ಕಿರಾತಕ ಬರೋದು ಖಚಿತ

ಐಟಿ ರೈಡ್‌ ಆದ ಹಿನ್ನೆಲೆಯಲ್ಲಿ ಕಿರಾತಕ 2 ಚಿತ್ರ ಸೆಟ್ಟೇರುವುದಿಲ್ಲ ಎಂಬ ಮಾತನ್ನು ನಟ ಯಶ್‌ ಅಲ್ಲಗಳೆದಿದ್ದಾರೆ. ಈಗ ಕೆಜಿಎಫ್‌ ಚಾಪ್ಟರ್‌ 2 ಮತ್ತು ಕಿರಾತಕ 2 ಚಿತ್ರಗಳೆರಡೂ ಇವರ ಮುಂದಿದ್ದು, ಯಾವುದನ್ನು ಮೊದಲು ಪ್ರಾರಂಭಿಸಬೇಕು ಎಂಬ ಬಗ್ಗೆ ಸದ್ಯದಲ್ಲೆ ತೀರ್ಮಾನ ತೆಗೆದುಕೊಳ್ಳಲಿರುವುದಾಗಿ ಅವರು ಹೇಳಿದ್ದಾರೆ. ತಾಂತ್ರಿಕ ಕಾರಣಗಳಿರುವುದರಿಂದ ಚಿತ್ರತಂಡಗಳೊಂದಿಗೆ ಮಾತನಾಡಿ ಯಾವ ಚಿತ್ರವನ್ನು ಮೊದಲು ಪ್ರಾರಂಭಿಸಬಹುದು ಎಂಬ ಬಗ್ಗೆ ನಿರ್ಧರಿಸಲಿದ್ದಾರೆ.

ಕೆಜಿಎಫ್‌ ಚಿತ್ರೀಕರಣ ಹಂತದಲ್ಲಿರುವಾಗಲೇ ಕಿರಾತಕ 2 ಚಿತ್ರ ಸೆಟ್ಟೇರಲಿದೆ ಎಂಬ ಸುದ್ದಿ ಹರಡಿತ್ತು. ಒಂದು ಮೂಲದ ಪ್ರಕಾರ ಕೆಜಿಎಫ್‌ ರಿಲೀಸ್‌ ಆದ ನಂತರ ಕಿರಾತಕ 2 ಸೆಟ್ಟೇರಲಿದೆ ಎಂದು ತಿಳಿದು ಬಂದಿತ್ತು. ಆದರೆ, ಕೆಜಿಎಫ್‌ ಚಾಪ್ಟರ್‌ 1 ದೊಡ್ಡ ಯಶಸ್ಸು ಕಂಡ ಹಿನ್ನೆಲೆಯಲ್ಲಿ ಚಿತ್ರತಂಡ ಕೆಜಿಎಫ್‌ ಚಾಪ್ಟರ್‌ 2 ಚಿತ್ರವನ್ನು ತಕ್ಷಣ ಕೈಗೆತ್ತಿಕೊಂಡಿತ್ತು. ಮಾರ್ಚ್‌ನಲ್ಲಿ ಕೆಜಿಎಫ್‌ 2 ಚಿತ್ರೀಕರಣ ಪ್ರಾರಂಭವಾಗಲಿದೆ ಎಂಬ ಸುದ್ದಿಯೂ ಇದೆ. ಇದೇ ಕಾರಣಕ್ಕೆ ಕೆಜಿಎಫ್‌ ನಿರ್ದೇಶಕ ಪ್ರಶಾಂತ್‌ ನೀಲ್‌ ಬೇರೆ ಚಿತ್ರಗಳನ್ನು ಪಕ್ಕಕ್ಕಿಟ್ಟಿದ್ದಾರೆ ಎನ್ನಲಾಗಿದೆ. ಕೆಜಿಎಫ್‌ 2 ಚಿತ್ರದ ಪೂರ್ವಬಾವಿ ಸಿದ್ಧತೆಯಲ್ಲಿ ತೊಡಗಿದ್ದಾರೆ. ಇದೆಲ್ಲದರ ನಡುವೆ ಐಟಿ ರೈಡ್‌ ಒಂದು ರೀತಿಯಲ್ಲಿ ಕಿರಾತಕ 2 ಮತ್ತು ಕೆಜಿಎಫ್‌ 2 ಚಿತ್ರಗಳ ಪ್ರಾರಂಭಕ್ಕೆ ಜರ್ಕ್‌ ಕೊಟ್ಟಂತಾಗಿತ್ತು. ಹಾಗಾಗಿಯೇ ಕಿರಾತಕ 2 ಚಿತ್ರ ಸದ್ಯ ಸೆಟ್ಟೇರುವುದಿಲ್ಲ ಎಂಬ ಮಾತು ಕೇಳಿಬಂದಿತ್ತು. ಆದರೆ, ಯಶ್‌ ಇದನ್ನು ನಿರಾಕರಿಸಿದ್ದಾರೆ. ಕಿರಾತಕ 2 ಚಿತ್ರ ಮಾಡೋದಂತೂ ಖಚಿತ. ಅದಕ್ಕೆ ಸ್ವಲ್ಪ ಸಮಯ ಬೇಕಾಗಿದೆ ಎಂದಿದ್ದಾರೆ.

ಕೆಜಿಎಫ್‌ ಹವಾ ಇರುವಾಗಲೇ ಕೆಜಿಎಫ್‌ 2 ಬಂದರೆ ಚೆನ್ನಾಗಿರುತ್ತದೆ ಎಂಬುದಂತೂ ನಿಜ. ಅಲ್ಲದೆ, ನಿರ್ದೇಶಕ ಪ್ರಶಾಂತ್‌ ನೀಲ್‌ ಶ್ರೀಮುರಳಿ ನಟನೆಯ ಉಗ್ರಂ ವೀರಂ ಚಿತ್ರ ನಿರ್ದೇಶನ ಮಾಡಬೇಕಿದೆ. ಇದರ ಜತೆಯಲ್ಲೇ ಪರಭಾಷೆಗಳಿಂದೂ ಪ್ರಶಾಂತ್‌ ನೀಲ್‌ಗೆ ಭಾರೀ ಬೇಡಿಕೆ ಬಂದಿದೆ. ಹಾಗಾಗಿ ಈಗ ಮಾಡದಿದ್ದರೆ ಕೆಜಿಎಫ್‌ 2 ಬರಲು ಇನ್ನೂ 3-4 ವರ್ಷಗಳಂತೂ ಕಾಯಬೇಕಾಗುತ್ತದೆ. ಇನ್ನೊಂದೆಡೆ ಕಿರಾತಕ 2 ಚಿತ್ರ ನಿರ್ದೇಶನ ಮಾಡಬೇಕಿರುವ ನಿರ್ದೇಶಕ ಅನಿಲ್‌ ಈಗ ದಾರಿ ತಪ್ಪಿದ ಮಗ ಚಿತ್ರದ ಶೂಟಿಂಗ್‌ನಲ್ಲಿ ಬಿಝಿಯಾಗಿದ್ದಾರೆ. ಅದನ್ನು ಮುಗಿಸಿ ಕಿರಾತಕ ಶುರುಮಾಡಲು ಇನ್ನೂ ಕೆಲ ತಿಂಗಳು ಬೇಕಾಗಬಹುದು. ಹೀಗಾಗಿ ಕೆಜಿಎಫ್‌ ಚಾಪ್ಟರ್‌ 2 ಮೊದಲು ಸೆಟ್ಟೇರುವ ಸಾಧ್ಯತೆ ಹೆಚ್ಚಾಗಿದೆ.