಂದಿದೆ. ಧರ್ಮ ಅವರ ಸಂಗೀತ ಸಂಯೋಜನೆಗೆ ಹಾಡಿಗಿದೆ. 'ತಾರಕಾಸುರ ಚಿತ್ರದ ಮೊದಲನೇ ಹಾಡಿದು. ನಾಯಕನನ್ನು ಪರಿಚಯಿಸುವುದಕ್ಕಾಗಿ ಹಾಡನ್ನು ವಿಶೇಷವಾಗಿ ಬರೆಯಿಸಲಾಗಿದೆ. ಕ್ಯಾಚಿ ಸಾಹಿತ್ಯ, ಪವರ್‌ಫುಲ್‌ ಸಂಗೀತದಲ್ಲಿ ಗೀತೆ ಮೂಡಿ ಬಂದಿದ್ದು, ಅಷ್ಟೇ ಸೊಗಸಾಗಿ ಈ ಗೀತೆಯನ್ನು ಹಾಡಿದ್ದಾರೆ ಶಿವರಾಜ್‌ ಕುಮಾರ್‌. ಹಲವು ವಿಶೇಷಗಳು ಈ ಹಾಡಿನಲ್ಲಿವೆ' ಅಂತಾರೆ ಚಂದ್ರಶೇಖರ್‌.

ಈ ಸಿನಿಮಾದ ಮೂಲಕ ಹೊಸ ಹುಡುಗ ವೈಭವ್‌ ಸಿನಿಮಾ ರಂಗಕ್ಕೆ ಪ್ರವೇಶ ಮಾಡುತ್ತಿದ್ದಾರೆ. ಮೊದಲನೇ ಸಿನಿಮಾದಲ್ಲಿಯೇ ಈ ಹುಡುಗನಿಗೆ ಮೂರು ಗೆಟಪ್‌ ಹಾಕಿಸಿದ್ದಾರೆ ನಿರ್ದೇಶಕರು. 'ಪೂರ್ಣ ತಯಾರಿಯೊಂದಿಗೆ ವೈಭವ್‌ ಕ್ಯಾಮೆರಾ ಮುಂದೆ ನಿಂತಿದ್ದಾನೆ. ಹಾಗಾಗಿಯೇ ಸಿನಿಮಾ ರಂಗವು ಅವರಿಗೆ ಸಪೋರ್ಟ್‌ ಮಾಡುತ್ತಿದೆ. ಹೊಸ ಹುಡುಗನ ಚಿತ್ರವಾದರೂ, ಶಿವಣ್ಣ ಪ್ರೀತಿಯಿಂದ ಬಂದು ಗೀತೆಯನ್ನು ಹಾಡಿದ್ದಾರೆ' ಅಂತಾರೆ ನಿರ್ದೇಶಕರು.